中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > ལོ་རྒྱུས། >
༄༅།། བོད་བཙན་པོའི་དུས་སྐབས་ཀྱི་རྡོ་རིང་གསུམ་ངོ་སྤྲོད།
དུས་ཚོད།2016-08-11 16:41:48     རྩོམ་གྱི་ཡོང་ཁུངས། བཙན་པོའི་རིག་གནས་འཕྲིན་སྟེགས།    ཆུང་། | འབྲིང་། | ཆེ།
  ༡.ཐང་ཁྲང་ཡོན་ལོ་དང་བོ་དང་ལོ་གཉིས་པ་སྟེ་བོད་ཆེན་པོའི་སྐྱིད་རྟག་ལོ་བདུན་པ་དང་བརྒྱད་པ་སྤྱི་ལོ821-822 ཐང་བོད་བར་ཕོ་ཉ་མངགས་ནས་ཁྲང་ཨན་དང་ལྷ་སར་མཇལ་འདུམ་ཆེན་པོ་བྱས།   ལོ་རྒྱུས་སུ་ཁྲང་ཆིན་མནའ་འབྲེལ་དང་དབོན་ཞང་མནའ་འབྲེལ་ཞེས་འབོད།   ལོ་གསུམ་པར་ཐང་བོད་ཕྱོགས་གཉིས་ཀྱིས་ཁྲང་ཨན་དང་ལྷ་སར་རྡོ་རིང་དུ་ཡི་གེ་བརྐོས་ནས་ནམ་ཞར་མི་འགྱུར་བར་བྱས།   ཡི་གེར་ཐང་བོད་རྒྱལ་བོ་རིམ་བྱོན་རིང་གི་མཛའ་འབྲེལ་ནན་བཤད་དང་ཁྱིམ་མཚེས་མཉམ་མཐུན་དགོས་པའི་ཐུན་མོང་གི་རེ་འདོད་བསྟན་ནས།   སླར་ཐང་བོད་ཕྱོགས་གཉིས་སོ་སོར་དབང་བའི་ཡུལ་དང་ས་མཚམས་སྲུང་ཞིང་།   དེའི་ཤར་ཕྱོགས་ནི་རྒྱའི་ས་ཆ་དང་ནུབ་ཕྱོགས་ཐམས་ཅད་ནི་བོད་ཆེན་པོའི་ས་ཆ་ཡིན་པ།    ཕན་ཚུན་དགྲར་མི་ལངས་པ་དང་། དམག་མི་འདྲེན་པ། ས་ཆ་མི་འཕྲོག་པའི་དམ་བཅོས། མཇུག་ཏུ་ཐང་བོད་ཕྱོགས་གཉིས་ཆབ་སྲིད་གཅིག་ཏུ་མཐུན་ཞིང་།    འདུམ་འགྲིག་ཆེན་པོ་འདི་ལྟར་མཛད་པས་དབོན་ཞང་གཉིས་ཕན་ཚུན་དགའ་བའི་འཕྲིན་བཟང་ཡང་ཕར་ཚུར་གཏོང་རེས་བྱ་དགོས་པའི་རེ་བ་བཏོན།     རྡོ་རིང་གི་ཡི་གེ་ནི་བོད་གནའ་བོའི་སྲིད་འཛིན་དང་རིགས་རུས། སྐད་ཆ།  ཐང་བོད་བར་གྱི་འབྲེལ་བ་བཅས་ཞིབ་འཇུག་བྱེད་པའི་རྒྱུ་ཆ་གལ་ཆེན་ཞིག་ཡིན། 
  རྡོ་རིང་དེ་ལྷ་སའི་གཙུག་ལག་ཁང་མདུན་དུ་ཡོད་པ་དང་།   རྡོ་རིང་གི་རྩེ་མོ་ཆར་ཁེབས་དང་ཏོག་ཞབས་འོག་ཏུ་རྡོའི་རུས་སྦལ་གྱི་སྟེགས་བཅས་ཡོད།   རྡོ་རིང་གི་ཡིག་འབྲུ་རེ་འགའ་སུབ་པ་ལས་བོར་བརླག་ཅི་ཡང་བྱུང་མེད།     རྡོ་རིང་གི་ཤར་ངོས་བོད་ཡིག་རྐྱང་བ་དང་།   བོད་རྒྱལ་རིམ་བྱོན་གྱི་ཆོས་སྲིད་ཀྱི་མཛད་པ་མདོར་བསྡུས་སུ་བཀོད་ཡོད།   ནུབ་ངོས་སུ་འདུམ་འགྲིག་གི་གཞུང་ཡིག་དངོས་རྒྱ་བོད་ཤན་སྦྱར་དུ་བཀོད་ཡོད།     ལྷོ་བྱང་གཉིས་སུ་ཆིངས་འགྲིག་ལ་ཞུགས་པའི་རྒྱ་བོད་དཔོན་སྣ་བོད་ཕྱོགས་ཀྱི་བཅུ་བདུན་དང་།    ཐང་ཕྱོགས་ཀྱི་བཅོ་བརྒྱད་ཀྱི་རེའུ་མིང་རྒྱ་བོད་ཡིག་གཉིས་ཀྱི་ལམ་ནས་བཀོད་ཡོད།  ཞིབ་འཇུག་ཐད་ལ་གཉའ་གོང་དཀོན་མཆོག་ཚེ་བརྟན་གྱིས་དབོན་ཞང་རྡོ་རིང་དང་ཐང་བོད་བར་གྱི་འབྲེལ་བ་ཅེས་པ1986ལོར་ཀན་སུའུ་མི་རིགས་དཔེ་སྐྲུན་ཁང་གིས་དཔར་ཏུ་བཏབ།    ཝང་ཡོས་དབོན་ཞང་རྡོ་རིང་གི་གསལ་འགྲེལ་ཅེས་པ་ལོ་རྒྱུས་ཞིབ་འཇུག 1980ལོའི་དེབ4པར་བཀོད།   ཁོས་བོད་ཀྱི་རྡོ་རིང་དང་དྲིལ་བུའི་ཡི་གེ་ཅེས་པ1982ལོ་རིག་དངོས་དཔེ་སྐྲུན་ཁང་གིས་པར་དུ་བཏབ།   ལོའོ་ཁྲང་ཕེས་ཐང་དང་རྒྱལ་རབས་ལྔའི་སྐབས་ཀྱི་ནུབ་བྱང་གི་ཡུལ་སྐད་ཅེས་པ1933ལོ་སྣུམ་དཔར་དུ་བཏབ།    ཧྥོ་ལིན་ཁིས་གཙུག་ལག་ཁང་མདུན་གྱི་རྡོ་རིང་གི་ཡི་གེ་ཅེས་པ་ཧིན་རྡུའི་བརྐོས་ཡིག་དེབ་བཅུ་བ་དང་བཅུ་གཅིག་སྟེང་དུ་བཀོད། ཙའོ་ཐུན་ཀྲང་གིས་ཐང་བོད་མནའ་འབྲེལ་རྡོ་རིང་ཞེས་པ་ཨེ་ཤ་ཡ་གླིང་ཤར་མའི1949ལོའི་ལོ་རྒྱུས་དེབ་བཅུ་བའི་འདོན་ཐེངས་བཞི་བར་བཀོད།    ལིས་ཧྥང་ཀོས་ཐང་བོད་མནའ་འབྲེལ་རྡོ་རིང་ལ་དཔྱད་པ་ཞེས་པ1956ལོའི་སྤྱི་བསྒྲགས་དེབ44བར་བཀོད།
   ༢.བསམ་ཡས་གཙུག་ལག་ཁང་གི་རྡོ་རིང་། བསམ་ཡས་གཙུག་ལག་ཁང་ནི་བོད་ཀྱི་དགོན་པ་ཐོག་མ་ཡིན།     བོད་ལྗོངས་ཀྱི་གྲ་ནང་རྫོང་ཡར་ཀླུང་གཙང་བོའི་བྱང་འགྲམ་དུ་ཡོད།      བོད་བཙན་པོའི་དགུན་བྲང་བྲག་དམར་དང་ཉེ།    དེ་ནི་ཁྲི་སྲོང་ལྡེ་བཙན་སྐུ་དངོས་ཀྱིས་མགོ་འཛིན་འཛུགས་བསྐྲུན་བྱས་པ་ཡིན།    བཟོ་སྐྲུན་མཇུག་རྫོགས་རྗེས་བཀའ་གཙིགས་རྡོ་རིང་དུ་བྲིས་ནས་བཞག ཡི་གེར་ལྷ་ས་དང་བྲག་དམར་གྱི་གཙུག་ལག་ཁང་ལ་སོགས་པར་སྐུ་གསུང་ཐུགས་ཀྱི་རྟེན་བཞེངས་པ་དང་།    ནང་བའི་ཆོས་མཛད་པ་འདི།    དུས་ནམ་ཡང་བར་མཚམས་མི་ཆད་པའམ། འཐོར་ཞིག་ཏུ་མི་འགྲོ་བར་བྱེད་དགོས།   དངོས་པོའི་མཐུན་རྐྱེན་སྤྲད་པ་རྣམས་ཀྱང་། དེ་ལས་ཉུང་དུ་མི་གཏོང་བ་དང་།    ཐུང་དུ་མི་གཏོང་བ་བྱེད་དགོས།     ད་ཕྱིན་ཆད་གདུང་རྒྱུད་རིམ་བྱོན་གྱིས་ཀྱང་བཙན་པོ་ཡབ་སྲས་ཀྱི་མཛད་ཚུལ་བཞིན་དུ་ཁས་ལེན་དམ་བཅའ་བྱེད་དགོས།     དེ་ལས་མནའ་དང་འགལ་བའི་རིགས་མི་བྱེད་པ་དང་གསར་བཟོ་མི་བྱེད་པར། དཀོན་མཅོག་གསུམ་དང་། ཆོས་སྲུང་།      སངས་རྒྱས་ཆོས་ལུགས་ལ་དཀར་བའི་ལྷ་འདྲེ་བཅས་ཚང་མ་ཡང་དཔང་དུ་བཞག་སྟེ།  བཙན་པོ་ཡབ་སྲས་དང་རྗེ་བློན་རྣམས་ཀུན་གྱིས་ཞལ་བཞེས་སུ་མནའ་སྐྱེལ་བ་ཡིན་ལ།    མནའ་ཡིག་ཞིབ་ཕྲ་གཅིག་ནི་ལོགས་སུ་ཡོད་པ་རེད།   རྡོ་རིང་གི་ཡི་གེར་བོད་བཙན་པོ་སྲིད་གཞུང་གིས་བོན་ལ་ངོ་རྒོལ་དང་ཤུགས་ཆེར་ནང་ཆོས་སྤེལ་རྒྱུའི་ལོ་རྒྱུས་ཀྱི་དོན་དངོས་མཚོན་ཐུབ་པ་མ་ཟད།     ནང་བསྟན་པ་བཅོས་སྒྱུར་ཁྲོད་ཀྱི་ལོ་རྒྱུས་ཀྱི་དཔང་རྟེན་གལ་ཆེན་ཞིག་ཡིན།
བསམ་ཡས་གཙུག་ལག་ཁང་གི་རྡོ་རིང་དེ་ཧ་ལམ་སྤྱི་ལོ768ཡས་མས་སུ་བཞེངས་པ་དང་།     རྡོ་རིང་གི་མདུན་ངོས་སུ་བོད་ཡིག་ཐིག་ཕྲེང21ལས་གཞན་ངོས་རྣམས་སུ་ཡི་གེ་གཅིག་ཀྱང་མེད།    རྡོ་རིང་གི་ཡིག་འབྲུ་རེ་འགའ་དག་ཡོད་པ་ལས་བོར་བརླག་བྱུང་མེད།    མཐོ་ཚད་ལ་རྨིས་3.8དང་སྟེགས་བུའི་མཐུག་ཚད་ལ་རྨིས་0.8ཡོད། བསམ་ཡས་གཙུག་ལག་ཁང་གཞུང་སྒོའི་ལྷོ་ངོས་རྩིག་འགྲམ་དུ་ཡོད།     ལི་ཅེ་ཧྲིན་གྱིས་ལྷ་སའི་གནའ་བོའི་ལོ་རྒྱུས་བཀའ་གཙིགས་བྲིས་གནང་ཡོད།    ཨོ་དི་ཨར་གྱིས་ལྷ་སའི་གནའ་བོའི་ལོ་རྒྱུས་བཀའ་གཙིགས་ཞེས་པའི་རྩོམ་ཡིག1911ལོའི་རྒྱལ་ཚང་གི་ཨེ་ཤ་ཡ་གླིང་ཞིབ་འཇུག་ཚོགས་པའི་དུས་དེབ་ཏུ་སྤེལ།     ཝང་ཡོའི་བོད་ཀྱི་རྡོ་རིང་དང་དྲིལ་བུའི་ཡི་གེ་ཅེས་པ1982ལོ་རིག་དངོས་དཔེ་སྐྲུན་ཁང་གིས་པར་དུ་བཏབ། 1984ལོར་བསོད་ནམས་སྐྱིད་ཀྱི་བོད་ཀྱི་རྡོ་རིང་ཡི་གེ་དང་དྲིལ་བུའི་ཁ་བྱང་ཞེས་པ་མི་རིགས་དཔེ་སྐྲུན་ཁང་གིས་དཔར་ཏུ་བཏབ། 
   ༣.སྟག་སྒྲ་ཀླུ་གོང་ནི་ཁྲི་སྲོང་ལྡེ་བཙན་སྐབས་ཀྱི་བློན་ཆེན་ཞིག་ཡིན། དུས་རབས་བརྒྱད་པར་ཐང་བོད་བར་འཁྲུག་རྩོད་མང་བོ་བྱུང་།     ཁྲི་སྲོང་ལྡེ་བཙན་གྱི་རིང་བློན་ཆེན་སྟག་སྒྲ་ཀླུ་གོང་གིས763ལོར་བོད་དམག་ཁྲང་ཨན་དུ་དྲངས།    རྡོ་རིང་འདིར་སྐབས་དེའི་ལོ་རྒྱུས་ཞིབ་པར་བྲིས་ནས་སྟག་སྒྲ་ཀླུ་གོང་ལ་བསྟོད་བསྔགས་དུ་བཞེངས་པ་ཡིན།    རྡོ་རིང་གི་ཡི་གེར་སྟག་སྒྲ་ཀླུ་གོང་གི་ཡོན་ཏན་དང་མཛད་རྗེས་བསྟོད་བསྔགས་དང་ཁྲི་སྲོང་ལྡེ་བཙན་གྱིས་ས་ཞིང་དང་།    གཞིས་ཀ་སོགས་གནང་བ་མ་ཟད།    ཁོའི་དབོན་རབས་ལ་དམིགས་བསལ་གྱི་དབང་ཆ་མང་བོ་གནང་བ་བཀོད་ཡོད།     རྡོ་རིང་འདི་བོད་ཆེན་པོའི་སྤྱི་ཚོགས་ཀྱི་སྒྲིག་གཞི་དང་ཐང་བོད་འབྲེལ་བའི་ལོ་རྒྱུས་ཞིབ་འཇུག་བྱེད་པར་མེད་དུ་མི་རུང་བའི་ལོ་རྒྱུས་ཀྱི་ཡིག་ཆ་གལ་ཆེན་ཞིག་ཡིན།
     རྡོ་རིང་དེ་ལྷ་སའི་པོ་ཏ་ལའི་མདུན་ཕྱོགས་ཀྱི་ཐང་ཆེན་ན་ཡོད།    རྡོ་རིང་གི་རྒྱ་ཁྱོན་ལ་སྨི་གྲུ་བཞི་མ22.25དང་མཐོ་ཚད་ལ་སྨི1.92ཡོད་པའི་སྟེགས་བུ་དང་དཀྱིལ་རྡོའི་བང་རིམ་གསུམ་བརྩེགས་མཐོ་ཚད་ལ་སྨི1.32ཡོད་པའི་སྟེང་དུ་ཡོད།     རྡོ་རིང་གི་མཐོ་ཚད་ལ་སྨི་8དང་།    རྡོ་རིང་གི་རྩེ་མོ་ཆར་ཁེབས་དང་ཞབས་སྦོམ་སྟེང་ཕྲ་བའི་གཟུགས་ཡིན།    ཤར་ལྷོ་བྱང་ངོས་གསུམ་དུ་བོད་ཡིག་བྲིས་ཡོད།     བྱང་དུ་ཡིག་ཕྲིང68དང་ཤར་དུ16།     ལྷོ་རུ74ཡོད།    རྡོ་རིང་གི་ཡིག་འབྲུ་རེ་འགའ་སུབ་པ་ལས་བོར་བརླག་ཅི་ཡང་བྱུང་མེད། ཞིབ་འཇུག་གི་སྐོར་ལ།   ལི་ཅེ་ཧྲིན་གྱིས་ལྷ་སའི་གནའ་བོའི་ལོ་རྒྱུས་བཀའ་གཙིགས་བྲིས་གནང་ཡོད།     ཨོ་དི་ཨར་གྱིས་ལྷ་སའི་གནའ་བོའི་ལོ་རྒྱུས་བཀའ་གཙིགས་ཞེས་པའི་རྩོམ་ཡིག1911ལོའི་རྒྱལ་ཚང་གི་ཨེ་ཤ་ཡ་གླིང་ཞིབ་འཇུག་ཚོགས་པའི་དུས་དེབ་ཏུ་སྤེལ།     ཝང་ཡོའི་བོད་ཀྱི་རྡོ་རིང་དང་དྲིལ་བུའི་ཡི་གེ་ཅེས་པ་1982ལོ་རིག་དངོས་དཔེ་སྐྲུན་ཁང་གིས་པར་དུ་བཏབ།     དེ་བཞིན་སློབ་ཆེན་ཁག་གི་བསླབ་གཞིར་བདམས་ཡོད།།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།