中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > ཚན་རྩལ་ཤེས་བྱ། >
༄༅།། སེམས་པ་ལྷོད་ལ་བབས་ནས་སེམས་ཁམས་སྙོམ་སྒྲིག་བྱེད་ཤེས་དགོས།
དུས་ཚོད།2020-12-23 16:05:09     རྩོམ་གྱི་ཡོང་ཁུངས། ཀན་ལྷོའི་གསར་འགྱུར།    ཆུང་། | འབྲིང་། | ཆེ།
    གཞོན་པའི་དུས་སྐབས་ནི་སེམས་ཁམས་འཚར་ལོངས་འབྱུང་བའི་སྐབས་ཀྱི“དུས་སྐབས་ཚབས་ཆེན”དང“ཉེན་ཁ་ཆེ་བའི་དུས་སྐབས”ཤིག་ཡིན། སྐབས་དེར་སེམས་ཁམས་ལ་ཐལ་དྲགས་པ་དང་གཡོ་འགུལ་ཆེ་བ། བར་ཁྱད་ཆེ་བ་དང་འདང་མི་ཕོག་པ། གཞན་རྐྱེན་ཐེབས་སླ་བ། ཧོལ་རྒྱུག་དང་ཐོལ་བྱུང་གི་གནས་ཚུལ་མང་བོ་ཐོན་པ་ཡིན།
    ཨ་རིའི་མེ་ཞེ་ཀེན་སློབ་ཆེན་གྱི་སེམས་ཁམས་རིག་པ་བ་ནན་ཏི•ནེའེ་སེན་གྱིས་ཞིབ་འཇུག་ཅིག་ལས་ཤེས་རྟོགས་བྱུང་བ་ལྟར་ན། མི་ཕལ་པ་ཞིག་གི་མི་ཚེ་གང་བོའི་དུས་ཚོད 3/10ཙམ་སེམས་ཁམས་མི་སྐྱིད་པར་གནས་ཡོད་ལ། སྐྱོ་སྣང་གི་སེམས་ཁམས་ཀྱིས་མིའི་བདེ་ཐང་ལ་གནོད་འཚེ་ཐེབས་ཀྱིན་ཡོད། དེས་མིའི་ལུས་སྟོབས་དང་སེམས་ཤུགས་ཉམས་པར་བྱེད་པས། མི་དེ་བྱ་འགུལ་ལ་ཞུགས་སྐབས་ཐང་ཆད་སླ་བར་མ་ཟད། ལུས་ཤུགས་ཉམས་ནས་བྱ་བ་གང་ལའང་སྤྲོ་བ་མེད་པ་དང་། བློ་རིག་མི་གསལ་བ་དང་རྣམ་དཔྱོད་ཀྱི་རྩལ་ཉམས་པ་སོགས་ཀྱི་སྣང་ཚུལ་ཡང་འབྱུང་། དུས་མཉམ་དུ་སྐྱོ་སྣང་གིས་མིའི་རང་གཅུན་ནུས་པ་ཇེ་དམའ་རུ་བཏང་སྟེ། དོན་རྐྱེན་དང་འཕྲད་ཚེ་ཧོལ་རྒྱུག་བྱེད་སླ་བ་དང་། ཤེས་པ་རྣལ་དུ་གནས་མི་ཐུབ་པས་རྒྱུན་དུ་རང་ཉིད་ཕྱིས་སུ་འགྱོད་པ་སྐྱེ་བར་འགྱུར་བའི་དོན་དག་བསྒྲུབ་སྲིད། ཧར་ཝར་ངྷི་སློབ་ཆེན་གྱིས་སྔོན་ཆད་སྙིང་ནད་ཕོག་པའི་མི 1600ལ་བརྟག་དཔྱད་བྱས་པ་ལྟར་ན། ཁོ་ཚོར་སེམས་འཚིག་པ་དང་ཡི་མུག་པ། ཁོང་ཁྲོ་ལངས་པ་སོགས་ཀྱི་སྣང་ཚུལ་འབྱུང་ཚད་མི་དཀྱུས་མ་ལས་ལྡབ 3ཙམ་གྱིས་མཐོ་བ་རེད། དེ་བས་ང་ཚོས་ཐབས་བཀོད་འཐེན་ནས་རང་ཉིད་ཀྱི་སེམས་ཁམས་སྙོམ་སྒྲིག་བྱས་ཏེ་ཁོང་ཁྲོ་ལངས་ཚད་ཇེ་ཉུང་དུ་གཏོང་དགོས།
    ང་ཚོས་རང་ཉིད་ལ་སེམས་ཁམས་མི་ལེགས་པ་འབྱུང་བའི་སྐབས་སུ། ཁོང་ཁྲོ་ལ་ཚོད་འཛིན་བྱེད་པ་དང་། སྤོབས་སེམས་ཉམས་པའི་སྐབས་སུ་རང་ཉིད་ལ་སེམས་ཤུགས་བསྩལ་ཏེ་སེམས་ཁམས་མི་ལེགས་པར་ཁ་ལོ་བསྒྱུར་དགོས། སེམས་ཁམས་མི་སྐྱིད་པའི་སྐབས་སུ། ང་ཚོས་གཤམ་གྱི་ཐབས་ཤེས་འདི་དག་ཚོད་ལྟ་བྱེད་ཆོག་སྟེ། གཅིག འཚོ་བར་སྤྲོ་བ་ཡོད་པའི་རྣམ་འགྱུར་ལེགས་པོ་གསོ་སྐྱོང་བྱ་དགོས། སྤྲོ་སྣང་གི་རྣམ་འགྱུར་གྱིས་སེམས་ཁམས་ལ་ཁ་ལོ་བསྒྱུར་ཐུབ། དེ་བས་དུས་རྒྱུན་གྱི་འཚོ་བའི་ཁྲོད་དུ་བགེགས་དང་བར་ཆད་གང་འདྲར་འཕྲད་ཀྱང་། སྤྲོ་སེམས་དང་ཧུར་བརྩོན་ངང་མདུན་དུ་བསྐྱོད་དགོས་ལ། དཔའ་ངར་ཆེན་པོས་དོན་དངོས་དང་ལེན་བྱས་ཏེ་སྙིང་རུས་ཆེར་བསྐྱེད་བྱས་ན་མདུན་ལམ་ནི་རེ་བས་ཁེངས་ཡོད་པར་ཡིད་ཆེས་བཅངས་དགོས། གཉིས། སེམས་ཤུགས་གཏོད་ཡུལ་བསྒྱུར་བ། སེམས་ཤུགས་གཏོད་ཡུལ་དེ་སེམས་ཁམས་མི་སྐྱིད་པ་འབྱུང་བའི་གནས་དེ་ནས་བྱ་བ་གཞན་ཞིག་གི་སྟེང་དུ་བསྒྱུར་དགོས་པ་སྟེ། དཔེར་ན། རོལ་རྩེད་རྩེ་བ་དང་སྤོ་ལོ་རྒྱག་པ། མིག་མངས་འདེད་པ། གླུ་དབྱངས་ལ་ཉན་པ། གློག་བརྙན་ལ་བལྟ་བ། དཔེ་ཆ་ཀློག་པ་སོགས་ཚུལ་མཐུན་དང་དོན་སྙིང་ལྡན་པའི་བྱ་འགུལ་སྤེལ་ནས་སེམས་ཁམས་མི་ལེགས་པའི་འཆིང་ཐག་ལས་གྲོལ་ཏེ། སེམས་ཁམས་སྐྱིད་པོ་ཡོང་བར་བྱེད་དགོས། གསུམ། རང་ཉིད་ལ་ཚོད་འཛིན་འོས་འཚམ་བྱེད་དགོས། ན་གཞོན་རྣམས་ཀྱི་རེ་འདུན་དང་རེ་བ་ཚང་མ་སྤྱི་ཚོགས་ཀྱི་ཀུན་སྤྱོད་ཚད་གཞི་དང་མཐུན་དགོས། དེ་མིན་ན་སེམས་པ་བག་ཕེབས་ངང་བསམ་ཚུལ་ངན་པ་དེ་དག་རྩ་མེད་དུ་གཏོང་དགོས། སྤྱི་ཚོགས་དང་མི་གཞན་པས་རང་ཉིད་ཀྱི་རེ་འདུན་བསྐང་བར་རེ་བ་ནན་མོ་བཅངས་མི་རུང་། དེ་ལྟར་བྱས་ན་སེམས་ཁམས་སྙོམ་སྒྲིག་དང་བདེ་ཐང་ཡོང་བར་ཕན་ཐོགས་ཡོད། བཞི། ཡུན་རིང་སེམས་སུ་ཉར་བའི་སེམས་ཁམས་མི་ལེགས་པ་འོས་འཚམ་གྱིས་འདོར་ཤེས་དགོས། སེམས་ཁམས་མི་ལེགས་པ་ལུགས་མཐུན་གྱིས་འདོར་བ་ཞེས་པ་ནི་འོས་འཚམ་གྱི་གནས་དང་བྱེད་ཐབས་སྤྱད་དེ་སེམས་ཁམས་མི་ལེགས་པ་མེད་པར་བཟོ་བ་ལ་ཟེར། དཔེར་ན། འོས་འཚམ་གྱི་ས་ཆ་དང་འོས་འཚམ་གྱི་དུས་ཚོད་ཅིག་བཙལ་ཏེ་སྐད་གསང་མཐོན་པོས་ཀི་འདེབས་པ་དང་། གནམ་ལྡིང་ས་ལྡིང་བྱེད་པ། དེ་མིན་ཡིད་ཚིམ་པ་ཞིག་ངུ་བ་སོགས་ཀྱི་ཐབས་ལམ་སྤྱད་ན་ནང་སེམས་ཀྱི་སྡུག་བསྔལ་ཕྱིར་འདོན་ཐུབ། དེ་ལྟར་བྱས་ན་ད་གཟོད་ཆར་རྗེས་སུ་འཇའ་ཚོན་ཤར་བ་བཞིན་འཇིག་རྟེན་འདི་ནི་ཇི་འདྲའི་ཡིད་དུ་འོང་བ་ཞིག་ཡིན་པ་རྟོགས་སྲིད།
    སེམས་ཁམས་ལ་འགྱུར་བ་བཏང་ན། ད་གཟོད་ཁྱོད་ཀྱི་རྣམ་འགྱུར་ལ་འགྱུར་བ་འབྱུང་ཞིང་། རྣམ་འགྱུར་ལ་འགྱུར་བ་བྱུང་ན། ད་གཟོད་ཁྱོད་ཀྱི་གོམས་གཤིས་ལ་འགྱུར་བ་འབྱུང་སྲིད་པ་དང་། གོམས་གཤིས་འགྱུར་རྗེས། གཤིས་ཀའང་འགྱུར་སྲིད་པས་ཁྱོད་ཀྱི་མི་ཚེ་ལའང་འགྱུར་བ་འབྱུང་སྲིད་དོ།།
རྩོམ་སྒྲིག་པ། སངས་རྒྱས་འཚོ།

Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།