中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > ཚན་རྩལ་ཤེས་བྱ། >
༄༅།། གཡེར་མའི་ཕན་ནུས་འདི་དག་ཁྱོད་ཀྱིས་ཤེས་སམ།
དུས་ཚོད།2021-05-26 15:58:03     རྩོམ་གྱི་ཡོང་ཁུངས། ཀན་ལྷོའི་གསར་འགྱུར།    ཆུང་། | འབྲིང་། | ཆེ།
    གཡེར་མ་ནི་གཡེར་སྡོང་གི་འབྲས་ཤུན་ཏུ་གཏོགས་ཤིང་། སྟོན་ཁར་འབྲས་བུ་བསྡུ་བ་དང་། ཉི་མར་སྐམ་ནས་ས་བོན་བླངས་ཤིང་ལྷད་རྫས་ཕུད་པས་ཆོག དེ་ནི་རྒྱུན་སྤྱོད་ཀྱི་བྲོ་རྫས་ཤིག་ཡིན་ལ་ཀྲུང་སྨན་ཞིག་ཀྱང་ཡིན།
    ཀྲུང་ལུགས་གསོ་རིག་གི་གཞུང་དུ་གཡེར་མའི་ཕན་ནུས་གསལ་བོར་བཀོད་ཡོད་ལ། སྨན་སྤྱོད་གཡེར་མ་ནི་ངེས་པར་དུཀྲུང་གོའི་སྨན་ཡིགགི་ཚད་གཞི་དང་མཐུན་པའི་སྒོ་ནས་བཀོལ་སྤྱོད་བྱ་དགོས་པས། ཟས་སྤྱོད་གཡེར་མ་དེ་སྨན་དུ་སྤྱོད་མི་རུང་ངོ་། །
    གཡེར་མར་ན་ཟུག་གཅོག་པ་དང་ནད་འབུ་གསོད་པ། ཟ་འཕྲུག་འགོག་པ་བཅས་ཀྱི་ཕན་ནུས་ལྡན་པས། ཁོང་དུ་བསྟེན་ན་ཕོ་བ་འཁྱག་གཟེར་ལངས་པ་དང་སྐྱུག་འཁྲུ་འབྱུང་བ། ཕོ་བ་གཟེར་བ། རྒྱུ་སྲིན་ནད་སོགས་གསོ་བར་ཕན་པ་དང་། ཕྱི་རུ་བསྟེན་ན་རློན་འབྲུམ་གྱིས་ཟ་འཕྲུག་ལངས་པ་འགོག་ཐུབ།
    ན་ཟུག་གཅོག་པ།
    གཡེར་མ་ནི་ཚ་བའི་རིགས་ཡིན་པས། ཚ་བས་གྲང་བ་སེལ་བར་བྱས་ཏེ་ན་ཟུག་གཅོག་པའི་ཐད་ཕན་པ་ཆེན་པོ་ལྡན། བུད་མེད་ལ་ཟླ་མཚན་འབབ་སྐབས་ཟུག་གཟེར་ལངས་པ་ལ་རྒྱུ་རྐྱེན་མང་བོ་ཡོད་མོད། འོན་ཀྱང་འཁྱགས་པའི་དབང་གིས་ཟླ་མཚན་འབབ་སྐབས་ན་ཟུག་ལངས་པ་ཡིན་ན་གཡེར་མ་འཐུང་བས་གསོ་བཅོས་བྱ་ཐུབ། ཡིན་ནའང་སོ་ན་བའི་སྐབས་སུ་གཡེར་མ་སྤྱད་ན་ཚ་བེར་གྱིས་ན་ཟུག་བཀབ་པ་ཙམ་ལས་གསོ་བཅོས་ཀྱི་ཕན་ནུས་ཐོན་མི་ཐུབ་པ་རེད།
    གཉན་ཚད་འཇོམས་པ།
    གཡེར་མར་གཉན་ཚད་འཇོམས་པའི་ནུས་པ་ཡོད། པུས་ཚིགས་འདྲེད་སྐྱིའི་གཉན་ཚད་ནི་པུས་ཚིགས་ལ་རྨས་སྐྱོན་ཕོག་པ་ལས་བསླངས་པའི་སྲིན་མེད་རང་བཞིན་གྱི་གཉན་ཚད་ཅིག་ཡིན། འདྲེད་སྐྱིའི་བྱེད་ནུས་ཉམས་ན་ཚིགས་ཆུ་འབྱུང་བ་དང་བསྡུ་ལེན་བྱེད་པར་གནོད་པ་ཐེབས་ཏེ། པུས་ཚིགས་ཀྱི་ནང་དུ་ཆུ་སེར་གསོག་སྲིད། དེའི་རྐྱེན་གྱིས་གལ་ཏེ་གཡེར་མ་སྣ་རྐྱང་གིས་སྤྱད་ན་མི་ཕན་པས། སྨན་སྣ་གཞན་པ་དང་བསྡེབས་ནས་བསྟེན་དགོས།
    ནད་འབུ་གསོད་པ།
    སྦྱོར་བ་སྨན་གྱི་གཞུང་ལྟར་ན། གཡེར་མའི་སྣུམ་ལ་ནད་འབུ་གསོད་པའི་ནུས་པ་ལྡན་པས། ཕྱི་རུ་བསྟེན་ན་རློན་འབྲུམ་ཟ་འཕྲུག་འགོག་ཐུབ། དེ་ནི་སྣ་རྐྱང་གིས་བསྟེན་ཆོག་ལ་སྨན་རྫས་གཞན་པ་སྟེ། དཔེར་ན། མཁན་ནག་དང་སྦྲུལ་ཞགས། ཤུག་སེར་སོགས་དང་མཉམ་ཏུ་གདུས་ནས་ཟ་འཕྲུག་ལངས་སའི་གནས་དེ་བཀྲུས་ཆོག རྐང་འཐིལ་དུ་རློན་འབྲུམ་ཡོད་ནའང་དེ་ལྟར་རོ།
    གཡེར་མས་རྐང་བ་སྦང་བ་ནི་རྐང་འཐིལ་གྱི་པགས་ནད་གསོ་བའི་ཆེད་ཡིན་པ་དང་། རྐང་བ་སྦང་སྐབས་གཤམ་གྱི་གནས་ཚུལ་འདི་དག་ལ་མཉམ་དགོས་པ་སྟེ། 1.རྐང་བའི་སྟེང་དུ་པགས་འབྲུམ་དང་རྨ་ཁ་སོགས་ཡོད་ན་རེད་སླ་བས་སྦངས་མི་རུང་།  2.གཅིན་སྙི་ཟ་ཁུའི་ནད་པ་དང་འགུལ་སྐྱོད་སྟབས་མི་བདེ་བ། དྲན་པ་མི་གསལ་བ་སོགས་ཀྱིས་ཆུའི་དྲོ་ཚད་ལ་མཉམ་འཇོག་བྱས་ཏེ་འཚིག་རྨས་མི་འབྱུང་བ་བྱེད་དགོས།  3.སྦངས་བའི་སྐབས་སུ་ནད་པས་ཆུ་ཁ་གསབ་བྱེད་པར་མཉམ་འཇོག་དགོས་པ་དང་། ལྟོགས་དྲགས་པའམ་ཡང་ན་རྒྱགས་དྲགས་པའི་སྐབས་སུ་སྦངས་མི་རུང་།  4.ཚ་བ་རྒྱས་པའི་སྐབས་སུ་སྦངས་མི་རུང་བ་བཅས་སོ། །
    གྲང་བ་སེལ་བ།
    གཡེར་མ་དང་སྒ་རློན། སུག་སྨེལ་དམར་པོ་སོགས་མཉམ་དུ་སྤྱད་ན་ཕྱི་གྲང་ནང་གནོད་ལས་བྱུང་བའི་གསུས་གཟེར་དང་སྐྱུག་འཁྲུ་འབྱུང་བ་འགོག་ཐུབ་པ་དང་། གཡེར་མ་དང་སྒ་སྐྱ། དཀར་པོ་ཆིག་ཐུབ་སོགས་མཉམ་དུ་སྤྱད་ན་ཕོ་མཚེར་གྲང་འཁྱགས་ལས་བྱུང་བའི་ཕོ་གཟེར་དང་ཡི་ག་མེད་པ་སོགས་གསོ་ཐུབ། གཡེར་མ་ད་རུང་བྱེ་འབྲས་དང་སུག་སྨེལ་སོགས་དང་མཉམ་དུ་སྤྱད་ན་མཚེར་པ་གྲང་རློན་ལས་བྱུང་བའི་གསུས་གཟེར་དང་སྐྱུག་འཁྲུ་གསོ་ཐུབ།
    ཡིན་ནའང་མི་མང་ཤས་ཀྱིས་ནད་ཀྱི་འབྱུང་རྐྱེན་མི་ཤེས་པའི་དབང་གིས་སྨན་གདམ་ཀ་བྱེད་དཀའ་བ་རེད། དེ་བས་གོང་གི་ནད་རྟགས་དེ་དག་འབྱུང་སྐབས་དུས་ལྟར་སྨན་ཁང་དུ་སོང་ནས་སྨན་པར་བསྟེན་ན་ལེགས།
    གཡེར་མ་ནི་ཚ་བའི་རིགས་ཀྱི་ཀྲུང་སྨན་ཞིག་ཡིན་ལ། མི་སུ་དང་གང་ལའང་འཕྲོད་པའི་ངེས་པ་མེད་པར། ཚ་བ་རྒྱས་པའི་མི་དང་བཤང་འགག་པ་སོགས་ཀྱི་ནད་པས་སྤྱོད་མི་རུང་ལ། སྦྲུམ་མས་སེམས་ཆུང་བྱས་ཏེ་སྤྱོད་དགོས། ཟས་སྨན་གཉིས་སུ་རུང་བའི་ཀྲུང་སྨན་གྱི་རིགས་ནི་ཅུང་བདེ་འཇགས་ཡིན་མོད། འོན་ཀྱང་སྨན་པའི་མཛུབ་སྟོན་འོག་ལུགས་མཐུན་གྱིས་སྤྱད་དེ། སྨན་གྱི་བདེ་འཇགས་དང་ཕན་ནུས་ཁག་ཐེག་བྱ་རྒྱུ་ནི་ཤིན་ཏུ་གལ་ཆེའོ།།
རྩོམ་སྒྲིག་པ། སངས་རྒྱས་འཚོ།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།