中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > ཚན་རྩལ་ཤེས་བྱ། >
༄༅།། ནད་དུག་ཅན་གྱི་མཆིན་ཚད་འགོག་བཅོས་བཟང་བོ་བྱ་དགོས།
དུས་ཚོད།2021-06-02 15:28:02     རྩོམ་གྱི་ཡོང་ཁུངས། ཀན་ལྷོའི་གསར་འགྱུར།    ཆུང་། | འབྲིང་། | ཆེ།
    ནད་དུག་ཅན་གྱི་མཆིན་ཚད་ཅེས་པ་ནི་ནད་དུག་མང་བོ་ཞིག་གིས་བསླངས་པའི་མཆིན་པར་གནོད་པ་ཆེས་ཆེ་བའི་འགོས་ནད་ཅིག་ཡིན། ནད་དུག་ཅན་གྱི་མཆིན་ཚད་ལ་ངོ་བོའི་སྒོ་ནས་དབྱེ་ན་མཆིན་ཚད་ཀ་པ་དང་མཆིན་ཚད་ཁ་པ། མཆིན་ཚད་ག་པ། མཆིན་ཚད་ང་པ། མཆིན་ཚད་ཅ་པ་བཅས་རིགས་ལྔ་ཡོད་པ་ལས། སྔོན་མ་གསུམ་ནི་རྒྱུན་མཐོང་གི་ནད་དུ་གཏོགས་པས། སྔོན་འགོག་བྱེད་པར་མཉམ་འཇོག་བཟང་བོ་བྱ་དགོས་པ་སྟེ།
    1.མཆིན་ཚད་ཀ་པ། མཆིན་ཚད་ཀ་པ་ནི་མཆིན་ཚད་ཀ་པའི་ནད་དུག་ལས་བྱུང་བའི་བྲེལ་གཤིས་འགོས་ནད་ཅིག་ཡིན། དེ་ནི་འཇུ་ལམ་བརྒྱུད་དེ་འགོས་པའི་ནད་རིགས་ཤིག་ཡིན་པས། མཉམ་དུ་ཟ་མ་བཟའ་བ་དང་ཟས་སྣོད་མཉམ་སྤྱོད་བྱེད་པ་སོགས་འཚོ་བའི་འབྲེལ་འདྲིས་བརྒྱུད་དེ་ཕན་ཚུན་ལ་འགོ་བ་དང་། ནང་སྒོས་སུ་མཆིལ་མ་དང་ལུད་པ། དེ་མིན་ད་རུང་རྒྱུན་སྤྱོད་ཀྱི་དངོས་པོ་སྟེ་སོ་འདྲད་དང་ཁ་སྤུ་བཞར་གྲི་སོགས་ལས་ཀྱང་མཆིན་ཚད་ཀ་པའི་ནད་དུག་འགོ་སྲིད་པས། རྒྱུན་དུ་འབྲེལ་འདྲིས་བྱེད་བཞིན་པའི་མི་ལ་མཆིན་ཚད་ཀ་པའི་ནད་དུག་འགོས་ཡོད་པ་ཤེས་རྗེས། མྱུར་དུ་དཀར་ཡོལ་དང་ཐུར་མ་ཟུར་དུ་བཀར་ཏེ་དུག་སེལ་ཡང་ཡང་བྱས་ནས། ཉེ་འགྲམ་གྱི་མི་ལ་འགོ་བ་སྔོན་འགོག་བྱ་དགོས།
    མཆིན་ཚད་ཀ་པའི་ནད་བྱུང་རྗེས་གྲང་ངར་ལ་སྐྲག་པ་དང་ལུས་པོར་ཚ་རྒྱས་པ། ལུས་ལ་ཤུགས་མེད་པ། ཟས་ལ་ཡི་ག་མེད་པ། སྣུམ་ལ་ཞེན་ཁ་ལོག་པ། སྐྱུག་མེར་ལངས་པ། གསུས་པ་ན་བ། མཆིན་པའི་བྱེད་ནུས་རྒྱུན་ལྡན་མིན་པ་སོགས་ཀྱི་ནད་རྟགས་མངོན་ཞིང་། ཚབས་ཆེ་བའི་སྐབས་སུ་མིག་དང་སྐྱི་པགས་སེར་བོར་འགྱུར་བ་རེད།
    མཆིན་ཚད་ཀ་པ་སྔོན་འགོག་བྱ་དགོས་ན་དུས་རྒྱུན་གྱི་འཚོ་བའི་ཁྲོད་གཙང་སྦྲར་དོ་སྣང་ལེགས་པོ་བྱས་ཏེ། ནད་རིགས་ཁ་ནས་འཛུལ་བ་སྔོན་འགོག་བྱ་དགོས། ཟས་རིགས་དྲོད་ཚད་མཐོན་པོས་བསྲོ་དགོས་ལ། སྤྱིར་བཏང་གིས་ཏུའུ 100ཡི་ནང་དུ་སྐར་མ་གཅིག་ལ་བསྲོས་ན་མཆིན་ཚད་ཀ་པའི་ནད་དུག་གི་གསོན་ཤུགས་མེད་པར་བཟོ་ཐུབ། གཞན་ད་རུང་རྗེན་ཟས་དང་ཡང་ན་ཚོས་ཡག་མིན་པའི་ཆུ་ཐོན་ཟས་རིགས་གཏན་ནས་བཟའ་མི་རུང་བ་དང་། ངལ་དུབ་འབྱུང་མི་རུང་བ་དང་ཆང་གཏན་ནས་འཐུང་མི་རུང་ལ། མཆིན་པར་གནོད་པའི་སྨན་རྫས་བརྟེན་མི་རུང་།
    2.མཆིན་ཚད་ཁ་པ། མཆིན་ཚད་ཁ་པ་ནི་མཆིན་ཚད་ཁ་པའི་ནད་དུག་གིས་བསླངས་པའི་འགོས་ནད་ཅིག་ཡིན། མཆིན་ཚད་ཁ་པའི་ནད་དུག་འགོས་རྗེས། དལ་གྱིས་རེད་པའི་རྣམ་པར་གྱུར་ཏེ། མཆིན་པར་བསྟུད་མར་གནོད་འཚེ་ཐེབས་ངེས་པས། ཡུན་གྱིས་མཆིན་པ་སྲ་འགྱུར་དང་མཆིན་པའི་འབྲས་སྐྲན་དུ་འགྱུར་བ་རེད། མཆིན་ཚད་ཁ་པ་དེ་འགོག་སྨན་བརྒྱག་པ་དང་ཡང་ན་བྱེད་ཐབས་གཞན་པ་སྤྱད་དེ་སྔོན་འགོག་བྱེད་ཆོག
    མི་མང་ཤོས་ལ་མཆིན་ཚད་ཁ་པའི་ནད་དུག་འགོས་རྗེས། ནད་རྟགས་གང་ཡང་མི་མངོན་པར་གནས་སྲིད་པ་དང་། མི་ཁ་ཤས་ལ་ནད་རྟགས་ཡོད་པ་སྟེ། གཙོ་བོ་ལུས་ལ་ཤུགས་མེད་པ་དང་ཟས་ལ་ཡི་ག་མེད་པ། གསུས་ཁོག་མི་བདེ་བ་བཅས་དང་། ནད་པ་ཉུང་ཤས་ཤིག་ལ་ད་རུང་ཞེ་མེར་བ་དང་སྐྱུག་མེར་ལངས་པ་རེད། མཁྲིས་སེར་མེད་པ་དང་མཁྲིས་སེར་ཡང་མོ་ཡོད་པ་ལ། བརྟག་དཔྱད་བྱེད་སྐབས་མཆིན་པ་སྐྲངས་པའམ་ཡང་ན་མནན་ན་གཟེར་བ། མཚེར་བ་སྐྲངས་པ་དང་། མི་ཉུང་ཤས་ལ་ད་རུང་མཆིན་ཁུག་ན་བ་སོགས་ཀྱི་ནད་རྟགས་འབྱུང་།
    མཆིན་ཚད་ཁ་པ་ནི་ཁྲག་དང་མ་བུ། འཁྲིག་སྤྱོད་བཅས་རྣམ་པ་གསུམ་བརྒྱུད་དེ་འགོ་བ་རེད། དུས་རྒྱུན་འཚོ་བའི་ཁྲོད་ཀྱི་ཁྲག་མི་འདྲེས་པའི་འབྲེལ་འདྲིས་གཞན་པ་ཡིས་ཕན་ཚུན་ལ་འགོ་མི་སྲིད། མཆིན་ཚད་ཁ་པའི་ནད་དུག་ཡོད་མཁན་གྱིས་བྱ་བ་དང་འཚོ་བ། སློབ་སྦྱོང་། སྤྱི་ཚོགས་བྱ་འགུལ་བཅས་ཀྱི་ཁྲོད་མཐའ་འཁོར་གྱི་མི་དང་ཁོར་ཡུག་ལ་འཇིགས་སྐུལ་གང་ཡང་ཐེབས་མི་སྲིད་པས། རྒྱུན་ལྡན་ལྟར་སློབ་སྦྱོང་དང་ལས་ཞུགས་བྱས་ཏེ་འཚོ་བ་རོལ་ཆོག
    3.མཆིན་ཚད་ག་པ། མཆིན་ཚད་ག་པ་ནི་མཆིན་ཚད་ག་པའི་ནད་དུག་ལས་བསླངས་པའི་བྲེལ་གཤིས་དང་དལ་གཤིས་གཉིས་འཛོམས་ཀྱི་འགོས་ནད་ཅིག་ཡིན། མཆིན་ཚད་ག་པའི་ནད་པ་མང་བོ་ཞིག་རིམ་གྱིས་དལ་གཤིས་གཉན་ཚད་དུ་གྱུར་ཏེ་ནད་རྟགས་གང་ཡང་མེད་ལ། མཆིན་པའི་བྱེད་ནུས་ཀྱང་རྒྱུན་ལྡན་ཡིན་མོད། འོན་ཀྱང་ནད་གཞི་སྔར་བཞིན་འཕེལ་ཞིང་སྔར་བཞིན་མཆེད་དེ། རིམ་གྱིས་མཆིན་པ་སྲ་འགྱུར་དང་མཆིན་པའི་འབྲས་སྐྲན་དུ་འགྱུར་བ་རེད།
    མཆིན་ཚད་ག་པ་ནི་ཧ་ཅང་འགོ་སླ་བའི་ནད་རིགས་ཤིག་ཡིན་ལ། མིག་སྔར་གོ་ཆོད་པའི་འགོག་སྨན་གཅིག་ཀྱང་མེད། གཙོ་བོ་ཁྲག་རྒྱག་པ་དང་ཁབ་ཀྱིས་གཙག་པ། འཁྲིག་སྤྱོད། མ་བུའི་བར་འགོ་བ་ལས། ཁྲག་དང་མི་འདྲེས་པའི་འབྲེལ་འདྲིས་གཞན་དག་ལས་འགོ་མི་སྲིད།
    གལ་ཏེ་ཁྲག་རྒྱག་པ་དང་ཁྲག་བཟོས་དངོས་པོ་རྒྱག་དགོས་པ་བྱུང་ན། ངེས་པར་དུ་ཚད་ལྡན་གྱི་ཁྲག་རྒྱུན་ས་ཚིགས་སུ་སོང་ནས་རྒྱག་པ་དང་། ཐེངས་གཅིག་ཅན་གྱི་སྨན་ཁབ་བདམས་ཏེ་རྒྱག་དགོས་ལ། ཁ་སྦུག་དང་འཇུ་བྱེད་མ་ལག་སོགས་ཀྱི་བརྟག་དཔྱད་བྱེད་སྐབས་ཚད་ལྡན་གྱི་སྨན་ཁང་དུ་འགྲོ་དགོས་པར་མ་ཟད། རྣ་བར་བུ་ག་བཏོད་པ་དང་ལུས་སྟེང་དུ་རི་མོ་འབྲི་བ། སྨིན་མ་གཙག་པ་སོགས་ཀྱི་སྐབས་སུའང་ཚད་ལྡན་གྱི་མཛེས་བཟོ་ཁང་དུ་འགྲོ་དགོས། དེ་ལས་གཞན་ད་རུང་སོ་འདྲད་དང་ཁ་སྤུ་བཞར་གྲི་སོགས་རྒྱུན་བཀོལ་ཡོ་བྱད་མཉམ་བཀོལ་བྱ་མི་རུང་བ་དང་། དུས་རྒྱུན་དུ་ཆང་མི་འཐུང་བ་དང་དུ་བ་འཐེན་མི་རུང་ལ། ངལ་དུབ་མི་འབྱུང་བར་བྱ་དགོས།།
རྩོམ་སྒྲིག་པ། སངས་རྒྱས་འཚོ།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།