༄༅།། གློ་ཚད་ནད་ཀྱི་བདེ་སྲུང་རྒྱུན་ཤེས། - ཚན་རྩལ་ཤེས་བྱ། - མདོ་ལྷོ་དྲ་བ།-甘南香巴拉在线
  中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > ཚན་རྩལ་ཤེས་བྱ། >
༄༅།། གློ་ཚད་ནད་ཀྱི་བདེ་སྲུང་རྒྱུན་ཤེས།
དུས་ཚོད།2021-07-22 16:14:33     རྩོམ་གྱི་ཡོང་ཁུངས། ཀན་ལྷོའི་གསར་འགྱུར།    ཆུང་། | འབྲིང་། | ཆེ།
    གློ་ཚད་ཀྱི་ནད་སློང་བའི་རྒྱུ་རྐྱེན་གཙོ་བོ་ནི། རླུང་དང་མཁྲིས་པ། བད་ཀན། ཁྲག་དང་ཆུ་ཁམས་འཁྲུགས་པ་བཅས་དང་ཡང་ན་ཚ་སྐྱུར་རུལ་སུངས་ཀྱི་ཟས་བསྟེན་པ། ཟོ་མར་དང་ཚྭ་ཁུའི་ཟས་ཟ་བ། ཐ་མག་འཐེན་པ། ཆམ་རིམས་མ་བཅོས་པར་འགོར་ནས་ལུས་ཡོངས་སུ་འགྲམས་པ། དྲག་ཤུལ་གྱི་ལས་རྒྱུན་རིང་བྱས་པ་སོགས་ཀྱིས་སློང་བར་བྱས་ལ་དེང་སང་རྒྱུན་མཐོང་གི་ནད་རིགས་ཤིག་ཡིན། གློ་ཚད་ཀྱི་ནད་ལ་ཚ་སུབས་དང་ཚ་གཟེར་གཉིས་ཡོད།
    1.དམིགས་བསལ་གྱི་ལྟ་དཔྱད་བྱ་དགོས་པ།
    (1)ཁྲག་ཤེད་དང་དྲོད་ཚད། རྩའི་འཕར་གྲངས། དབུགས་གྲངས་བཅས་ཚེ་སྲོག་གི་མངོན་རྟགས་བཞིའི་འགྱུར་ལྡོག་ལ་བརྟག་པ། (2)ནད་པའི་སེམས་ཀྱི་འདུ་ཤེས་དང་ཤེས་པ་རྨོངས་བག་ཡིན་མིན། གཉིད་ལྗིད་མོར་ཡུར་བ་དང་སེམས་ཁམས་མི་བདེ་བ་ཡོད་མེད་བཅས་ལ་བརྟག་པ། (3)བརྒྱལ་གཟེར་གྱི་སྔོན་རྟགས་ཡོད་མེད་ལ་བརྟག་པ་སྟེ། དཔེར་ན། སེམས་ཁམས་གཞི་ནས་མི་བདེ་བ། ཚོར་སྣང་རྟུལ་བ། གཅིན་བོངས་ཉུང་དུ་ཕྱིན་པ་བཅས་ལ་བརྟག་དགོས། (4)ནད་པའི་ཁ་ལུད་ཀྱི་མདོག་དང་སྤུས་ཀ མང་ཉུང་གི་འགྱུར་ལྡོག་ལ་མཉམ་འཇོག་བྱེད་པ། (5)སྨན་རིགས་སྣ་ཚོགས་ཀྱི་ནུས་པ་དང་ཞོར་སྐྱོན་ལ་ཞིབ་ཏུ་བརྟག་པ།
    2.གློ་ཚད་ནད་ཀྱི་ནད་ཐོག་མངོན་ཚུལ།
    (1)ཚ་སུབས་ཀྱི་ནད་རྟགས། ལྟག་པ་སྐྲངས་རྒྱས་བྱེད་པ། ཁ་ལུད་ནང་དུ་མཁྲིས་ཁུ་འདྲེས་ཤིང་ཚྭ་ཁུ་བྲོ་བ། ལྦུ་སུབ་ཆེ་བ། སྟོན་དུས་སུ་འགུལ་སྐྱོད་དྲག་པོ་བྱས་རྗེས་ལྡང་བ། སྣུམ་ལྡན་གྱི་ཟས་རིགས་བསྟེན་དུས་ནད་བབ་དང་བསྟུན་ནས་ཇེ་སྡུག་ཏུ་འགྲོ་བ། (2)ཚ་གཟེར་གྱི་ནད་རྟགས། མཚམས་སུ་བྲང་ཁ་རུ་གནོན་གཟེར་རྒྱག་པ། དབུགས་གྱེན་ལྡོག་ཏུ་འཚངས་པ། གན་རྐྱལ་དུ་ཉལ་མི་ཐུབ་པ། ལུད་པ་དམར་སེར་དུ་ལུ་བ། མདོར་ན། གློ་བ་ནི་བད་ཀན་གྱི་ཡུལ་ཡིན་པས་དབྱར་དུས་ཅུང་བདེ་ལ། དགུན་དུས་ན་བ། ཉིན་མོར་བདེ་ཞིང་མཚན་མོར་ན་བའི་རྒྱུ་རྐྱེན་ནི། བད་ཀན་གྲང་བ་ཡིན་པས་ཚ་བར་ཞེན་ཞིང་གྲང་བར་རྒོལ་བ་ཡིན།
    3.ནད་གཡོག་བྱ་ཐབས།
    (1)ཟས་ཀྱི་ནད་གཡོག་བྱ་ཐབས། ཆུ་མང་དུ་འཐུང་བ། ཟས་རིགས་དྲོད་བཅུད་ལྡན་པ་ཟ་བ་སྟེ། དཔེར་ན། ཚྭ་ཚོད་དང་ཙོང་སྒོག་པ། སྐམ་སའི་གྲོ་དང་རུས་ཐང་། ལུག་ཤ མར་གསར་དང་བ་ཡི་འོ་མ་སོགས་བསྟེན་དགོས། (2)བྱ་བ་སྤྱོད་ལམ་གྱི་ནད་གཡོག་བྱ་ཐབས། དྲོ་ཞིང་ཉི་འོད་འཕྲོ་བའི་གནས་སུ་འདུག་ཅིང་རླུང་བསིལ་བུ་ཡོད་སར་འདུག་མི་རུང་བ། མལ་ཆས་གཙང་ཞིང་སྐམ་ཆ་ལྡན་དགོས་པ། ཁ་དང་པགས་པའི་གཙང་སྦྲ་ཆེ་བ། གཉིད་ཚིམ་པར་ཉལ་བ། གྲོགས་ཉེ་དང་ཁ་བརྡ་ལྷུག་པོར་བྱས་ནས་ཡིད་སྐྱོ་བའི་རྣམ་པ་བསྒྱུར་བ། སེམས་དགའ་བའི་འདུ་ཤེས་རྒྱུན་འཁྱོངས་གང་ཐུབ་བྱེད་པ།
    4.ཁོང་སྨན་གཏོང་ཚུལ་ཕྱོགས་སྟོན་བྱེད་པ།
    གློ་ཚད་ཡོད་པའི་ནད་པ་ལ་ཁོང་སྨན་དུ་ཙན་དན་བརྒྱད་པ་དང་གློ་ཚད་ཀུན་སེལ། ཅུ་གང་ཉེར་ལྔ་བཅས་བསྟེན་ལ་སྨན་འཐུང་བའི་དུས་སུ་ཟས་སྐྱུར་གྲང་དང་རུལ་སུངས། ཁ་ཚ་བ། སྣུམ་བག་རྣམས་སྤངས་ལ། དུ་ཆང་བསྟེན་མི་རུང་།
    5.ཕྱི་ནད་གསོ་བཅོས།
    ཚ་གཟེར་གྱི་ནད་པ་ཡིན་ན་གཏར་ཁ་དང་བཤལ་ཆུ་གྲང་ཕུ་བ་སོགས་བྱེད་ཆོག(དྲུག་མགོ་དང་རུ་ཐུང་། སྣོད་ཀ་གཏར་ཞིང་དུགས་ནི་མཚན་དཀར་སྲོ་ལོ་དཀར། བ་ཞོ་སྦྱར་བ་གཟེར་སྟེང་གླན། ཡང་ན་ཀྱི་ལྕེ་དཀར་པོ་བ་ཞོ་སྦྱར་ཏེ་གཟེར་སྟེང་གླན།)
    6.སྤྱོད་ལམ་ཕྱོགས་སྟོན།
    (1)སེམས་དགའ་བ། སེམས་གཡོ་ཆེན་པོ་མེད་པ། དཀའ་ངལ་ཚད་མེད་མ་བྱུང་བ་བྱ་རྒྱུ། (2)ནད་པའི་གཟུགས་ཁམས་ལ་གཞིགས་ནས་འགུལ་སྤྱོད་ཚད་མཐུན་བྱེད་པ། ལུས་སྲ་བརྟས་སུ་གཏོང་བ། (3)དབྱར་སྟོན་གྱི་དུས་སུ་ཉི་འོད་འོག་ཏུ་ཤར་མར་བསྲོ་མི་རུང་བ། བརླན་གཤེར་ཡང་ཆེ་རུ་མི་འཇུག (4)དུས་བཞིའི་མཚམས་ཀྱི་ཉི་མ་ལྡོག་དུས་ལུས་ཕུང་གྲང་ནས་ཆམ་ནད་ཕོག་ཏུ་མི་འཇུག་པ། (5)གློ་ཡུ་སོགས་སྟེང་གི་དབུགས་ཀྱི་བརྒྱུད་ལམ་ལ་ནད་མི་འགོ་བར་སྔོན་འགོག་བྱེད་པ། ནད་པ་མི་མང་འདུ་འཛོམས་ཆེ་བའི་གནས་སུ་མི་འགྲོ་བ། ནད་རིམས་གཞན་དང་འགོས་རེས་བྱེད་དུ་མི་འཇུག་པ་བཅས་སོ།།
རྩོམ་སྒྲིག་པ། སངས་རྒྱས་འཚོ།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།