བདེ་བ་དང་སྡུག་བསྔལ་ནི་རང་གི་སྔོན་མའི་ལས་ལས་བྱུང་བ་ཡིན། ལས་ཞེས་པ་འདི་ཚིག་སྒྲུབ་ཐུང་ངུ་གཅིག་གི་ནང་འགྲེལ་བཤད་བྱེད་ཐུབ་པ་སྟེ། ལས་བཟང་བོ་བྱས་ན་ཡག་པོ་དང་། ངན་པ་བྱས་ན་སྡུག་པོ་ཡོང་བ་དེ་ཡིན། ཀརྨ་ཞེས་པའི་ལེགས་སྦྱར་སྐད་ཀྱི་ཚིག་དེ་ལས་གོ་གི་ཡོད། ལས་གསོག་ཚུལ་གྱི་ཆ་ནས་བཤད་ན། ལུས་ངག་ཡིད་གསུམ་གྱི་ལས་གསུམ་དང་། དེ་དག་གི་འབྲས་བུའི་ཆ་ནས་བཤད་ན། ལས་ལ་དགེ་བ་དང་། མི་དགེ་བ། ལུང་མ་བསྟན་བཅས་གསུམ་ཡོད། དུས་ཀྱི་ཆ་ནས་ལས་ལ། ལས་ལ་འཇུག་རྒྱུའི་བསམ་བློ་གཏོང་བའི་སྐབས་ཀྱི་སེམས་པའི་ལས་དང་སེམས་པ་དེས་བསྐྱེད་པའི་ལུས་ངག་གི་བྱ་བར་དངོས་སུ་ཐོན་པའི་བསམ་པའི་ལས་བཅས་རིགས་གཉིས་ཡོད། དཔེར་ན། ང་ཚོས་ཀུན་སློང་ཞིག་ལ་བརྟེན་ནས་སྐད་ཆ་བཤད་བཞིན་པ་དང་། དེ་གའི་ཐོག་ནས་ངག་གི་ལས་སམ་ཀརྨ་གསོག་གི་ཡོད། ང་ཚོའི་ལག་པའི་གཡོ་འགུལ་གྱི་ཐོག་ནས་ལུས་ཀྱི་ལས་ཀྱང་གསོག་གི་ཡོད། ལས་འདི་དག་བཟང་ངན་གང་དུ་འགྱུར་མི་འགྱུར་ནི་རྩ་བ་རང་གི་ཀུན་སློང་ལ་རག་ལས་ཡོད། གལ་ཏེ་བསམ་པ་རྣམ་དག་དང་། གུས་བརྩི། གཞན་ལ་བརྩེ་བའི་ཀུན་སློང་བཟང་བོ་བཅས་ཀྱི་ཐོག་ནས་བཤད་པ་ཡིན་ན་ལས་བཟང་བོ་དང་། དགེ་བར་འགྱུར་ལ། གལ་ཏེ་ང་རྒྱལ་དང་ཞེ་སྡང་། གཞན་ལ་སྐྱོན་བརྗོད་ལ་སོགས་པའི་ཀུན་སློང་ངན་པ་ཞིག་གི་ཐོག་ནས་བྱས་པ་ཡིན་ན། དེའི་ལུས་ངག་གི་ལས་རྣམས་མི་དགེ་བར་འགྱུར་གྱི་ཡོད། དེར་བརྟེན་ལས་ནི་དུས་རྟག་ཏུ་གསོག་བཞིན་པ་ཡིན། མི་ཞིག་གིས་ཀུན་སློང་བཟང་བོའི་ཐོག་ནས་སྐད་ཆ་བཤད་པའི་སྐབས་སུ་འཕྲལ་གྱི་འབྲས་བུ་ལྟ་བུར་རང་གི་ཉེ་འཁོར་གྱི་མི་རྣམས་གྲོགས་པོའི་རྣམ་པར་གྱུར་ཞིང་། དེ་བཞིན་ལས་དེས་རང་གི་སེམས་ཀྱི་སྟེང་དུ་བག་ཆགས་བཞག་སྟེ། མ་འོངས་པར་ཡང་བདེ་བ་འབྱིན་པར་བྱེད་ཀྱི་ཡོད། དེ་ལས་ལྡོག་སྟེ་ཀུན་སློང་ངན་པ་ཞིག་གི་ཐོག་ནས་བཤད་ན་དེ་མ་ཐག་ཏུ་རང་གི་ཉེ་འཁོར་རྣམས་དགྲ་བོའི་རྣམ་པར་གྱུར་པ་མ་ཟད། མ་འོངས་པ་ལའང་རང་ལ་སྡུག་བསྔལ་འབྱིན་པར་བྱེད་ཀྱི་ཡོད། སངས་རྒྱས་ཀྱིས་བདག་ཉིད་བདག་གི་མགོན་ཡིན་པ་དང་། ཐམས་ཅད་རང་སེམས་ལ་རག་ལས་ཡོད་པར་གསུངས་ཤིང་། དེས་བདེ་བ་དང་སྡུག་བསྔལ་ཞེས་པ་དེ་ཕྱི་ནས་བྱུང་བ་མ་ཡིན་པར། རང་རྒྱུད་ཀྱི་དགེ་བ་དང་མི་དགེ་བའི་ལས་ལས་འབྱུང་བར་བཤད་ཀྱི་ཡོད། ལྟ་བ་འདི་ཉིན་རེའི་འཚོ་བའི་ནང་བེད་སྤྱོད་ཆེན་པོ་ཡོད། གང་ཡིན་ཞེ་ན་ལས་འབྲས་ཀྱི་རྣམ་གཞག་ལ་ཡིད་ཆེས་ཡོད་ཕྱིར། ཕྱིའི་ཉེན་སྲུང་བ་ཡོད་མེད་ལ་མ་ལྟོས་པར་རང་ཉིད་དུས་རྟག་ཏུ་བློ་བསྒྲིམས་ནས་སོ་སོར་ཞུ་དག་གཏོང་གི་ཡོད། དཔེར་ན། འདིར་དངུལ་གང་འཚམས་ཞིག་དང་། ཡང་ན་རིན་པོ་ཆེ་རྩ་བ་ཆེན་པོ་ཞིག་ཡོད་པ་གཞིར་བྱས། གཡས་གཡོན་ལ་མི་སུ་ཡང་མེད་ན། སྤྱིར་བཏང་དེ་ལས་སླ་བོ་བྱས་ནས་འཁྱེར་ཐུབ། དེ་ལྟ་ན་ཡང་ལས་འབྲས་ཀྱི་ལྟ་བ་ལ་ཡིད་ཆེས་ཡོད་ན། རང་ཉིད་ཀྱི་མ་འོངས་པའི་འགན་ཡོངས་རྫོཊ་རང་ཉིད་ཀྱིས་འཁུར་དགོས་དུས་དེ་འདྲ་གཏན་ནས་འཁྱེར་མི་སྲིད། དེང་དུས་ཀྱི་སྤྱི་ཚོཊ་ནང་། ཡར་ཐོན་ཆེ་བའི་དེང་དུས་ཀྱི་འཕྲུལ་ཆས་ལྡན་པའི་ཉེན་སྲུང་བའི་ལམ་སྲོལ་ཡང་རྩེར་སོན་པ་ཞིག་ཡོད་ནའང་མི་ཚོས་ད་དུང་ཡང་འཇིགས་བསྐུལ་དྲག་སྤྱོད་ཀྱི་ལས་ལ་འཇུག་ཐུབ་ཀྱི་ཡོད། ཕྱོཊ་གཅིག་ལ་ཕྱོགས་གཞན་པ་དེ་བསྲུང་རྒྱུའི་ཐབས་བྱུས་ཡང་རྩེར་སོན་པ་དུ་མ་ཞིག་ཡོད་རུང་། ཕྱོཊ་གཞན་པ་དེ་ལ་རྙོག་དྲ་བཟོ་བའི་ཐབས་བྱུས་དེ་བས་ངན་པ་མང་བོ་ཡོད། དེས་ན་སྟངས་འཛིན་ངོ་མ་ནི་རང་ཉིད་ཀྱི་མ་འོངས་པའི་འགན་ཁུར་གྱི་བསམ་བློ་དང་། གཞན་གྱི་བདེ་དོན་ལ་ཕན་སེམས་བྱེད་པའི་ནང་བསམ་བློའི་འཁྱེར་སོ་ཞིག་ལས་ཡོང་དགོས་པ་ཡིན། ངོ་མའི་ལག་ལེན་ནས་བཤད་ན། ནག་ཉེས་ཀྱི་བྱ་སྤྱོད་འགོག་སྲུང་བྱེད་པའི་ཐབས་ཤེས་མཆོག་ཏུ་གྱུར་པ་ནི། རང་ཉིད་སྟངས་འཛིན་བྱ་རྒྱུ་འདི་ཡིན། ནང་སེམས་ཀྱི་འགྱུར་བའི་ཐོག་ནས་ནག་ཉེས་ཀྱི་བྱ་སྤྱོད་རྣམས་བཀག་སྟེ་སྤྱི་ཚོགས་ནང་ཞི་བདེ་སྤེལ་ཐུབ། རང་ཉིད་ཞུ་དག་བྱེད་རྒྱུ་ནི་གལ་ཆེ་ཤོས་ཡིན། དེས་ན་རང་ཉིད་ཀྱི་འགན་རང་ཉིད་ཀྱིས་འཁུར་དགོས་པར་གསུངས་པའི་ནང་བའི་ལྟ་བ་འདིར་ཕན་ཐོཊ་ཆེན་པོ་ཡོད། གང་ཡིན་ཞེ་ན་འདིས་རང་གཞན་གཉིས་ཀའི་ཁེ་ཕན་གྱི་དོན་དུ་རང་ཉིད་ལ་བརྟག་དཔྱད་དང་སྟངས་འཛིན་བྱ་དགོས་པ་བསྟན་ཡོད།
ལས་ཀྱི་འབྲས་བུ་ལ་རིགས་མི་འདྲ་བ་དུ་མ་ཞིག་གསུངས་ཡོད་པ་ལས། གཅིག་ལ་རྣམ་སྨིན་གྱི་འབྲས་བུ་ཟེར། དེ་ནི་མི་ཞིག་མི་དགེ་བའི་ལས་ཀྱི་དབང་གིས་ངན་འགྲོ་དུད་འགྲོ་ལྟ་བུའི་སྐྱེ་བ་བླངས་པའི་སྐྱེ་བ་ལྟ་བུ་དེ་ཡིན། གཞན་ཞིག་ལ་མྱོང་བ་རྒྱུ་མཐུན་གྱི་འབྲས་བུ་ཞེས་ཟེར། དེ་ནི་སྲོག་བཅད་པའི་ལས་ཀྱི་དབང་གིས་ངན་འགྲོར་སྐྱེས་པའི་རྗེས་སུ་རིམ་གྱིས་སླར་མིར་སྐྱེས་ཀྱང་ཚེ་ཐུང་བར་འགྱུར་བ་དེ་ཡིན། འབྲས་བུ་ཚེ་ཐུང་བ་ཡོང་བ་འདི་གང་ཟག་གཞན་ཞིག་གི་ཚེ་ཐུང་དུ་བཏང་བའི་རྒྱུ་དང་མྱོང་བ་མཐུན་པའི་ཆ་ནས་ཡིན། ཡང་གཞན་ཞིག་ལ་བདག་པོའི་འབྲས་བུ་ཟེར། དེ་ནི་སྲོག་གཅོད་ལྟ་བུའི་མི་དགེ་བའི་ལས་ལ་རང་བཞིན་གྱིས་ཡུལ་མི་སྡུག་པ་རུ་སྐྱེས་ལ། དེར་མ་ཟད་འབྲས་བུ་ཐུན་མོང་དུ་མྱོང་རྒྱུའི་ལས་ཀྱང་ཡོད། དེ་ནི་གང་ཟག་མང་བོ་ཞིག་གིས་སྤྱི་མཐུན་གྱི་ལས་ཤིག་བསགས་ནས་འབྲས་བུ་ཐུན་མོང་དུ་ལོངས་སུ་སྤྱོད་པ་ལྟ་བུའོ། འདིར་བཀོད་པའི་དཔེ་རྣམས་དགེ་བའི་ལས་ལ་ཡང་མཚུངས་པར་སྦྱར་ཆོག་པ་ཡིན། འདིར་ཤེས་པར་བྱ་དགོས་པ་ནི། འདི་ལྟ་བུའི་ལས་ཀྱི་སྐོར་གྱི་ནང་བ་ལྟ་བའི་རྣམ་གཞག་འདིས་མིའི་སྤྱི་ཚོགས་ལ་ཞབས་འདེགས་བཟང་བོ་ཞིག་སྒྲུབ་ཐུབ་ཀྱི་ཡོད། རེ་བ་ནི་ཆོས་ཕྱོགས་ནས་ཡིན་རུང་མིན་རུང་འགྲོ་བ་མིའི་ཡར་རྒྱས་ལ་སྨན་པའི་བསམ་ཚུལ་དང་། ཐབས་ལམ་ཕན་ཐོགས་ཅན་རྣམས་ཕྱོགས་བསྡུས་བྱེད་ཆེད་ང་ཚོས་ཕན་ཚུན་གྱི་ལམ་སྲོལ་རྣམས་ལ་སློབ་
སྦྱོང་བྱ་དགོས།།
རྩོམ་སྒྲིག་པ། ཀླུ་འབུམ་ཚེ་རིང་།
|
