(གཅིག) བརྗོད་བྱའི་དོན་གྱི་ཆ་ནས་དབྱེ་ན།
གཅིག གྲལ་རིམ་འཐབ་རྩོད་མཚོན་པའི་གཞས།
བོད་ཀྱི་སྤྱི་ཚོགས་འདི་ཡང་མི་རབས་ནས་མི་རབས་རིམ་པར་བརྒྱུད་དེ་བཀས་བཀོད་རྒྱུད་འཛིན་གྱི་སྤྱི་ཚོགས་བརྒྱུད་མྱོང་བས། གཞས་ཀྱི་ནང་དུའང་བཀས་བཀོད་རྒྱུད་འཛིན་བཤུ་གཞོག་གྲལ་རིམ་གྱི་ཤུགས་རྐྱེན་དང་བག་ཆགས་གཏིང་ཟབ་མོ་བཞག་ཡོད།
གཉིས། སྲིད་དོན་དང་འབྲེལ་བའི་གཞས།
དེ་ཡང་དབང་སྒྱུར་དཔོན་པོ་ཁག་གིས་སྲིད་དབང་འཕྲོག་རྩོད་བྱེད་པའི་བྱ་སྤྱོད་ངན་པ་དེས་བོད་དམངས་ཁྲོད་དུའང་ཤུགས་རྐྱེན་ངན་པའི་བག་ཆགས་གཏིང་ཟབ་མོ་བཞག་ཡོད་པས། དེར་མཚང་འབྱིན་དང་དགག་རྒྱག་ཐེར་འདོན་བྱས་པ་ཞིག་ཡིན།
གསུམ། རྒྱལ་གཅེས་ཀྱི་རྣམ་པ་མཚོན་པའི་གཞས།
ཕྱིའི་རྒྱལ་ཁབ་ཀྱི་བཙན་འཛུལ་དང་གཉའ་གནོན་བཤུ་གཞོག་ལ་མགོ་བོ་མི་སྒུར་བར། དེ་དག་ལ་ངོ་རྒོལ་དང་འཐབ་རྩོད་ཀྱི་སྙིང་སྟོབས་མཚོན་པར་བྱེད་པའི་གཞས་ལ་ཟེར།
བཞི། ཟུར་ཟ་བྱེད་པའི་གཞས།
སྐད་ཆའི་སྒྱུ་རྩལ་གྱི་ཐབས་ལམ་ལ་བརྟེན་ནས་ཕན་ཚུན་ལ་ཟུར་ཟ་དང་འཕྱ་སྨོད། མཚང་འདྲུ་རེས་བྱེད་པའི་གཞས་ཀྱི་རྣམ་པ་ཞིག་ཡིན།
ལྔ། མཛའ་གཞས།
གཞོན་ནུ་ཕོ་མོའི་སླད་མེད་ཀྱི་བརྩེ་སེམས་དང་རང་དབང་གི་བརྩེ་དུང་ལ་བར་ཆད་བཏང་བའི་སྐྱོ་གདུང་སོགས་མཚོན་ཡོད།
དྲུག ཆང་གཞས།
ཆང་ལ་རོལ་བའི་དགྱེས་སྐྱེམས་སྟོན་མོའི་སྐབས་སུ་གཏོང་བའི་གཞས་ཤིག་སྟེ། དགའ་སྟོན་རྟེན་འབྲེལ་མཚོན་པའི་བསྟོད་ཚིག་གིས་བཞུགས་གྲལ་སྤྱི་ལ་བསྟོད་པའམ་ཁྱིམ་ཚང་དེའི་ཕ་མ་བུ་ཕྲུག་དང་བཅས་པར་བསྟོད་པ། གནས་ཁང་ལ་བསྟོད་པ། ཆང་བཏེགས་མཁན་དང་ཆང་འཐུང་མཁན་གྱི་མི་ལ་བསྔགས་པ། ཆང་གི་ཡོན་ཏན་ལ་བསྔགས་པ་བཅས་ཀྱི་ནང་དོན་ལྡན།
བདུན། ལས་གཞས།
བོད་རིགས་ངལ་རྩོལ་མི་དམངས་ནི་དཔའ་ངར་ལྡན་ཞིང་ལས་ལ་བརྩོན་པ་ཞིག་ཡིན་པས། ལས་རིགས་གང་དང་གང་ལ་དེ་དང་དེ་འབྲེལ་གྱི་གཞས་སྣ་ཚོགས་པ་ཞིག་ཡོད་ཅིང་། དེ་དག་ལས་ལས་ཀ་མྱུར་འགྲུབ་ཡོང་བར་སྐུལ་བ་དང་། ལས་རིགས་ཀྱི་ཤེས་བྱའི་ཉམས་མྱོང་ཕྱོགས་སྡོམ་བྱས་པ་ཞིག་ཡིན།
བརྒྱད། ཚིག་རྒྱག
འདིའང་ཕ་རོལ་གྱི་མཚང་འདྲུ་བའམ་ཚིག་གིས་དགག་པ་སོགས་འགའ་ཤས་གཞས་ལ་གཏོགས་ཤིང་། འགའ་ཤས་གླུ་ཤགས་དང་ཆ་འདྲ་བ་ཞིག་ཡིན།
དགུ མདའ་གཞས།
དེ་ཡང་མདའ་གཞས་ནི་ཉིང་ཁྲིའི་ཡུལ་དུ་དར་ཁྱབ་ཆེ་བའི་དམངས་སྲོལ་གྱི་གཞས་ཤིག་ཡིན་ལ། ཡུལ་དེའི་མི་རྣམས་རི་དྭགས་རྔོན་པ་ལ་མཁས་པས་མདའ་རྩལ་འགྲན་རྒྱུར་ཤིན་ཏུ་དགའ་བོ་ཡོད། མདའ་རྩལ་འགྲན་པའི་ཡར་སྔོན་དུ་མི་རྣམས་ཀྱིས་མདའ་གཞས་རེ་བླངས་ནས་རང་ཉིད་ཀྱི་མདའ་རྩལ་ལ་བསྟོད་པ་བྱས་ཏེ་ཕ་རོལ་གྱི་གཉའ་གཅོག་པར་བྱེད། དེའི་དབྱངས་རྟའི་འགྱུར་ཁུག་དྭངས་ཤིང་གསལ་ལ་གཏོང་བདེ་བ་དང་། ནགས་ཁུལ་གྱི་ཁྱད་ཆོས་ལྡན་ཞིང་སྒྲིག་གཞི་ཆ་ཚང་བ་དང་། དབྱངས་རྟའི་མགྱོགས་ཚད་ཀྱང་འབྲིང་ཙམ་ཡིན་པའི་ཁྱད་ཆོས་མངོན་གསལ་ལྡན།
བཅུ། བྱིས་གླུ།
བྱིས་གླུ་ནི་བྱིས་པ་རྣམས་ཀྱི་ལོ་ཚོད་དང་ཤེས་རིག་གི་ཆུ་ཚད། སེམས་ཁམས། མཛེས་དཔྱོད་ལྟ་བ། སེམས་ཀྱི་དགའ་ཕྱོགས། བསམ་གཞིགས་བྱེད་སྟངས་སོགས་ཀྱི་ཁྱད་ཆོས་དང་ཆོས་ཉིད་གཞིར་བཟུང་ནས་གསར་རྩོམ་བྱས་ཤིང་། ཁོ་ཚོའི་རིག་པའི་བློ་སྒོ་ཕྱེ་བ་དང་ལྕེ་རྩལ་སྦྱོང་བ། ཀུན་སྤྱོད་ཡང་དག་སྲུང་སྐྱོབ་བྱེད་ཆེད་དང་མཉམ་དུ་རྩེད་འཇོ་སྒྱུ་རྩལ་གྱི་སྤྲོ་སྐྱིད་ལ་རོལ་ཐབས་ཤིག་ཡིན།
སྤྱིར་བྱིས་པའི་རྩོམ་རིག་ལ་མཚོན་ནའང་བྱིས་གླུ་དང་ཁེད། གཏམ་དཔེ། གནའ་གཏམ། བྱིས་སྒྲུང་སོགས་ངག་གི་རོལ་རྩེད་སྣ་ཚོགས་པ་ཞིག་མཆིས་པས། དེར་རྩོམ་ལུས་ཆ་ཚང་ཞིང་བརྗོད་བྱ་ཆེས་ཕུན་སུམ་ཚོགས་པ་ཞིག་ཡོད་ལ། བོད་ཀྱི་དམངས་ཁྲོད་རྩོམ་རིག་ཁྲོད་གོ་གནས་ངེས་ཅན་ཞིག་བཟུང་ཡོད་པ་མ་ཟད། ལོ་ཆུང་བྱིས་པ་རྣམས་ཀྱི་བློ་གྲོས་ཀྱི་སྒོ་མོ་འབྱེད་པ་དང་ལྕེ་རྩལ་སྦྱོང་བ། རྒྱུད་བཅོས་པ། ཀུན་སྤྱོད་དང་མཛེས་དཔྱོད་ཀྱི་ལྟ་བ་གང་ལེགས་ཤིག་ཐོག་མ་ཉིད་ནས་གཞི་འདིང་བར་ནུས་པ་བླ་ལྷག་ཏུ་འབྱུང་བཞིན་གདའ།།
རྩོམ་སྒྲིག་པ། ཀླུ་འབུམ་ཚེ་རིང་།
|
