中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > རིག་གནས་སློབ་གསོ། > བོད་ཀྱི་རིག་གནས། >
༄༅།། བོད་ཀྱི་གནའ་མིའི་རུས་ཚན་གྱེས་ཚུལ།
དུས་ཚོད།2017-01-11 15:12:19     རྩོམ་གྱི་ཡོང་ཁུངས། བོད་ལྗོངས་རིག་གནས་དྲ་བ།     ཆུང་། | འབྲིང་། | ཆེ།
     བོད་ཀྱི་གནའ་མི་རྣམས་ཀྱི་རྒྱུད་པ་རིམ་བཞིན་འཕེལ་བ་ལས་བོད་ཀྱི་མིའུ་རིགས་བཞི་ཞེས་སེ་དང་།  རྨུ་དང་།  ལྡོང་དང་།  སྟོང་སྟེ་རུས་ཚན་ཆེན་པོ་བཞི་ཆགས་པ་དང་།  ཡང་དེའི་སྟེང་དབྲ་དང་འབྲུ་གཉིས་བསྣན་པས་མིའུ་རིགས་དྲུག་བྱུང་ཞེས་ཀྱང་གྲགས།
    བོད་ཀྱི་གདོད་མའི་རུས་ཚན་གྱེས་ཚུལ་སྐོར་ལའང་བཤད་སྲོལ་འདྲ་མིན་སྣ་ཚོགས་མཆིས་ཀྱང་།  རུས་ཚན་གྱི་མ་ལག་འདྲེན་ཚུལ་ཅུང་ཆ་ཚང་བ་ཞིག་ལ་འདི་ལྟར་སྣང་སྟེ།  ཕ་སྤྲེལ་རྒན་བྱང་ཆུབ་སེམས་དཔའ་དེའི་རྒྱུད་རིམ་པར་འཕེལ་ཞིང་།  རུས་རིགས་བཞི་རུ་དབྱེ་བ་ལ།  སེ་དང་།  རྨུ། ལྡོང་དང་།  སྟོང་སྟེ་བཞིའོ།
   དེ་ཡང《རྒྱ་བོད་ཡིག་ཚང་ཆེན་མོ 》ལས།  དེའང་སྔོན་དང་བོ།  ཡུལ་དམའ་ཁ་ཤུལ་གཡག་ཞུར་གྱི་གོང་ཁ་བྱ་བར།  སྲིད་པའི་རྒྱལ་བུ་ཐིང་གི་ཞེས་པ་ལ།  བུ་གསུམ་བྱུང་བ།  རྒྱ་བོད་ཧོར་གསུམ་དུ་གྱེས་པའི།  བོད་མི་ཁྲི་དོ་ཆེན་པོ་བྱ་བ་དེ་ལ།  བུ་དྲུག་བྱུང་བ་ནི།  དབྲའ་འབྲུ་ལྡོང་གསུམ་སྒ་དང་བཞི།།  ནུ་བོ་དབས་བརྡའ་གཉིས་དང་དྲུག།  བོད་ཀྱི་མི་རྒྱུད་དྲུག་པོ་དེས།།  དམའ་ཁ་ཤུ་རས་འདེབས་སྟག་པ་དེར།།  བོད་མི་གསུམ་བུ་དྲུག་ས་བགོས་བྱས།།  ལྡོང་གིས་པ་མ་ལེ་པང་ཐོབ།།  དབྲ་ཡིས་དབྲ་མོ་རབ་བཀྲ་ཐོབ།།  འབྲུ་ཡིས་འབྲུ་མོ་ཕྲོམ་ཕྲོམ་ཐོབ།།   སྒ་ཡི་ལྒར་མ་མེ་པོ་ཐོབ།།  དབས་བརྡས་རྒྱ་བོད་ས་མཚམས་སུ།།  མཚམས་ཀྱི་མདའ་དར་གོང་མ་བཟུང་།།  ཞེས་གསུངས་སོ།
    ཕུ་བོ་ལྡོང་གི་རྒྱུད་པ་དང་མངའ་ཁོངས།
   བོད་མི་ཁྲི་དོ་ཆེན་པོ་བྱ་བ་དེའི་ཆུང་མ་རྣམས་ལ་རིམ་བཞིན་བུ་དྲུག་ཏུ་སྐྱེས་པ་དེ་དག་ནང་མ་འཆམས་པའི་སྐབས་སུ།  ཡབ་ཁྲི་དོ་བཙན་པོས་དམའ་ཁ་ཤུ་རབས་འདེབས་ཞེས་པའི་ས་ཆ་དེར་བོས་ནས་ས་བགོས་བྱས་པ་ལ་ཕོ་བོ་ལྡོང་ལ་པ་མ་ལེབ་པང་ཞེས་པའི་ས་ཆ་དེ་ཐོབ།  དེའི་མངའ་ཁོངས་སུ་ཆགས་པའི་མི་རྒྱུད་ལ་ཕོ་བོ་ལྡོང་གི་རུས་རྒྱུད་ཅེས་ཟེར།  དེ་ཡང་ཕུ་བོ་ལྡོང་གི་བཟུང་བའི་ཡུལ་ནི《རུས་མཛོད》ལས་གསལ་བ་ལྟར་ན།  མི་ཉག་གི་ཡུལ་ཏེ་ཁམས་ཀྱི་ཤར་ལྷོ་གཉིས་སུ་གནས་པའི་ཡུལ་གྲུ་འདི་དག་ལ་ཟེར།  དེ་ལ་དབྱེ་བ་དཀར་པོ་ལྡོང་དང་།  ནག་པོ་ལྡོང་།  ཁྲ་བོ་ལྡོང་།  སྨུག་པོ་ལྡོང་སོགས་ཡོད་པར་གྲགས་ལ། 《རྒྱ་བོད་ཡིག་ཚང་ཆེན་མོ 》ལྟར་ན།  ཕུ་བོ་ལྡོང་ལ་མཆེད་དྲུག་ཡོད།།  སྟོད་ན་སྤ་ཚབ་འབྲིང་ཡས་གཉིས།།   བར་ན་རོ་འཛེར་རག་ཤི་གཉིས།། སྨད་ན་མི་ཉག་གྱི་ཐན་གཉིས།།  ཆེ་དྲུག་མཚན་ན་བཙུན་དྲུག་སྟེ།།  བི་རི་འ་མདོ་དང་གླིང་བ་གཉིས།།  རོ་འཛེར་ལ་ཕུ་བ་དང་མདའ་བ་གཉིས།།  གྱི་ཐན་ལ་རྒྱས་བསྡུས་ཆེ་ཆུང་གཉིས་ཞེས་གསལ་བ་ལྟར།  མཆེད་དྲུག་གི་ཁྱབ་པའི་ཡུལ་ནི། སྤ་ཙབ་དང་།  འབྲིང་ཡས།  རོ་འཛེར།  རག་ཤི།  མི་ཉག   གྱི་ཐན་བཅས་ཀྱི་ཡུལ་རྣམས་ཡིན་པ་དང་།  བཙུན་དྲུག་གི་ཁྱབ་ཡུལ་བི་རི་འ་མདོ།  གླིང་བ།  ཕུ་བ།  མདའ་བ།  གྱི་ཐན་རྒྱས་པ།  གྱི་ཐན་བསྡུས་པ་བཅས་ཀྱི་ས་ཆ་རྣམས་ཡིན་ལ།  ས་ཆ་འདི་དག་གཙོ་བོ་མདོ་ཁམས་སྟོད་སྨད་ཀྱི་ཡུལ་གྲུ་རྣམས་ལ་ཟེར་གྱི་ཡོད་དེ།《འབྱུང་རྩིས་ཉེར་མཁོ་བུམ་བཟང》ལས།  ཡང་ན་མདོ་ཁམས་སྨད་འདི་ནི།།  གདོང་ན་ས་ཁམས་ཤ་བ་བླ།།  འབྲུ་ནི་ཆུ་ཁམས་གཡག་ལ་བླ།།  སྦྲ་ནི་ལྕགས་ཁམས་རྐྱང་ལ་བླ།།  སྒ་ནི་མེ་ཁམས་ར་ལ་བླ།།  སྒ་ནི་ཤིང་ཁམས་ལུག་ལ་བླ།།  རུས་པ་གཙང་མར་མ་ཤེས་ན།།  དེ་ཡང་གདོང་ལ་བསྡུ་ཞེས་ཟེར།།  འོན་ཀྱང་མཁྱེན་ལྡན་རྣམས་ཀྱིས་དཔྱོད།།  ཅེས་མདོ་ཁམས་སྟོད་སྨད་དུ་གནས་པའི་མི་རིགས་འདི་དག་སོ་སོའི་སྤྱོད་པ་དང་། གཤིས་ཁ་བཅས་ལ་བརྟགས་ནས་རིགས་རུས་གང་ཡིན་ཞིབ་ཏུ་དཔྱད་དགོས་ཀྱང་། གལ་སྲིད་གསལ་བོར་མ་རྟོགས་པ་ཡིན་ན།  གདོང་གི་ཁོངས་སུ་བསྡུ་ཆོག་སྟེ།  མདོ་ཁམས་ཕྱོགས་ཀྱི་མི་རྣམས་ཕལ་ཆེར་གདོང་གི་རུས་རྒྱུད་ཡིན་པས་ན་དེ་ལྟར་དུ་ངོས་འཛིན་བྱེད་ཆོག་ཅེས་བསྟན་ཡོད་པ་དང་།  གཞན་ཡང་རུས་མཛོད་ཀྱི་ཡིག་ཚང་རྣམས་སུ་ལྡོང་གི་རུས་ཆེན་བཅོ་བརྒྱད།  ཚ་ཆེན་བཅོ་བརྒྱད།  ཤུལ་ཆེན་བཅོ་བརྒྱད་སོགས་སུ་འཁོད་ཡོད་པ་དེ་དག་ལས།  ལྡོང་གི་རུས་ཆེན་བཅོ་བརྒྱད་ནི།  ཡབ་ལྡོང་ཆེན་པོ་སྤོས་དྲི་ཡིན།  དེ་ལས་རུས་རིགས་བཅོ་བརྒྱད་བྱུང་།  ཅོག་དང་ཅོག་ཙེ་ཅོག་རོ་གསུམ།  སླད་ཀྱི་ཞིང་དང་འདྲ་བའི་བུ་གསུམ་ཡིན།  འབྲོང་དང་ཁྲུང་བོ་ཟླ་བ་གསུམ།  དཔྲལ་བའི་མིག་དང་འདྲ་བའི་བུ་གསུམ་ཡིན།།  འབྲིང་དང་ལྷ་ལུང་ལྷ་རྩེ་གསུམ།།  ཉ་དང་ཙེ་སྤང་ལུ་ནག་གསུམ།  ལུས་དང་ཁོག་པ་དང་འདྲ་བའི་བུ་གསུམ་ཡིན།  སྙིང་དང་ཕོ་གོང་ཐག་བཟང་གསུམ།  ཁོག་པའི་སྙིང་དང་འདྲ་བའི་བུ་གསུམ་ཡིན་ཞེས་དང་།  ལྡོང་གི་ཚ་ཆེན་བཅོ་བརྒྱད་ནི།  ཕྱག་ཚ།  རྨོག་ཚ།  མགོ་ཚ།  སྦུ་ཚ།  ཏོག་ཚ། གཡི་ཚ།  ཟངས་ཚ།  རེབ་ཚ།  དཔལ་ཚ།  རྐང་ཚ། གཅན་ཚ།  དོམ་ཚ།  གཤེན་ཚ།  ཚར་ཚ།  བྲག་ཚ།  ཉ་ཚ།  རྒྱ་ཚ་རྣམས་ཡིན་ཞིང་།  ལྡོང་གི་ཤུལ་ཆེན་བཅོ་བརྒྱད་ནི།  སྨན་ཤུལ།  ཡུལ་ཤུལ།  བདུད་ཤུལ།  རག་ཤུལ། ཕན་ཤུལ།  དབལ་ཤུལ།  ཆོས་ཤུལ།  བན་ཤུལ།  མགོན་ཤུལ།  ཕྱག་ཤུལ།  དཔལ་ཤུལ།  ཆུ་ཤུལ།  རི་ཤུལ།  ཉན་ཤུལ།  ཁྱི་ཤུལ།  ལོ་ཤུལ།  འགོ་ཤུལ།  ཡབ་ཤུལ།  རྟ་ཤུལ་རྣམས་ཡིན་ལ།  རུས་མིང་འདི་དག་མདོ་སྨད་ཀྱི་ཡུལ་གྲུ་རྣམས་སུ་དེང་དུས་ཀྱང་ལ་ལ་ནི་ཡུལ་མིང་དུ་འབོད་པ་དང་།  ལ་ལ་ནི་དུད་ཚང་གི་མིང་དུ་འབོད་ཀྱིན་ཡོད།
    སེ་ཁྱུང་སྦྲའི་སྐོར།
   མཐུ་ཆེ་དམ་ཚིག་མི་ཉམས་པ།།  སེ་ཁྱུང་སྦྲ་ཡི་བུ་རྒྱུད་ཡིན།།  ཞེས་པའི་བོད་མི་ཁྲི་དོ་ཆེན་པོའི་བུ་གཉིས་པ་ལ་དབྲ་མོ་རབ་བཀྲ་ཞེས་པའི་ས་ཆ་དེ་ཐོབ་ནས་དེའི་མངའ་ཁོངས་སུ་ཆགས་པའི་མི་རྒྱུད་ལ་སེ་ཁྱུང་སྦྲ་ཡི་རུས་རྒྱུད་ཅེས་ཟེར་ཞིང་། རུས་མཛོད་ལས།  ཡུལ་འདི་ཞང་ཞུང་གི་ཡུལ་ཏེ།  མངའ་རིས་དང་ལ་དྭགས།  གཙང་སྟོད་བཅས་ལ་ཟེར།  དེ་ལ་དབྱེ་བ《རྒྱ་བོད་ཡིག་ཚང་ཆེན་མོ 》ལས།  སེ་དང་དབྲ་ཡི་ཆེ་དྲུག་དེ།།  སྟོད་ན་ཞང་ཞུང་ཁྱུང་བོ་གཉིས།།  བར་ན་མར་བ་སྤུ་རང་གཉིས།།  སྨད་ན་རེ་ཁེ་ཉག་ལེ་གཉིས།།  ཆེ་དྲུག་མཚན་གྱི་བཙུན་དྲུག་དེ།།   ཀྲི་ལ་རྨེ་ཤ་དང་རྨེ་ཚན་གཉིས།།  བྲག་ཏུ་ལ་གྲུ་གུ་དང་རྡོར་ཉེ་གཉིས།།  དེ་ཆེ་བཙུན་སྤེལ་མ་བཅུ་གཉིས་ཡིན།།  ཞེས་གསལ་བ་ལྟར། མཆེད་བཙུན་སྤེལ་མ་བཅུ་གཉིས་ཀྱི་ཡུལ་ནི།  ཞང་ཞུང་དང་། ཁྱུང་བོ།  མར་བ།  སྤུ་རངས།  རེ་ཁེ།  ཉག་ལེ།  རྨེ་ཤ། རྨེ་ཚན།  གྲུ་གུ  རྡོར་ཉེ།  ཁོ་བོ།  ཁོ་དབྲ་བཅས་ཡིན་ཞིང་།  ཞང་ཞུང་དང་ཁྱུང་བོ།  མར་བ་དང་སྤུ་རངས་རྣམས་ནི་དེང་སང་ཡང་མིང་དེ་གར་འབོད་པའི་བོད་ཡུལ་ནུབ་ཕྱོགས་ཀྱི་ས་ཁུལ་འདི་དག་ཡིན་ལ།  གཞན་རྣམས་ཀྱང་བོད་ཡུལ་སྟོད་སྨད་བར་གསུམ་གྱི་ས་གནས་ཁག་ཏུ་ཞིབ་དཔྱད་བྱས་ན་ངེས་པར་རྙེད་ཐུབ་པར་སེམས།
     ཨ་ལྕགས་འབྲུ་ཡི་སྐོར།
   དཔའ་རྒྱ་སྟག་མཆེ་སྡེར་མ་ཉམས་པ།།  ཨ་ལྕགས་འབྲུ་ཡི་བུ་རྒྱུད་ཡིན།།  ཞེས་པའི་ཁྲི་དོ་ཆེན་པོའི་བུ་གསུམ་པ་ཨ་ལྕགས་འབྲུ་ལ་འབྲུ་མོ་ཕྲོམ་ཕྲོམ་ཞེས་པའི་ས་ཆ་དེ་ཐོབ།  དེའི་མངའ་ཁོངས་སུ་ཆགས་པའི་མི་རྒྱུད་ལ་ཨ་ལྕགས་འབྲུ་ཡི་མི་རྒྱུད་ཅེས་ཟེར།  རུས་མཛོད་ལས། སུམ་པའི་ཡ་གྱལ་ཏེ། ཁམས་ཀྱི་ནུབ་བྱང་ཕྱོགས་ཀྱི་ཡུལ་གྲུ་རྣམས་དང་།  ལྷ་སའི་བྱང་ཕྱོགས་ཀྱི་ལུང་བ་འདི་དག་ལ་ཟེར།  དེ་ལ་དབྱེ་བ《 རྒྱ་བོད་ཡིག་ཚང་ཆེན་མོ 》 ལས།  ཁྲི་ཟམ་འབྲུ་ཡི་ཆེ་དྲུག་དེ།།  ཤར་ན་གྱི་དང་རོང་བོ་གཉིས།།  ལྷོ་ན་བྷེ་དང་རི་ཐོ་གཉིས།།  སྨད་ན་འབྲོམ་དང་ངོ་ཀྲོ་གཉིས།།  ཆེ་དྲུག་བཙན་གྱི་བཙུན་དྲུག་དེ།།  སྦས་དང་སྤོས་དང་ཚ་ཕྲོམ་གསུམ།།  ཞུག་པ་སྟོང་ཉེ་ཉེ་སྒ་གསུམ།།  ཆེ་བཙུན་སྤེལ་མ་བཅུ་གཉིས་ཡིན།།  ཞེས་གསལ་བའི་མཆེད་བཙུན་སྤེལ་མ་བཅུ་གཉིས་ནི།  གྱི།  རོང་བོ། བྷེ།  རི་ཐོ།  འབྲོམ།  ངོ་ཀྲོ།  སྦས།  སྤོས།  ཚ་ཕྲོམ།  ཞུགས་པ།  སྟོང་ཉེ།  ཉེ་སྒ་བཅས་བཅུ་གཉིས་པོ་འདི་དག་ཡིན་ལ།  འདི་རྣམས་ནི་བོད་ཡུལ་སྟོད་སྨད་བར་གསུམ་གྱི་ཡུལ་ཐམས་ཅད་ལ་ཐོར་བུ་རུ་གནས་ཡོད་པ་འདྲ་སྟེ། བོད་ཀྱི་ཤར་ཕྱོགས་སུ་གནས་པའི་སྡེ་མང་བོ་ཞིག་ལ་མདོ་ཁམས་རོང་ཆེན་བཅོ་བརྒྱད་ཅེས་ཟེར་སྲོལ་ཡོད་དེ།  རྒྱལ་མོ་རོང་།  ཚ་བ་རོང་།  ཨ་རབ་རོང་།  དགུ་རོང་།  སྟག་རོང་།  འཇང་རོང་ལ་སོགས་པ་རྣམས་ཡིན་ལ།  སི་ཏུ་ཆོས་ཀྱི་འབྱུང་གནས་ཀྱི་རྣམ་ཐར་ལས་མདོ་སྨད་རོང་ཆེན་བཅོ་བརྒྱད་ཀྱི་ཡ་གྱལ་ཨ་རབ་རོང་དུ་སྐུ་འཁྲུངས་ཞེས་འཁོད་ཡོད་པ་ལ་བརྟགས་ན་དེང་སང་སྡེ་དགེའི་སྨད་ཕྱོགས་ཀྱི་ལྕང་ར་མན་དང་ཧོར་བོ་ཡན་གྱི་བར་སྐོར་འདི་ཚོ་ལ་ཨ་རབ་རོང་ཞེས་ཟེར་གྱིན་ཡོད་པར་ངེས།  བེ་དང་རི་ཐོ་གཉིས་རྒྱ་གར་དང་ཉེ་བའི་བོད་ཀྱི་ལྷོ་ཕྱོགས་སུ་ཡོད་པར་གྲགས།  འབྲོམ་ནི་སྟོད་ལུང་ཕུ་འབྲོག་པའི་རུས་མིང་སྟེ། འབྲོམ་སྟོན་པ་རྒྱལ་བའི་འབྱུང་གནས་ཀྱང་དེའི་རུས་ཡིན།
        རྨུ་ཚ་སྒ་ཡི་སྐོར།
   ཕྱུགས་གཡང་མོའི་མཁལ་ཚིལ་མ་ཞུ་བ།།  རྨུ་ཚ་ལྒ་ཡི་བུ་རྒྱུད་ཡིན།།  ཞེས་པའི་ཁྲི་དོ་ཆེན་པོའི་བུ་བཞི་བ་རྨུ་ཚ་ལྒ་ལ་ལྒར་མ་མེ་བོ་ཞེས་པའི་ས་ཆ་དེ་ཐོབ།  དེའི་མངའ་ཁོངས་སུ་ཆགས་པའི་རྒྱུད་པ་ལ་རྨུ་ཚ་ལྒ་ཡི་རུས་རྒྱུད་ཅེས་ཟེར།  རུས་མཛོད་ལས།  འ་ཞའི་ཡུལ་ཏེ།  བྱང་སྒ་བ་ནས་ཤར་རྒྱ་རོང་བར་གྱི་ཡུལ་གྲུ་འདི་དག་ལ་ཟེར།  དེ་ལ་དབྱེ་ན《རྒྱ་བོད་ཡིག་ཚང་ཆེན་མོ》ལས།  རྨུ་ཚ་ལྒ་ཡི་ཆེ་དྲུག་དེ།།  ཐོས་རུས་སྟག་རུས་སྟོད་ན་ཡོད།།  བྱ་ཅན་ཁྲབ་ཅན་སྟོད་ན་ཡོད།།  བྱ་རྗེ་སྤེན་ཐོག་སྟོད་ན་ཡོད།།  ཆེ་དྲུག་མཚན་གྱི་བཙུན་དྲུག་དེ།།  ལྒ་ལ་བྱེས་པ་ཡུལ་བ་གཉིས།།  ལྟག་རུས་ཡུལ་སྟག་འབྲོག་སྟག་གཉིས།།  དབས་ལ་ཆེ་སྐོར་ཆུང་སྐོར་གཉིས།།  ཆེ་བཙུན་སྤེལ་མ་བཅུ་གཉིས་ཡིན།།  ཞེས་གསལ་བའི་མཆེད་བཙུན་སྤེལ་མ་བཅུ་གཉིས་ནི།  ཐོས་རུས་དང་། སྟག་རུས།  བྱ་ཅན།  ཁྲབ་ཅན།  བྱ་རྗེ།  སྤེན་ཐོག་སྟེ་མཆེད་དྲུག་དང་།  བྱེས་པ།  ཡུལ་བ།  ཡུལ་སྟག  འབྲོག་སྟག་ཆེ་སྐོར།  ཆུང་སྐོར་བཅས་བཅུ་གཉིས་པོ་འདི་དག་ཡིན་ལ།  དེ་དག་གཙོ་བོ་བོད་ཡུལ་སྟོད་ཕྱོགས་ཀྱི་ལུང་བ་རྣམས་སུ་ཡོད།
      ནུ་བོ་དབས་བརྡ་གཉིས་ཀྱི་སྐོར།
   དམངས་རིགས་དབལ་ཟླ་གཉིས་ནི།  སྔོན་སྤྲེའུ་བྱང་ཆུབ་སེམས་དཔའ་རང་ཉིད་ཀྱིས་མི་ཚན་བཞིར་བཅད་པ་དེར་རང་ཚན་བཞི་བོ་མ་འདྲེས་པར་བཞག་པ་དེ་ལས་ལྷ་རིགས་དགའ་ནི་སྔར་བཤད་ཟིན་ལ།  དེའི་འཕྲོས་བཞི་ཚན་གྱི་ནང་ནས་མི་ཡ་རབས་ཀྱི་ཡོན་ཏན་དང་སྤྱོད་ཚུལ་ཀུན་ལྡན་བྱང་ཆུབ་སེམས་དཔའ་བློ་ཆེན་ལྡན་གྱི་རིགས་རྣམས་གཙོ་བྱས་ཏེ། དེ་ཡི་མིང་ལ་ལྡོང་དང་།  འབྲུ་དང་སྦྲ་དང་སྒ་བཞི་ནི་གཙོ་བོའི་རིགས་རྣམས་ལ་ཐོགས་ཤིང་རུས་ཆེན་དུ་གྲགས་པ་ཡིན་ལ།  དེའི་འཕྲོའི་རིགས་ཆེན་བཞི་གའི་ལྷག་མ་དམངས་རིགས་ཐམས་ཅད་པོ་བསྡུས་ཤིང་ཚན་གཉིས་སུ་བགོས་ཏེ། གཅིག་ལ་དཔའ་འམ་དབའ་དང་།  གཅིག་ལ་མདའ་འམ་ཟླ་ཞེས་བཏགས་ལ།  བོད་མི་བུ་གདུང་དྲུག་ཟེར་བ་ནི།  མི་བུ་རུས་དྲུག་ཞང་བོ་སྒོ་དང་འདུན་ཞེས་པ་དེ་ཡིན་ལ།  དབའ་ཡི་རིགས་ལ་ཐོག་མའི་ཞང་བོ་དང་།  ཟླ་ཡི་རིགས་ལ་ཚ་བོ་བྱུང་བས།  ཚ་ཞང་གཉིས་ཀྱི་རིགས་ཀྱང་ཟེར་བས་ཚ་ཞང་ཡང་གྲགས་སོ།  དབའ་ཡི་རིགས་ལ་གཡང་དང་འཕེལ་ཚ་སོགས་རུས་མང་བགྲང་ལས་འདས་པ་དག་བྱུང་ལ།  ཟླ་ཡི་རིགས་ལ་འོང་ཁེ་དང་སྨོན་སོགས་ཀྱི་རུས་མང་པོར་འཕེལ་བ་ད་ལྟའི་དམངས་རིགས་ཚ་ཞང་གི་རིགས་འདི་ཐམས་ཅད་ཡིན་ནོ།  ཨ་བོ་ནི་འབྲི་ཡིན་ལ།  བར་ཁམས་སུ་དབུས་དང་ཁད་ཉེ་བ།  སྟོད་ཨ་བོ་ཞེས་དཔའ་བོ་ཞེས་པ་དང་།  མཆོག་ཚང་སྦྲ་ཡིན་ཟེར་བ་གནའ་མིའི་ངག་རྒྱུན་དུ་འདུག་ཀྱང་ཐག་ཆོད་ཀྱི་ཡིག་ཚང་འདྲ་ནི་མ་མཐོང་ངོ་།  གོང་དུ་བཤད་པའི་ནུ་བོ་དབའ་ཟླ་གཉིས་ཀྱི་དགྲ་བླ་ནི་རང་རང་གི་མཚུན་ལྷ་རྣམས་དང་།  དགྲ་བླ་ནི་ཤེལ་ལས་གྲུབ་པའི་ར་སྐྱེས་ཁམ་གཟུགས་དང་།  དུང་ལས་གྲུབ་པའི་ཁྱི་མོ་དཀར་མོ་གཉིས་ཀྱི་གཟུགས་ཀྱི་རུས་ལྷ་དགྲ་ལྷ་དང་།  བོད་ཡུལ་གྱི་ཡུལ་ལྷའི་གཙོ་བོ་རྣམ་གསུམ་དང་།  རང་རང་གི་ཡུལ་གྱི་གཞི་བདག་རྣམས་མཆོད་བསྟོད་ལ་བརྩོན་དགོས་སོ།།
རྩོམ་སྒྲིག་པ། ཀླུ་འབུམ་ཚེ་རིང་།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།