中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > རིག་གནས་སློབ་གསོ། > བོད་ཀྱི་རིག་གནས། >
༄༅།། དམངས་ཁྲོད་ཀྱི་ཇ་བཤད་རིག་གནས།
དུས་ཚོད།2019-04-12 11:44:44     རྩོམ་གྱི་ཡོང་ཁུངས།ཁམས་པའི་དྲ་བ། རྩོམ་པ་པོ། སྡེ་དགེ། དཔལ་བཟང་།     ཆུང་། | འབྲིང་། | ཆེ།
སྔོན་འགྲོའི་གཏམ། བོད་གངས་ཅན་ལྗོངས་འདི་ལ་མི་རིགས་གཞན་ལ་འགྲམ་མཆུ་སྡང་མི་དགོས་པའི་ཁྱད་འཕགས་འཐུས་སྒོ་ཚང་བའི་རིག་གནས་ཡོད་པ་ནི་ལྟ་ཅི་སྨོས།བྱེ་བྲག་ཏུ་བཤད་ན།དུས་རྒྱུན་གྱི་སྤྱི་ཚོགས་འཚོ་བའི་ནང་ལ་དར་ཁྱབ་ཆེས་ཆེ་བ་ཞིག་ནི་སྙན་འགྱུར་དབྱངས་ཀྱི་རྟ་ལ་དྲངས་ནས་སྙན་ངག་རིག་པའི་སྒྱུ་རྩལ་གྱི་ཁྱད་ཆོས་མཚོན་པའི་ཇ་བཤད་ལ་སོགས་པ་འདུས་པའི་གཏམ་བཤད་དེ་དག་སྤྲོས་པའི་སྐབས་སུ་མཚམས་མཚམས་སུ་ཟློས་གར་རམ།གླུའམ།ཞི་དྲག་གི་ཉམས་དང་ལྡན་པའི་ཀི་བསྭོ་ཡི་སྒྲའམ།ཁ་འབུད་ལག་བརྡུང་གི་རོལ་ཆས་བཀོལ་སྤྱོད་ཀྱིས་རམ་འདེགས་བྱེད་ཅིང་།ཡིག་ཐོག་འགོད་པའི་སྐབས་སུ་སྤྱི་ཁོག་ཚིགས་བཅད་ཀྱི་རྩོམ་རྩལ་ཡིན་ཡང་།ཚིག་རྐང་རེ་འགའ་ནི་ཡིག་འབྲུ་མི་འདང་བ་དང་གཅོད་མཚམས་མི་མཉམ་པ།ཤོ་ལོ་ཀའི་ཚིག་རྐང་མི་ཚང་བ།ཡི་གེའི་དག་ཆ་ཞན་པ།སྡེབ་སྦྱོར་ཉམས་པ།བརྡ་དག་མེད་པའི་སྐྱོན་དང་གྲོལ་རིགས་མཛོད་འདུས་ཀྱི་བརྗོད་དོན་གསལ་བའི་ལམ་ལུགས་ལག་ལེན་ཚུལ་བཞིན་བསྟན་མིན་སོགས་ཀྱི་སྐྱོན་མཆིས་པ་འདྲ་ཡང་།ཞིབ་མོ་བློ་ཡིས་དཔྱད་ཚེ་དེ་དག་ནི་སྐྱོན་དུ་རྩ་བ་ནས་མི་འགྱུར་བ་སྣང་སྟེ།དམངས་ཁྲོད་དུ་སྐད་ཆ་འདི་རིགས་བཤད་མཁན་ཕལ་མོ་ཆེ་རིག་གནས་དང་།ཡང་སྒོས་ཚིག་རྒྱན་རིག་པ་ལ་གསན་སྦྱོང་གི་གོ་སྐབས་ཉུང་བས་མ་ཚད།མཐའ་ནས་ལ་ལའི་ཡི་གེ་ཀ་རྡོག་གཅིག་ཀྱང་མི་ཤེས་མཁན་གྱི་རོང་འབྲོག་གི་མི་སེར་དཀྱུས་མའི་ཁ་ལས་ཕལ་ཆེར་འབྱུང་བ་ཡིན་མོད།ཁོང་རྣམས་ནི་ཁ་མཁས་ཁོག་བཀྲ་དྲན་འཕྲུལ་གྱི་སྟོབས་རྩལ་རྫོགས་པ།སྐྱེས་སྟོབས་ཀྱི་ཤེས་རབ་འཕྲུལ་ཆས་བཟོ་ལས་ཆེ་བ།སྨྲ་བརྗོད་ཀྱི་རྩལ་ལ་བྱང་བས།སྤྱི་ཚོགས་འཚོ་བར་ཉམས་མྱོང་ཕུན་སུམ་ཚོགས་པ་ལྡན་མཁན་ཤ་སྟག་ཡིན་ཕྱིར།ཁོ་ཚོས་བཤད་པའི་གཏམ་ནི་སྤྱི་ཚོགས་འཚོ་བ་དང་ཐོན་སྐྱེད་ངལ་རྩོལ་དང་འབྲེལ་བ་ཆེས་ཟབ་མོ་ཆགས་འདུག་པས་མ་ཚད།མར་རྩམ་དྲི་བསུང་འཐུལ་བའི་ངག་གི་སྒྱུ་རྩལ་དགེ་མཚན་ལྡན་པ་ཞིག་ཡིན་ལ།རྗོད་བྱེད་ཚིག་གི་རོ་ཉམས་དང་བརྗོད་བྱ་དོན་གྱི་ཕྱུག་མིན་སོགས་གང་གི་ཐད་ནས་བལྟས་རུང་།རྣ་བར་སྙན་ཞིང་ཡིད་འཕྲོག་པ་བྱེད་ཅིང་དོན་གྱི་རོ་ཉམས་ཕུན་སུམ་ཚོགས་པའི་ཚིག་སྦྱོར་གྱི་ངག་དོན་དེ་ལས་མ་འདས།གཏམ་བཤད་དེ་དག་ཀྱང་སྐབས་བབ་ཀྱི་བརྗོད་དོན་དངོས་ལ་དམིགས་ཏེ་བརྗོད་ཚུལ་གྱི་ཚིག་སྦྱོར་བསྣོན་འཕྲི་སྒྱུར་བཅོས་སོགས་ཅི་རིགས་བྱེད་ཆོག་ཅིང་།མངོན་བརྗོད་ཀྱིས་བཅིངས་མེད་པས་གོ་བདེ་ཤེས་སླ་ཡིན་མོད།འོན་ཀྱང་དེ་དག་ནི་རིམ་བཞིན་སྙན་ནས་བརྒྱུད་དེ་ཡོང་བས།ངག་གི་ཐོག་ནས་མ་གཏོགས་ཡིག་ཐོག་ཏུ་ཆེན་པོ་འགོད་ཐུབ་མེད་པས་དངོས་རྫས་མ་ཡིན་པའི་མི་རིགས་ཀྱི་རིག་གནས་ཤུལ་བཞག་གི་ཆ་གཏོགས།ངག་གི་སྒྱུ་རྩལ་འདི་རིགས་གང་མང་རྩད་གཅོད་དང་ར་མདའ།འདྲི་རྟོག་དང་ཞིབ་དཔྱད་བགྱི་ནས་ཡིག་ཐོག་སྙན་ངག་རིག་ལམ་དང་འཐད་པར་བརྒྱུད།བོད་མི་རིགས་ཀྱི་དམངས་ཁྲོད་རིག་གནས་འཛིན་སྐྱོང་སྤེལ་གསུམ་གྱི་ལས་ལ་ཤུགས་སྣོན་རྒྱག་ཅི་ནུས་བྱེད་དགོས། འདི་ན་བདག་གིས་དཔེ་མཚོན་དུ་དམངས་ཁྲོད་ངག་རྒྱུན་གྱི་ཇ་ཡི་འབྱུང་ཁུངས་དང་།ཇ་མཆོད།ཇ་བསྐོལ་དང་གཡང་འབོད་བཅས་བཤད་པ་ཁག་གཅིག་ལ་རྩབ་བཟུང་ནས།གདོད་མའི་ཚིག་སྦྱོར་གྱི་བཀོད་ཚུལ་འགྲིག་མིན་ལ་ཧམ་པ་ཆེ་མདོག་གིས་སྣོན་འཕྲི་སྒྱུར་བཅོས་བརྒྱུད་ཡིག་ཐོག་ཏུ་འགོད་ཁུལ་བྱས་པས།ཤེས་མཉམ་སྐྱེས་ཚོགས་ལ་དྲན་པ་བསྐུལ་བ་དང་།མཁྱེན་ལྡན་སྐྱེས་ཚོགས་ལ་གད་མོ་འདྲེན་ཞིང་ངལ་བའི་གསོས་སུ་འབུལ་ལོ།།
 ཇ་བསྐོལ་གྱི་གཡང་འབོད། ཟངས་དཀར་བཀྲ་ཤིས་ལུང་བརྒྱད་ཐབ་ཐོག་བཙུགས།ཆུ་ནི་གངས་ཆུ་སྔོན་མོ་ཇ་ཆུ་བླུག  །རྒྱ་ཇ་གྲུ་བཞིའི་ནག་རིལ་ཇ་གཅིག་བཏབ།ཚྭ་ལ་བྱང་ཚྭ་དཀར་པོ་འབྲིང་གཅིག་བཏབ།།སྡོར་ལ་འབྲི་མར་སེར་པོ་ཆེ་ཙམ་འཕོངས།མེ་ཆ་ཐོག་ཟེར་འབུམ་འཕྲོས་མེ་ལྷ་དྲངས།།དྲི་ཞིམ་སྒ་རྗེའི་ཤུག་དམར་བུད་ཤིང་བཀོལ།གུ་གུམ་མདངས་ལྡན་ཞིམ་མངའ་བདུད་རྩི་མཆོད།
 ཇ་འབྱུང་དང་འབྲེལ་བའི་གཡང་འབོད།
ཇ་དང་པོ་འབྱུང་གང་ནས་འབྱུང་།ཇ་དང་པོ་འབྱུང་འབྱུང་རྒྱ་ནག་ཡུལ་ནས་འབྱུང་།།རྒྱ་བུ་མོ་གསུམ་གྱིས་བཙུགས་པའི་ཇ།།བོད་མགོ་ནག་མི་ཡིས་བཏུང་བའི་ཇ།།ཟངས་དཀར་དམར་གསུམ་ནང་བཙོ་བའི་ཇ།།དཀར་སེང་རས་ནང་ལ་བཅོས་པའི་ཇ།།ཚོང་དཔོན་ནོར་བུ་བཟང་པོས་བསྒྲུབས་པའི་ཇ།།དཀར་པོའི་དངུལ་དང་བརྗེས་པའི་ཇ།།ལམ་འགྲོ་དབང་ཐང་བཟང་བའི་ཇ།།སྨུག་ཆུང་དྲེལ་གྱིས་ཁུར་བའི་ཇ།།ལ་ཆེན་ལ་ཆུང་བརྒལ་བའི་ཇ།།སྤང་ཆེན་སྤང་ཆུང་བརྒྱབ་པའི་ཇ།།ཆུ་བོ་ཆུ་ཕྲན་གཏུབ་པའི་ཇ།།གསེར་སྲང་དངུལ་སྲང་བརྗེས་པའི་ཇ།།ས་རང་ཡུལ་ཕྱོགས་ལ་ཕོག་པའི་ཇ།།ཡུལ་བསོད་ནམས་ཅན་དུ་ཕོག་པའི་ཇ།།ཐབ་ཀ་རྨ་བྱ་ནང་ལ་བཙུགས་པའི་ཇ།།ལྕགས་ཐབ་མཚོ་མིག་འདྲ་བར་བཙུགས་པའི་ཇ།།
 ཇ་མཆོད།
ཇ་ལ་དང་པོ་གཉིས་པ་གསུམ་སོགས་ཡོད།།ཇ་ལ་དང་པོ་ཁང་ཐོག་གནས་རྟེན་བཅུ་དྲུག་དྲངས།།ཇ་ལ་གཉིས་པ་བསླུ་མེད་དཀོན་མཆོག་གསུམ་ལ་མཆོད།ཇ་ལ་གསུམ་པ་ཡུལ་ལྷ་གཞི་བདག་རྣམས་ལ་མཆོད།ཇ་ལ་བཞི་པ་ས་མཁས་དཔོན་ཆེན་དག་ལ་མཆོད།།ཇ་ལ་ལྔ་པ་རྒན་སྔགས་འཆོང་གསུམ་ལ་དྲངས།ཇ་ལ་དྲུག་པ་སྐུ་དྲིན་ཆེ་བའི་ཕ་མར་མཆོད།ཇ་ལ་བདུན་པ་བུ་བཟང་མགྲོན་ཆུང་རང་ཉིད་འཐུང་།།ནག་རིལ་ཇ་ཡི་བཀྲ་ཤིས་ཤོག།།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།