༄༅།། བོད་ཀྱི་རྫ་བཟོའི་ལག་ཤེས། - བོད་ཀྱི་རིག་གནས། - མདོ་ལྷོ་དྲ་བ།-甘南香巴拉在线
  中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > རིག་གནས་སློབ་གསོ། > བོད་ཀྱི་རིག་གནས། >
༄༅།། བོད་ཀྱི་རྫ་བཟོའི་ལག་ཤེས།
དུས་ཚོད།2019-05-10 15:31:02     རྩོམ་གྱི་ཡོང་ཁུངས།བོད་ལྗོངས་འཕྲིན་དྲ།    ཆུང་། | འབྲིང་། | ཆེ།
རྫ་ཆས་ནི་དེ་སྔ་མིའི་རིགས་ཀྱི་འཚོ་བའི་ཁྲོད་མེད་དུ་མི་རུང་བའི་འཚོ་བའི་མཁོ་ཆས་ཤིག་ཡིན་ཆུ་ལེན་སྣོད་ཆས་དང་ལྟོ་སྣོད་ཡོ་ཆས་སོགས་སུ་སྤྱོད་ཀྱི་ཡོད་དེ་ལྟར་མིའི་རིགས་ཀྱི་ཤེས་དཔལ་དར་འགོ་ཚུགས།  ད་ལྟའི་བར་རྫ་ཆས་ཀྱིས་སྔར་བཞིན་མིའི་རིགས་ཀྱི་ཐོན་སྐྱེད་དང་འཚོ་བའི་ཁྲོད་གནས་བབ་གལ་ཆེན་བཟུང་ཡོད།  མིའི་རིགས་ཀྱིས་མེ་སྤྱོད་ཤེས་པ་ནས་བཟུང་རྫ་ཆས་སྤྱད་དེ་ཆུ་ལེན་པ་དང་ལྟོ་ཆས་བཟོ་གི་ཡོད་པ་དང་དེང་སྐབས་གྲངས་འཛིན་གྱི་དུས་རབས་སུའང་རྫ་ཆས་དེ་ཉིད་ང་ཚོའི་འཚོ་བ་ནས་ཁ་བྲལ་མེད།  བོད་ཀྱི་རྫ་ཆས་བཟོ་ལས་དེ་བོད་མི་རིགས་ཀྱི་འཕེལ་རྒྱས་སྲོག་རྩའི་འཐུས་ཚབ་ཅིག་ཡིན་ལ་དེ་སྔ་བོད་རིགས་མི་དམངས་ཀྱི་འཚོ་བའི་ཁྲོད་མེད་དུ་མི་རུང་བ་ཞིག་ཡིན་པ་དང་ལག་ཤེས་བཟོ་རྩལ་དེ་ལས་དེ་སྔ་བོད་མི་རིགས་ཀྱི་འཚོ་བའི་འཕེལ་རྒྱས་ཀྱི་བརྒྱུད་རིམ་མཐོང་ཐུབ།
དཔྱད་གཞིའི་ནང་འཁོད་པར་གཞིགས་ན།  བོད་ཀྱི་རྫ་བཟོའི་ལག་ཤེས་ལ་ལོ་ངོ་ ༥༠༠༠ གི་ལོ་རྒྱུས་ལྡན་ཡོད་པ་དང་མི་རྣམས་ཀྱིས་ལྕུག་ཕྲན་བསླས་ཏེ་གཟུགས་དབྱིབས་བཟོས་ནས་དེའི་ཐོག་འདམ་བག་བྱུགས་ནས་མེར་སོ་གཏོང་བའམ་ཡང་ན་འདམ་བག་བརྫིས་ནས་རང་ཉིད་ཀྱིས་བསམ་པའི་ཆུ་ཚད་དང་མཐུན་པའི་གཟུགས་དབྱིབས་སྣ་ཚོགས་བཟོས་ཏེ་སོ་གཏོང་གི་ཡོད།དེ་ལྟར་རྫ་ཆས་རེ་རེ་བཞིན་གྲུབ་ནས་མིའི་རིགས་ཀྱི་འཚོ་གནས་ཁོར་ཡུག་ལ་འགྱུར་ལྡོག་བྱུང་ཡོད།
རྫ་ཆས་ནི་བོད་མི་དམངས་ཀྱི་འཚོ་བའི་ཁྲོད་ཀྱི་མཁོ་ཆས་གལ་ཆེན་ཞིག་ཡིན་ཞིང་།  རྫ་མ་དང་རྫ་ཕོར་སོགས་རྫ་ཆས་གང་ཞིག་ཡིན་རུང་བོད་རིགས་མི་དམངས་ཀྱི་ཟ་སྡོད་འགྲོ་སྐྱོད་སོགས་གང་ས་ཅི་ཐད་ལ་ནུས་པ་གལ་ཆེན་ཐོན་ཡོད།  བོད་རིགས་ཀྱི་ཁྱིམ་དུ་རྫ་ཆས་དེ་རྒྱུན་གཏན་གྱི་འཚོ་བའི་སྤྱོད་རྫས་ཤིག་ཡིན་ལ་ཁྱིམ་ཚང་ཚང་མའི་ནང་ཁྱབ་པ་དང་དང་དོད་ཆེན་པོ་བྱེད་ཀྱི་ཡོད།
རྫ་ཆས་ཀྱི་རྒྱུ་ཆ་རྩ་བའི་ཆ་ནས་གྲོང་ཚོའི་ཉེ་འགྲམ་དུ་ཡོད་ཅིང་།  གྲོང་ཚོའི་རི་ལྡེབས་ནས་ས་དམར་བླངས་ཏེ་ཞིབ་ཞིབ་བཟོས་རྗེས་དཀར་གོང་དང་བྱེ་མ་རྩུབ་པོའམ་ཡང་ན་ལྷང་ཚེར་དང་གཏེར་ཕྱེ་འོས་འཚམས་བསྲེས་རྗེས་རྫ་ཆས་བཟོ་བའི་འདམ་བག་གྲུབ་པ་དང་ཕྱིར་ཉིན་གཉིས་ཡན་བཞག་རྗེས་རྫ་ཆས་བཟོ་བའི་རྨང་གཞིའི་མ་རྒྱུ་གྲུབ་ཐུབ།  དེ་རྗེས་མ་རྒྱུ་དེ་ལག་འགུལ་སྐོར་འཕྲུལ་ཐོག་བཞག་ནས་སྐོར་འཕྲུལ་བསྐོར་བ་དང་ལག་པས་བཟོ་ལྟ་བཟོ་བའམ་ཡང་ན་ལག་ཆ་སྤྱད་དེ་ནང་ངོས་ལ་འཇམ་ཤ་གཏོང་བ་དང་གཟུགས་དབྱིབས་འདོན་གྱི་ཡོད།  དེ་དག་ཚར་རྗེས་རས་འཇམ་པོ་ཞིག་རློན་པ་བཟོས་ནས་ཕྱིས་ཏེ་འོད་འདོན་པ་དང་དབྱུག་པས་རི་མོ་འབྲི་དགོས།  གོ་རིམ་དེ་དག་གྲུབ་རྗེས་གྲིབ་སྐམ་བཏང་ནས་སོ་གཏོང་ཆོག་གི་ཡོད།
བོད་ཀྱི་རྫ་ཆས་ལ་སོ་གཏོང་སྟངས་ཀྱང་དམིགས་བསལ་ཡོད་པ་དེ་ནང་སའི་སོ་གཏོང་སྟངས་དང་མི་འདྲ་བར་བོད་ཀྱི་ཐུན་མིན་ཁོར་ཡུག་ལ་གཞིགས་ནས་བྱུང་བའི་རྫ་ཆས་སྤུངས་ཏེ་སོ་གཏོང་སྟངས་དེ་ཡིན།  རྫ་ཆས་ཀྱི་གཞི་གྲུབ་རྗེས་ས་སྟོང་ཞིག་ཏུ་རྩྭ་དང་ལྕི་བས་གཡོགས་ཏེ་སྲུབ་ཁ་མ་ལུས་པ་བྱེད་དགོས་པ་དང་དེ་རྗེས་སྒྱིད་བུ་གསུམ་བཙུགས་ཐོག་དེའི་སྟེང་རྫ་ཆས་བཞག་ནས་མེ་གཏོང་དགོས་དེ་ལྟར་ཆུ་ཚོད་བཅུ་ལྷག་ཙམ་སོ་བཏང་རྗེས་རྫ་དངོས་སུ་གྲུབ་ཀྱི་ཡོད།
རྫ་ཆས་ནི་བོད་མི་རིགས་ཀྱི་ཐོན་སྐྱེད་དང་འཚོ་བའི་ཁྲོད་ཀྱི་དགོས་ངེས་ཀྱི་མཁོ་ཆས་ཤིག་ཡིན་པ་དང་མི་རིགས་ཀྱི་ཁྱད་ཆོས་མངོན་གསལ་དོད་པོ་ལྡན་ཡོད།  བོད་ཀྱི་ཡུལ་སྐོར་རིག་གནས་ཐོན་ལས་ཉིན་རེ་བཞིན་འཕེལ་རྒྱས་འགྲོ་བ་དང་བསྟུན་ནས་རྫ་ཆས་སོགས་མི་རིགས་ཀྱི་ལག་ཤེས་བཟོ་རྫས་དེ་དག་ལ་ཡུལ་སྐོར་བ་ཚོས་ཧ་ཅང་དགའ་པོ་བྱེད་པས།  མི་རིགས་ལག་ཤེས་བཟོ་ལས་ལ་འཕེལ་རྒྱས་ཀྱི་རྣམ་པ་གསར་པ་ཞིག་ཐོན་པ་དང་སྦྲགས་ལག་ཤེས་བཟོ་རྩལ་པ་ཚོའི་འཚོ་བའང་བདེ་སྐྱིད་ལྡན་པའི་ལམ་བུའི་ཐོག་སྐྱོད་བཞིན་ཡོད།།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།