中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > རིག་གནས་སློབ་གསོ། > བོད་ཀྱི་རིག་གནས། >
༄༅།། ལྷ་སྒྲུང་ལྟ་བུའི་བཤད་ཚུལ་གྱི་གེ་སར་རྒྱལ་པོའི་རྟ་ཕུར།
དུས་ཚོད།2019-05-17 11:31:28     རྩོམ་གྱི་ཡོང་ཁུངས། མཚོ་སྔོན་པོ་དྲ་བ།     ཆུང་། | འབྲིང་། | ཆེ།
 དེ་ཡང《གླིང་གེ་སར་རྒྱལ་པོའི་ཤུལ་རྟེན་གྱི་ངག་རྒྱུན་ངོ་མཚར་མེ་ཏོག་ཕྲེང་མཛེས》ལྟར་ན། རི་རབ་མིང་གྲགས་ཅན་ཨ་མ་ཟོ་དགུའི་ཤར་ཕྱོགས་ཀྱི་རྩྭ་ཐང་ཡིད་དུ་འོང་ཞིང་ལྟ་ན་སྡུག་པའི་ཉི་ཟེར་གོང་ཁ་ཞེས་པ་དེ་བརྒྱུད་ནས་སྤྱི་ལེ་ཉི་ཤུ་ལྷག་སོང་བ་ན། མ་བསླངས་རང་གྲུབ་ཀྱི་རྟ་ཕུར་ཆེན་པོ་ཞིག་མིག་ལམ་དུ་ཤར་བྱུང་། མཐོང་བ་ཙམ་གྱིས་ས་ལས་གྲུབ་པའི་རྟ་ཕུར་ཞིག་ཡིན་པ་གང་ནས་ཤེས་ཐུབ་ཨང་། སྟོབས་ལྡན་གྱི་སྐྱེ་བོ་ཞིག་གིས་དངོས་སུ་བརྡབས་པའི་ཤིང་ཕུར་ཞིག་དང་ཁྱད་པར་མ་མཆིས། མཐོ་ཚད་ལ་ཕལ་ཆེར་རྨིས་བཅུ་ལྷག་ཅིག་ཡོད་པ་འདྲ། ལམ་འགྲོ་བ་ཚང་མས་རྟ་ཕུར་དེ་མཐོང་ཙ་ན་རང་ཤུགས་ཀྱིས་གན་ནི་འཛམ་གླིང་གེ་སར་རྒྱལ་པོ་བདུད་འདུལ་དུ་འགྲོ་སྐབས་ཆིབས་རྟ་རྐྱང་རྒོད་གཡེར་བ་བཏགས་པའི་ཕུར་བ་རེད་ཅེས་གླེང་བཞིན་མཆིས། དེ་ལ་ཅིའི་ཕྱིར་འཛམ་གླིང་རྟ་ཕུར་ཟེར་བ་ཡིན་ཞེ་ན། དམངས་ཁྲོད་ཀྱི་ངག་རྒྱུན་ལས་ངོ་མཚར་ལྡན་པའི་གཏམ་རྒྱུད་ཐུང་ཐུང་ཞིག་ཡོད་པ་ནི་འདི་ལྟ་སྟེ།
 
  དེ་ཡང་སྐུ་རྗེ་འཛམ་གླིང་གེ་སར་རྒྱལ་པོས་གླིང་གི་ཇ་མ་མིང་ཆེན་བཅུ་གསུམ་གྲོགས་བཀུག་ཚར་བའི་རྗེས་སུ་མཚམས་ལ་བཞུགས་པའི་སྐབས། ཉིན་ཞིག་མེ་བཟའ་འབུམ་སྐྱིད་ཀྱིས་སྦྲ་ཡི་སྒོ་ཁ་རུ་འཐག་ཅིག་བཏགས་ནས་བསྡད་ཡོད་པའི་དུས་ལ། གློ་བུར་དུ་ཕུ་ནས་རླུང་དམར་དང་མདོ་ནས་རླུང་ནག་འཚུབ་ནས། བདུད་ནག་པོ་ཀླུ་བཙན་རྒྱལ་པོ་དེས་མེ་བཟའ་འབུམ་སྐྱིད་ནི་གླག་གིས་ལུ་གུ་བཟུང་བ་ལྟར་ནམ་མཁར་ཁྱེར་སོང་བ་ན། མ་ཨ་ནེ་གོང་སྨན་རྒྱལ་མོ་དེས་སྤྲིན་སྒོ་ལེབ་ཙམ་ཞིག་ཞབས་ལ་བརྟེན། སྤྲིན་སྒོ་ལེབ་ཙམ་ཞིག་གཡས་ལ་བརྟེན། སྤྲིན་སྒོ་ལེབ་ཙམ་ཞིག་གཡོན་ལ་བརྟེན།  སྤྲིན་སྒོ་ལེབ་ཙམ་ཞིག་རྒྱབ་ལ་བརྟེན་ནས་ཕེབས་འོངས་ཏེ་གེ་སར་རྒྱལ་པོ་ལ། ཁྱོད་མར་ལ་མ་ཉལ་ཡར་ལ་ལོངས།། ལྷ་ཚངས་པ་དཀར་པོའི་གསུང་བཀོད་ཡོད།།  བདུད་ནག་པོ་ཀླུ་ཙམ་འདུལ་དུ་སོང་ཞེས་ལུང་བསྟན་གསུངས་པར་བརྟེན།  རྒྱལ་པོས་ན་བཟའ་དང་ཁྲབ་རྨོག་སོགས་སྐུ་ཆས་གསོལ་ཞིང་། སག་ཐག་འཁོར་གསུམ་སྐེད་ལ་བཏགས་ནས་རྟ་མཆོག་རྐྱང་རྒོད་གཡེར་བ་ལ་བཅིབས་ཏེ་མ་རུབས་བདུད་ཀྱི་ཡུལ་ལ་ཆས་སོང་།
 
  དེ་ནས་སེང་ལྕམ་འབྲུག་མོའི་ཡིད་རྨོངས་པ་ཆེན་པོས་གདུང་ཞིང་བཟོད་ཐབས་མེད་པར་གྱུར་ཏེ་གླིང་གི་ན་དམར་གཞུང་ལ་རྒྱུགས་ནས་ངུ་འབོད་དི་རི་རི་བྱས་པས། གླིང་གི་ཇ་མ་མིང་ཆེན་བཅུ་གསུམ་གྱིས་གསོལ་ཇ་བསྐོལ་ཏེ་ཁོ་མོར་དྲངས་ནའང་། གསོལ་ཇ་ཁམ་གང་ཙམ་ཡང་གང་ནས་བཞེས་ཨང་། ཁོ་མོའི་སེམས་ལ་རྒྱལ་པོ་མི་བཞུགས་པའི་ལུང་སྟོང་འདི་རུ་ངས་སུ་ལ་བལྟས་ནས་འདུག་ཅེས་བསམས་ནས་རྨོངས་ཏེ། ཉིན་མོར་ལྟོ་ལ་ཟས་མི་རིལ་ཞིང་མཚན་མོར་ཉལ་བའི་གཉིད་ཀྱང་མེད་པར་གྱུར། དེར་ཁོ་མོས་ང་མི་འདུག་རྒྱལ་པོའི་རྗེས་སུ་འགྲོ། རྟ་རྒོད་མ་བློ་ཁྲིད་སྒ་ཞིག་རྒྱོབ་ཅེས་ཟེར་ནས་ཕྱི་ཉིན་ནམ་ལངས་པ་ན། སེང་ལྕམ་འབྲུག་མོ་དེ་རྒོད་མ་བློ་ཁྲིད་ལ་ཞོན་ནས་གླིང་གེ་སར་རྒྱལ་པོའི་རྗེས་དེད་དེ་ལ་ལུང་མང་པོ་བརྒྱུད་ཙ་ན། རྩྭ་ཆུ་གཉིས་འཛོམས་ཀྱི་རྫ་ལུང་ཡངས་པ་ཞིག་ཏུ་གླིང་སེང་ཆེན་རྒྱལ་པོ་ཁོང་གཉིད་ཀྱིས་ལྷ་རྟ་རྐྱང་རྒོད་གཡེར་བ་དེ་རང་བྱུང་གི་རྟ་ཕུར་ཆེན་པོ་དེར་རིང་འདོགས་བྱས་ཏེ། ཁོང་ཉིད་སྐྱིད་ཉལ་གོར་མོ་བརྒྱབ་ནས་རེ་ཞིག་གཟིགས་འདུག་པ་དང་འཕྲད་བྱུང་། དེར་ཁོང་ཡབ་ཡུམ་གཉིས་དགའ་སྐྱོ་གཉིས་ལྡན་གྱི་ངང་ནས་དགོང་མོ་རྫ་ལུང་འཛོམས་པོ་དེ་རུ་ཞག་བཞུགས་གནང་ཞིང་། རྟ་མཆོག་རྐྱང་རྒོད་གཡེར་བ་ཡང་དེའི་ནུབ་ཨ་མ་ཟོ་དགུའི་ཤར་ཕྱོགས་ཀྱི་འཛམ་གླིང་རྟ་ཕུར་ཟེར་བ་དེར་བཏགས་པ་ལགས་ཞེས་གཏམ་རྒྱུད་ཀྱི་རོལ་མོ་འཛིན་མའི་ཁྱོན་ཡོངས་སུ་ཁྱབ་འདུག
 
གལ་ཏེ་ལྷ་སྒྲུང་ལྟ་བུའི་བཤད་ཚུལ་གྱི་རྟ་ཕུར་དེ་མཐོང་འདོད་ཀྱི་སྐྱེ་བོ་ཡོད་ན།  ཁྲི་ཀ་རྫོང་ལ་འགྲོ་བའི་ལམ་ཁའི་གཡོན་ཕྱོགས་རྫ་ངོས་སུ་ཡོད་པས་དེ་མཐོང་བའི་སྐལ་བ་ཁྱོད་ལ་ལྡན་ནོ།།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།