དང་པོ། དཔེ་ཀློག་དང་ང་ཚོ།
ཀོར་ཅིས་དཔེ་ཆ་ནི་མིའི་རིགས་ཡར་རྒྱས་གོང་འཕེལ་དུ་འགྲོ་བའི་ཐེམ་སྐས་རེད་ཅེས་གསུངས་པ་ལྟར་དཔེ་ཀློག་ནི་ཐེམ་སྐས་རེ་རེ་བཞིན་འཛེགས་ནས་དར་རྒྱས་གོང་འཕེལ་གྱི་ལམ་བུར་བསྙེགས་པ་དང་མཚུངས།
རླབས་ཆེན་གྱི་མི་སྣ་མང་བོ་ཞིག་དཔེ་ཆ་ཀློག་ནས་བྱུང་བ་དང་། དར་རྒྱས་ཆེ་བའི་རྒྱལ་ཁབ་མང་བོ་ཞིག་ཀྱང་དཔེ་ཀློག་ལ་དགའ་བའི་སྤྱི་དམངས་ཚོས་སྐྲུན་པར་བསམ། དེར་བརྟེན། དཔེ་ཀློག་ནི་རྒྱལ་ཁབ་དང་མི་རིགས། ཁྱིམ་ཚང་དང་རང་ཉིད་སུའི་ཕྱོགས་ནས་བསམ་ཀྱང་གལ་འགངས་ཤིན་ཏུ་ཆེ།
༡
རྒྱལ་ཁབ་མང་བོ་ཞིག་དང་མི་རིགས་མང་པོ་ཞིག་གིས་དཔེ་ཀློག་གི་གལ་ཆེའི་དོན་སྙིང་ལ་བསམ་ནས་དཔེ་ཀློག་གི་དམིགས་བསལ་ཉིན་མོ་བཙུགས་ཡོད་པ་དང་། ལས་བྱེད་དང་ཞིང་བ། ཚོང་བ་སོགས་ཀྱི་དབྱེ་བ་མེད་པར་དཔེ་ཀློག་ལ་བློ་ཁ་ཕྱོགས་ནས་ཡོད། ང་ཚོ་བོད་དུ་ཡང་རྒྱལ་ཁབ་ཀྱིས་ཞིང་བའི་དཔེ་ཁང་བཙུགས་པ་དང་། བྱིས་པའི་དཔེ་དེབ་མང་པོ་ཡིག་བསྒྱུར་དང་རྩོམ་འབྲི་བྱས་ནས་སློབ་གྲྭ་ཚང་མར་དཔེ་ཁང་བཙུགས་ཡོད།
འོན་ཀྱང་དོན་དངོས་མང་ཚོགས་ཀྱིས་དཔེ་ཆ་ལ་དོ་སྣང་མེད་པ་དང་། དཔེ་ཀློག་གི་གོམས་གཤིས་བཟང་པོ་མེད་པའི་རྐྱེན་གྱིས་བཙུགས་པའི་དཔེ་ཁང་དེ་དག་ཀྱང་དོན་སྙིང་གིས་སྟོང་ནས་ཡོད། ལྷག་པར་དུ་ཞལ་འདོན་རིགས་ལ་མ་གཏོགས་དགོས་པ་མེད་པར་ལྟ་བའི་ཀླད་རྙིང་མཁྲེགས་བཟུང་གི་ལྟ་བས་རང་ཙམ་མ་ཟད་བུ་ཕྲུག་ལའང་དཔེ་ཀློག་གི་གོམས་གཤིས་ཆགས་པར་ཤུགས་རྐྱེན་ངན་པ་ཐེབས་ནས་འདུག
༢
ང་ཚོའི་མི་རིགས་འདི་མ་གཞི་རིག་གནས་ལ་དགའ་བའི་མི་རིགས་ཤིག་དང་། རང་ཉིད་ཁྱད་འཕགས་སུ་འདོད་པའི་མི་རིགས་ཤིག་རེད་སྙམ་ཡང་དཔེ་ཀློག་ལ་མ་གོམས་པ་དེས་ད་ཆ་ཚང་མས་རྡོག་རྩ་གཅིག་ཏུ་སྒྲིལ་ནས་དད་པ་བྱེད་ཡུལ་གྱི་སངས་རྒྱས་ཆོས་ལུགས་དེ་ཡང་ཕྱི་ཚུལ་ཙམ་ལས་མི་ཤེས་པའི་ཚད་ལ་ལྷུང་ཡོད། བྱམས་སྙིང་རྗེ་བྱང་ཆུབ་ཀྱི་སེམས་ཞེས་པ་གང་རེད། འགྲོ་བ་རིགས་དྲུག་ཟེར་བ་སུ་དང་གང་རེད། མ་ཎི་ཡིག་དྲུག་གི་གོ་དོན་གང་ཡིན། ཡོན་ཆབ་དང་མཆོད་མེ། ཆོས་མཇལ་སོགས་ཀྱང་ང་ཚོ་དང་རྟག་ཏུ་འབྲེལ་ཡང་དོན་སྙིང་ངོ་མ་ཤེས་མཁན་ནི་ཤིན་ཏུ་ཉུང་།
༣
ང་ཚོས་མེས་པོ་དཔའ་རབས་དང་། རང་ཉིད་འཇོན་རབས་ཀྱི་གཏམ་རྒྱུད་རྣ་བར་སྙན་ཡང་དཔེ་ཀློག་ལ་མ་གོམས་པ་དེས། ད་ལྟའི་སྤྱི་ཚོགས་ཀྱི་སྣང་ཚུལ་སྣ་ཚོགས་ལ་དོ་སྣང་བྱུང་གིན་མེད། སློབ་གསོ་དང་མི་འབོར། ལས་རིགས་ལག་རྩལ་སྣ་ཚོགས་སོགས་ལ་དེ་བས་ཀྱང་བློ་ཁ་རྨོངས། རང་གི་དོན་དག་གལ་ཆེན་སྒྲུབ་ས་རྫོང་མཁར་དང་གྲོང་ཁྱེར་དུ་ཡིན་ཡང་དེའི་ཁྲོད་དུ་ཞུགས་ནས་ཇ་ཁང་ལེགས་པོ་ཞིག་ཀྱང་གཉེར་མ་ཐུབ་པ་དེས་ང་ཚོའི་མདུན་ལམ་ལ་ཉེན་ཁ་ཚབས་ཆེན་བཟོ་བ་ཡང་རྩ་བ་ནས་ཚོར་གིན་མེད་པ་རེད།
༥
ཇ་ཁང་དང་ཟ་ཁང་། ཚོང་ཁང་དང་མགྲོན་ཁང་། འཁོར་རིགས་ཉམས་བཟོ་དང་གློག་སྐུད་མཐུད་བཟོ། ཆུ་འགྲོ་ཞིག་བཟོ་སོགས་རྒྱུན་ལྡན་འཚོ་བའི་ཐད་འབྲེལ་དུ་ཡོད་པའི་བྱ་བ་ཆུང་ངུ་མང་པོ་ཞིག་གི་མདུན་དུ་ང་ཚོས་མ་ཎི་ལག་ཏུ་བཟུང་ནས་མི་རིགས་གཞན་གྱི་ལག་རྩལ་མི་སྣ་ཁོ་ན་ལ་བརྟེན་ཏེ་སྡོད་དགོས་པ་དེ་ཡང་གཙོ་བོ་དཔེ་ཀློག་ལ་མ་འཇུག་པས་རེད།
དཔེ་ཀློག་ལ་མ་གོམས་པའི་མི་རིགས་འདིས་སངས་རྒྱས་ཆོས་ལུགས་བྱིན་རླབས་ཀྱི་རྟེན་དུ་བཟུང་ནས་དངོས་གྲུབ་ལ་སྒུག་པ་དང་། མིག་མདུན་གྱི་འགྲོ་ལམ་ཡོད་ཚད་ལས་དབང་གིས་བཀོད་སྒྲིག་ཁོ་ན་ལ་བསམ་ནས་བསྡད་པས་ད་ཆ་ང་ཚོའི་ཕ་ཡུལ་དུ་དངོས་གྲུབ་ཁོ་ན་ལྷ་བཞིན་སྒོམ་པའི་དད་ལྡན་གྱི་ཁྱུ་ཞིག་དང་། དབུལ་སྐྱོར་ཁོ་ན་རྣམ་གྲངས་ཀྱི་སྐལ་དུ་འདོད་པའི་ལས་མེད་ཀྱི་མི་ཁྱུ་འགའ་ལས་ཅི་ཡང་མེད་པ་འདྲ།
གཉིས་པ། ང་ཚོའི་གནས་ལུགས་དང་དཔེ་ཀློག
གནས་ལུགས་མང་བོ་ཞིག་མི་རིགས་སོ་སོའི་རྩོམ་པ་པོའི་སྨྱུག་ཁ་ནས་ལུས་ཏེ་རྩོམ་དེབ་ཏུ་གྲུབ་པ་དང་། རྩོམ་དེབ་དེ་དག་ལ་ལྟ་ཀློག་བྱས་ནས་རིགས་སོ་སོའི་མི་དམངས་ཀྱི་བློ་ཁ་ཕྱེ་བཞིན་ཡོད་པ་ནི་རྩོམ་པ་པོས་དཔེ་དེབ་འབྲི་བའི་དམིགས་ཡུལ་དང་། ཀློག་པ་པོས་དཔེ་དེབ་ཀློག་པའི་དགོས་པ་གལ་ཆེན་དེ་རེད། ང་ཚོ་བོད་ལ་མཚོན་ན་ཡང་ཆོས་སྲིད་ལུགས་གཉིས་ཀྱི་དཔེ་དེབ་གྲངས་ལས་འདས་པ་ཡོད་པ་དང་། ནང་དོན་དུས་རབས་ཀྱི་དགོས་མཁོ་དང་འཚམས་པའི་དཔེ་དེབ་ལེགས་པོ་མེད་པ་ཡང་མ་རེད། གཙོ་བོ་དཔེ་ཀློག་ལ་མི་དགའ་ཞིང་ལྷག་པར་དུ་བོད་ཡིག་དཔེ་དེབ་ལ་ཀློག་པའི་སྤྱི་དམངས་ཚད་ལྡན་ཞིག་མེད་པས་གནས་ལུགས་ལས་ལྡོག་པ་དང་། རྒྱུ་མཚན་མི་ཤེས་པའི་ལབ་བརྡོལ་དང་ལྟ་སྟངས་ཀྱིས་ཚང་མ་རྨོངས་ནས་འདུག
རྩོམ་སྒྲིག་པ། ཀླུ་འབུམ་ཚེ་རིང་།
|
