中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > རིག་གནས་སློབ་གསོ། > བོད་ཀྱི་རིག་གནས། >
༄༅།། གོས་ཀྱི་དར་ཚུལ་ཙམ་བཤད་པ།
དུས་ཚོད།2016-10-19 15:21:06     རྩོམ་གྱི་ཡོང་ཁུངས། ཁམས་པའི་གསར་འགྱུར་དྲ་བ།    ཆུང་། | འབྲིང་། | ཆེ།
     གོས་ནི་འགྲོ་བ་མིའི་རིགས་སྤྱི་ལ་དར་སྔ་ཞིང་མེད་དུ་མི་རུང་བའི་མཁོ་ཆས་ཤིག་ཡིན་ལ། ཕྱི་གོས་རྒྱན་གྱི་སྟེང་ནས་མི་རིགས་དེའི་ཀུན་སྤྱོད་མཚོན་པ་མ་ཟད། ད་དུང་མི་རིགས་དེའི་ཤེས་རིག་ལྡན་པའི་ལོ་རྒྱུས་ཀྱང་མཚོན་གྱི་ཡོད། བོད་མི་ནི་འཛམ་གླིང་གི་མི་རིགས་མང་བོའི་ཁྲོད་དུ་གོས་དར་སྔ་བའི་མི་རིགས་ཤིག་ཡིན་ལ། ལོ་ཏོག་ཟོས་པས་དེ་ཀུན་མི་ཉིད་གྱུར།། མ་རྨོས་འབྲུ་ཟ་གོས་སུ་ཤིང་ལོ་གྱོན།། ནགས་ན་རི་དྭགས་ལྟ་བུར་གནས་པ་ཡིན།། ཀློ་དང་མོན་ལྟར་སྤྱོད་པས་བོད་ཡུལ་གང་།། ཞེས་པ་ལ་བརྟགས་ཚེ། ཤིན་ཏུ་སྔ་བའི་དུས་ནས་བོད་ལ་གོས་དར་བ་མཚོན་པ་མ་ཟད་གོས་ཀྱི་ཐོག་མའང་ཤིང་ལོ་ཡིན་པ་གསལ་བོར་བསྟན། དེ་ཡང་གོས་ཀྱི་འབྱུང་ཁུངས་ཐད་ལ་མཁས་པ་ལ་ལས། གོས་ནི་ལུས་ཀྱི་གྲང་བ་སྐྱོབ་པའི་ཆེད་དུ་གྱོན་པ་ཡིན་པས་འཛམ་གླིང་བྱང་ཕྱོགས་སུ་དར་སྔ་བར་བཤད་པ་དང་། ལ་ལས་མིའི་རིགས་ཀྱི་ངོ་སྲུང་ཤེས་པ་ནས་དར་བར་བཤད། བོད་ཀྱི་མངོན་བརྗོད་རིག་པ་ལས་གོས་ལ་གྲང་སྐྱོབ་དང་གཅེར་སྐྱོབ་ཟེར་བ་དེས་གཞུང་ལུགས་འདི་གཉིས་ལ་སྡོམ་ཚིག་གསལ་བོ་ཞིག་བཞག་པ་མཚོན།
     དུས་ཡུན་རིང་བོའི་ལོ་རྒྱུས་ཀྱི་ཆུ་རྒྱུན་ཁྲོད་དུ་བོད་མི་རྣམས་ཀྱིས་གོས་འཚོལ་སྟངས་ལ་འགྱུར་ལྡོག་ཆེན་པོ་བྱུང་བ་དང་།《ལོ་རྒྱུས་ཆེན་མོ》སོགས་ལས་བྱུང་བ་ལྟར། དང་བོ་གནོད་སྦྱིན་ནག་པོས་དབང་བྱས་ཏེ།། ཡུལ་གྱི་མིང་ཡང་བཟང་ཡུལ་རྒྱན་མེད་ཟེར།། མཚོན་ཆ་མདའ་གཞུ་དེ་ཡི་དུས་སུ་བྱུང་།། ཟེར་བ་བཞིན། རྡོ་ཆས་ཀྱི་མཚོན་ཆ་དང་ཤིང་གི་མདའ་གཞུ་བྱུང་བ་ནས་རི་དྭགས་བརྔོན་ཏེ་གོས་སུ་བདག་ཏུ་མ་བཟུང་བའི་རི་དྭགས་སྣ་ཚོགས་ཀྱི་ལྤགས་རིགས་གྱོན་པ་དང་། དེ་ནས་སྤྱི་ཚོགས་འཕེལ་རྒྱས་བྱུང་བ་ལ་བརྟེན་ནས་འབྲོང་ཕོ་མོ་གཡག་དང་འབྲི་རུ་བཏུལ། ཤྭ་བ་ཕོ་མོ་བ་གླང་དུ་བཏུལ། རྒོ་བ་ཕོ་མོ་ལུག་ཏུ་བཏུལ། གླ་བ་ཕོ་མོ་རར་བཏུལ། རྐྱང་ཕོ་མོ་རྟར་བཏུལ། སྤྱང་ཀི་ཕོ་མོ་ནི་ཁྱིར་བཏུལ། དེ་དག་གི་ལྤགས་རིགས་མཉེད་སྦྱངས་བྱས་ཏེ་གོས་སུ་གྱོན་པས་བོད་མིའི་གོས་ཀྱི་རྒྱུ་ཆ་དེ་གཙོ་བོ་སྒོ་ཕྱུགས་ཀྱི་སྟེང་ནས་ཐོན་པ་རེད། དེ་ཡང་གོས་ནི་འགྲོ་བ་མིའི་རིགས་ལ་མེད་དུ་མི་རུང་བའི་མཁོ་ཆས་ཤིག་ཡིན་ལ། གོས་དར་ཚུལ་ཡང་གོས་རང་ཉིད་ཀྱིས་འགྲོ་བ་མིའི་རིགས་ལ་ཐོན་པའི་ནུས་པར་འབྲེལ་བ་དམ་པོ་ཡོད། དེའི་ཕྱིར་གོས་ཐོག་མར་མིའི་རིགས་ཀྱི་ཡན་ལག་གང་ཞིག་ལ་དར་བར་བཤད་ཚུལ་མང་བོར་འདུག་སྟེ། ལ་ལས་གོས་ཀྱི་ནུས་པ་ནི་གསང་ཁེབས་ཡིན་པ་དང་། འགྲོ་བ་མིའི་རིགས་ཀྱི་ངོ་སྲུང་ཤེས་པ་ནས་ཐོག་མར་གསང་ཁེབས་བྱུང་བ་དང་དེ་ནས་རིམ་བཞིན་སྤྱི་ཚོགས་འཕེལ་རྒྱས་བྱུང་བ་ལ་བརྟེན་ནས་ལུས་ཀྱི་གོས་ཆ་ཚང་བྱུང་བར་འདོད། ཡང་ལ་ལས་གོས་ཀྱི་ཐོག་མ་ནི་སྐ་རགས་ཡིན་པ་དང་། ཐོག་མར་མིའི་རིགས་ཀྱིས་སྐ་རགས་སྟེང་འཚོ་བའི་ཉེར་སྤྱད་འདོགས་སྲོལ་དར་ཞིང་དེ་ནས་རིམ་བཞིན་ལུས་ཀྱི་གོས་ཆ་ཚང་བྱུང་བར་འདོད། གང་ལྟར་གོས་ཀྱི་ཐོག་མའི་ནུས་པ་ནི་བོད་རང་ལ་མཚོན་ན་གྲང་སྐྱོབ་ཡིན་པ་དང་། མིའི་རིགས་ཤེས་རིག་ལྡན་པའི་ལོ་རྒྱུས་སུ་སླེབས་པ་ནས་གོས་ཀྱི་ནུས་པའང་རིམ་བཞིན་སྣ་མང་ཅན་དུ་གྱུར་པ་དང་། གོས་ནི་མི་ལུས་ལ་གྲང་སྐྱོབ་ཀྱི་ནུས་པ་ཐོན་པ་མ་ཟད། ཚ་སྐྱོབ་དང་གཅེར་སྐྱོབ། རྒྱན་ཆ་སོགས་ཀྱི་ནུས་པའང་ཐོན་ཞིང་། ས་བབས་ཀྱི་རྐྱེན་གྱིས་བོད་མིའི་གོས་ལ་རིགས་མི་འདྲ་བ་མང་བོ་ཞིག་བྱུང་།།
རྩོམ་སྒྲིག་པ། ཀླུ་འབུམ་ཚེ་རིང་།

Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།