རྩོམ་སྒྲིག་པ། དངོས་སྦྱོང་སློབ་མ། བཀྲ་ཤིས་ཚེ་རིང་།
དེ་ཡང་ཡུལ་ཁོངས་སུ་ལྷ་རི་མཐོན་པོ་ཀླུའི་ཆབ་བྲག་ནས་མཆེད་པའི་ཀླུ་ཆབ་སྔོན་པོ་འབབ་པས་ཀླུ་ཆུ་ཞེས་ཆུ་མིང་ཡུལ་མིང་དུ་ཐོགས་པ་ཡིན་ལ་ཀན་ལྷོ་བོད་རིགས་རང་སྐྱོང་ཁུལ་གྱི་ལྷོ་ནུབ་ཕྱོགས་སུ་གནས་ཤིང་། ཤར་དུ་ཅོ་ནེ་དང་། བྱང་དུ་བསང་ཆུ། ལྷོ་ནུབ་དུ་རྨ་ཆུ། ནུབ་ཏུ་མཚོ་སྔོན་ཞིང་ཆེན་གྱི་རྨ་ལྷོ་སོག་རིགས་རང་སྐྱོང་ཁུལ། ལྷོར་སི་ཁྲོན་མཛོད་དགེ་བཅས་དང་ཡུལ་མཚམས་འདྲེས། རྫོང་འདིར་ཤང་ཁག་བདུན་དང་མི་གྲངས་སུམ་ཁྲིར་ཉེ་བ་མངའ་ཞིང་མི་གྲངས་ཡོངས་ཀྱི་བརྒྱ་ཆ་བརྒྱད་ཅུ་ཡན་བོད་རིགས་ཡིན། རྫོང་ཡོངས་ཀྱི་ཆ་སྙོམས་མཚོ་ངོས་མཐོ་ཚད་སྨི་སུམ་སྟོང་ནས་བཞི་སྟོང་བར་ཡིན་པས་ས་མཐོ་ཞིང་རྩྭ་ཆུ་ལེགས་པས་དགེ་བཅུ་ཚང་བ་དང་ཐོན་ཁུངས་ཕུན་སུམ་ཚོགས་པ་མངའ་བའི་ས་ཆ་ཞིག་ཡིན་ནོ།།
ཡུལ་དེའི་ལོ་རྒྱུས་བཤད་པ་ལ། གདོད་མའི་བོད་ཀྱི་ལོ་རྒྱུས་ཞེས་བྱ་བ་རུ། གནའ་དུས་སུ་བོད་ཀྱི་གདུང་རྒྱུད་ཆཱང་གི་རྒྱུད་པ་རྣམས་ཀླུ་ཆུའི་འབབ་ཡུལ་དུ་འཚོ་ཞིང་གནས། ། དེའི་རྗེས་སྤུ་རྒྱལ་གྱི་གདུང་རྒྱུད་ལས་མཆེད་པའི་ཇོ་སྲས་ཀྱིས་མཚོ་སྔོན་ནས་གཞི་བཟུང་སྟེ་ཙོང་ཁའི་ཡུལ་ཆེན་བཅོ་བརྒྱད་དང་མདོ་སྨད་ཀྱི་ཡུལ་ཕལ་མོ་ཆེ་དབང་བསྒྱུར། དེའི་རྗེས་ས་སྐྱ་གོང་མ་རིམ་པར་བྱོན་པའི་མངའ་ཞབས་སུ་གཏོགས་པར་གྱུར། བོད་ཀྱི་རུས་ཆེན་བཞིའི་ནང་ཚན་གདོང་གི་རུས་སུ་གཏོགས་པའི་ལྡོང་ཚ་ཆེན་བཅོ་བརྒྱད་ལས་ཟམ་ཚ་དང་། ཨ་ལ། སྒྱིས་ཚང་སོགས་ཚོ་བ་ཤོག་པ་རྣམས་མཆེད་པར་གསུངས་སོ།།
ད་ལྟ་ཀླུ་ཆུ་རྫོང་ཁོངས་སུ་ཤང་ཁག་བདུན་དང་། སྒྱིས་ཚང་ནགས་རིང་དང་། ཨ་ལ། ཟམ་ཚ། ཆོས་འཁོར་སོགས་ཚོ་ཕྲན་ཉེར་བཞི་མངའོ།།
|
