༄༅།། ཕ་མའི་དྲིན་ལན་བསབས་པའི་སྙིང་བོ་བསྡུས་པ་བཞུགས་སོ།། - སྲོལ་རྒྱུན་སློབ་གསོ། - མདོ་ལྷོ་དྲ་བ།-甘南香巴拉在线
  中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > རིག་གནས་སློབ་གསོ། > སྲོལ་རྒྱུན་སློབ་གསོ། >
༄༅།། ཕ་མའི་དྲིན་ལན་བསབས་པའི་སྙིང་བོ་བསྡུས་པ་བཞུགས་སོ།།
དུས་ཚོད།2015-11-09 15:12:06     རྩོམ་གྱི་ཡོང་ཁུངས།མདོ་ལྷོ་དྲ་བ།     ཆུང་། | འབྲིང་། | ཆེ།
༄༅།། ཕ་མའི་དྲིན་ལན་བསབས་པའི་སྙིང་བོ་བསྡུས་པ་བཞུགས་སོ།།

                          རྩོམ་པ་པོ། བིས་པ་ངག་དབང་མི་ཕམ་ཟླ་བ།

ན་མོ། དུས་གསུམ་སངས་རྒྱས་ཐམས་ཅད་ཀྱི།།

མཁྱེན་བརྩེ་ནུས་པའི་རང་གཟུགས་སྤྱན་རས་གཟིགས།།

བླ་མ་སྐལ་ལྡན་རྒྱ་མཚོ་ཐུགས་རྗེ་ཅན།།

བདག་གི་དྲིན་ཅན་ཕ་མ་ཐུགས་རྗེས་སྐྱོངས།།

བླ་མ་ཁྱེད་ལས་ལྷག་པའི་སྐྱབས་གནས་མེད།།

ཕ་མ་འདི་བས་ལྷག་པའི་དྲིན་ཅན་མེད།།

ད་རེས་མིན་པ་དྲིན་ངོ་ཇི་ལྟར་ཤེས།།

དྲིན་ལན་མྱུར་དུ་བསབ་པར་ཅིས་ཀྱང་འདོད།།

འདོད་པ་ཇི་བཞིན་འགྲུབ་པར་བྱིན་གྱིས་རློབས།།

ཐུགས་རྗེ་མ་ཆུང་བླ་མ་སྤྱན་རས་གཟིགས།།

ཀྱེ་མ་བདག་དང་ཕ་མ་རིགས་དྲུག་རྣམས།།

མཐའ་མེད་འཁོར་བའི་འཇིགས་ལས་བསྐྱབ་ཏུ་གསོལ།།

འཁོར་བ་འདི་ལ་ཐོག་མཐའ་མ་མཆིས་པས།།
སྐྱེ་བ་འདི་ལ་གྲངས་ཤིག་ག་ལ་ཡོད།།

 

ལུས་རྟེན་འདི་འདྲ་མ་བླངས་བྱ་བ་དང་།།

ཡུལ་ཕྱོགས་འདི་རུ་མ་སྐྱེས་བྱ་བ་མེད།།

བདག་ནི་འཁོར་བ་ཁམས་གསུམ་གར་སྐྱེས་ཀྱང་།།

སྐྱེ་གནས་བཞི་བོ་གང་ཡང་རུང་བར་སྐྱེས།། 
དེ་ལས་མངལ་དང་སྒོང་སྐྱེས་ཐམས་ཅད་ནི།།

དྲིན་ཅན་ཕ་མ་དག་ལ་བརྟེན་ནས་སྐྱེས།།

སྐྱེ་བ་ཐོག་མ་མེད་ནས་ཡང་ཡང་དུ།།

ཕ་མར་གྱུར་ནས་དྲིན་གྱིས་བསྐྱངས་པ་ཡི།།

དྲིན་ཅན་ཕ་མ་འདི་དག་སྙིང་རེ་རྗེ།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།
སྐྱེ་བ་སྔོན་གྱི་ལས་དང་སྨོན་ལམ་མཐུས།།

ཚེ་འདིའི་ཕ་མ་བུ་ཚར་གྱུར་པ་ལས།།

བརྩེ་གདུང་ལྷག་པར་ཆེ་བའི་དྲིན་ཅན་མ།།

བླ་མ་སྤྱན་གཟིགས་ཀྱིས་ཐུགས་རྗེས་ཟུངས།།

ལྷ་བས་ལྷག་པའི་རྙེད་དཀའི་དོན་ཆེ་བ།།

ཆོས་བའི་མི་ལུས་ཡིད་བཞིན་ནོར་བུ་འདི།།

ད་ལྟ་གང་ལས་རྙེད་པའི་དྲིན་ཅན་མ།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

 

ཨ་མ་དྲིན་ཅན་ལུས་ཀྱི་སྒྲོམ་བུ་ནས།།

ཤ་ཁྲག་གདོས་བཅས་ཕུང་བོ་གཅེས་སྤྲས་ཀྱིས།།

ཟླ་ངོ་བཅུ་ལ་འཁུར་བའི་དྲིན་ཅན་མ།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

ཐུར་སེལ་རླུང་གིས་འབྱུང་བ་གཡོས་པའི་ཚེ།།

ཤ་རུས་ཁ་ཁར་འདྲལ་བའི་སྡུག་མྱོང་ཡང་།།

སེམས་ལ་མི་དགའ་མེད་པའི་དྲིན་ཅན་མ།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

མཇལ་ནས་ཁྲག་དང་ཆུ་སེར་ལྷན་ཅིག་ལུས།།

བཙས་མ་ཐག་ཏུ་གཙང་མའི་ཆབ་ཀྱིས་བཀྲུས།།

བྱི་དོར་གང་ལེགས་བགྱིས་པའི་དྲིན་ཅན་མ།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

ཤ་རུས་ཉོར་ཉོར་ལེན་སྣ་མེད་པའི་དུས།།

ལག་པས་འཇམ་པོར་བླངས་ནས་པང་དུ་བཟུང་།།

ཁ་སྣ་ལྕེ་ཡིས་ལྡག་པའི་དྲིན་ཅན་མ།།

བླ་མ་སྤྱན་གཟིགས་ཀྱིས་ཐུགས་རྗེས་ཟུངས།།

རང་ལུས་རང་གིས་སྐྱོབ་པའི་ནུས་པ་མེད།།

ཉི་ལྷགས་ཆར་གྱི་གདུང་བ་མྱུར་དུ་བསྐྱབས།།

གོམ་པ་ཙོག་པོར་འཇོག་པའི་དྲིན་ཅན་མ།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

ཁ་ཡིས་ཟས་སྙོད་མི་གཙང་ལག་པས་ཕྱིས།།

སྣབས་ལུད་དྲི་མ་ཁ་རུ་སོང་ན་ཡང་།།

སྣང་བ་ཞེན་པ་མ་ལོག་དྲིན་ཅན་མ།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

བྲང་ལ་ནུ་འབར་རྒྱས་པའི་འོ་འཛིན་ལས།།

བྱམས་པའི་ཤུགས་ཀྱི་ཟག་པའི་ནུ་ཞོའི་རྒྱུན།།

ནམ་འདོད་ཁ་རུ་བསྣུན་པའི་དྲིན་ཅན་མ།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

ཉིན་མཚན་མེད་པར་རུམ་ཕུག་དྲོ་བར་བཅུག།

མཚན་མོ་གཏུ་མིག་གཉིད་ཀྱིས་ནོན་པའི་ཚེ།།

གསོད་དོགས་ནུབ་གཉིད་ཆགས་པའི་དྲིན་ཅན་མ།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

 

འགྲང་དུས་འཛུམ་ཞིང་བགད་ན་སྤྲོ་བ་སྐྱེས།།

ལྟོགས་དུས་གཡོ་ཞིང་ངུ་བ་སྐད་ཅིག་ཀྱང་།།

མི་བཟོད་ནུ་མ་བསྣུན་པའི་དྲིན་ཅན་མ།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

རྐང་བཞི་དུད་འགྲོ་ལྟ་བུར་འགྲོ་བའི་དུས།།

ལག་མགོས་འཐེན་ནས་རྐང་གཉིས་འདེགས་འཇོག་གི།

གམ་ཙེ་གོམ་ཙེ་སློབ་པའི་དྲིན་ཅན་མ།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

དང་པོ་གླེན་པ་ལུག་ལྟར་ལྐུགས་པ་ཞིག།

ད་ལྟ་ཐམས་ཅད་སྨྲ་ཞིང་དོན་གོ་བའི།།

མི་སྐད་འདི་ཙམ་བསླབས་པའི་དྲིན་ཅན་མ།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

ལོ་གསུམ་དུས་སུ་གར་འགྲོ་མིག་གིས་འཚོ།།

ལོ་བཞི་ལ་སོགས་གང་ལོན་གཟུགས་ཚོད་ཀྱི།།

ཞྭ་གོས་ལྷམ་སོགས་བསྒྲུབས་པའི་དྲིན་ཅན་མ།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

ལོ་བཅུ་ལོན་ནས་རང་མགོ་ཐོན་པའི་ཚེ།།

སེམས་ཀྱི་ཁོ་ཐག་ཆོད་པའི་དགའ་སྐྱིད་དང་།།

རྟག་ཏུ་སྡོད་སྙམ་འགྲོགས་པའི་དྲིན་ཅན་མ།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

སྐྱེས་ཙམ་ཉིད་ནས་ཇི་སྲིད་འགྲོགས་པའི་བར།།

བྱམས་པས་བ ལྟ་ཞིང་སྙན་པའི་ཚིག་གིས་འབོད།།

བརྩེ་བའི་སེམས་ཀྱིས་སྐྱོང་སྐྱོང་བའི་དྲིན་ཅན་མ།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

བླ་མ་སངས་རྒྱས་གསུང་གིས་དྲན་གསོས་ནས།།

ཨ་མ་ཁྱོད་ཀྱི་སྐུ་དྲིན་ཡང་ཡང་དུ།།

བསམས་ན་ཡིད་རབ་གཡོ་བའི་དྲིན་ཅན་མ།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

 

བདག་གིས་སངས་རྒྱས་གོ་འཕང་ཐོབ་འདོད་ན་ཡང་།།

ཨ་མ་ཁྱོད་དྲིན་སྙིང་ནས་མ་བསམས་ཤིང་།།

གཅེས་པར་མ་བཟུང་ལམ་སྣ་ཟིན་ཐབས་མེད།།

སངས་རྒྱས་ཁྱོད་ལ་རག་ལས་དྲིན་ཅན་མ།།

ལམ་བཟང་མ་ནོར་སྟོན་པའི་བླ་མ་དང་།།

ལམ་དེ་གང་ལ་དམིགས་པའི་དྲིན་ཅན་མ།།

ལམ་མཆོག་བསྒྲུབ་ལ་དགོས་པ་ཁྱེད་མེད་ན།།

སྔོན་ཆད་དེ་ལྟར་མ་ཤེས་ཤིན་ཏུ་ནོངས།།

ཨ་མ་ཁྱོད་དྲིན་མ་བསམ་བློ་རེ་འགྱོད།།

དྲིན་ཅན་ཡལ་བར་དོར་བ་སྙིང་ནས་འགྱོད།།

མ་གུས་བརྙེས་སྨོད་བགྱིས་པ་མཐོལ་ལོ་བཤགས།།

ཁ་ལན་ངག་ལན་བགྱིས་པ་མཐོལ་ལོ་བཤགས།།

སེམས་དཀྲུགས་ཐུགས་དང་འགལ་བ་མཐོལ་ལོ་བཤགས།།

ངག་བཅག་གསུང་དང་འགལ་བ་མཐོལ་ལོ་བཤགས།།

མགོ་བསྐོར་རྫུན་གྱིས་བསླུས་པ་མཐོལ་ལོ་བཤགས།།

བསྙེན་བཀུར་ཚུལ་བཞིན་མ་བྱས་མཐོལ་ལོ་བཤགས།།

 

ཕ་དང་མ་ལ་གནོད་པའི་ལས་བྱས་པའི།།

སྡིག་ཅན་དེ་དག་སུས་ཀྱང་སྐྱོབ་ཐབས་དཀའ།།

སྔོན་ཚེ་སྟོན་པ་མཛའ་བོའི་བུ་མོ་རུ།།

འཁྲུངས་པའི་གཏམ་རྒྱུད་སོགས་ཀྱིས་ཡིད་ཆེས་སྐྱེ།།

ཕ་དང་མ་ལ་གུས་པས་བསྙེན་བཀུར་བའི།།

མི་ལ་བདེ་སྐྱིད་སྙན་གསུམ་ངེས་པར་ཆེ།།

སྔོན་གྱི་སངས་རྒྱས་བྱང་སེམས་ཐམས་ཅད་ཀྱི།།

མཛད་པ་རྣམ་ཐར་བསམ་ན་ཡིད་ཆེས་སྐྱེ།།

སྐྱེ་བ་འདི་ལ་དྲིན་ཅན་ཕ་མ་ཡིས།།

ཆོས་ལྡན་མི་ལུས་བསྐྱེད་པའི་དོན་པོ་ལ།།

ཆོས་ཤིག་བྱུང་ན་རང་སྐྱིད་གཞན་སྐྱིད་དེ།།

ཆོས་མཐུན་བསམ་པར་འགྲུབ་པར་བྱིན་གྱིས་རློབས།།

འཆི་བར་ངེས་ཤིང་ནམ་འཆི་ཆ་མེད་ལ།།

འཆི་ཚེ་ཆོས་མིན་གཞན་གྱིས་ཕན་པ་མེད།།

ཤི་ནས་མེད་དུ་མི་འགྲོ་སྐྱེ་ངེས་ཤིང་།།

སྐྱེ་བའང་ངན་འགྲོ་བདེ་འགྲོ་གཉིས་ལས་མེད།།

གར་ལས་ཀྱི་གཞན་དབང་མ་གཏོགས་པ།།

ད་ལྟ་རང་ལ་རང་དབང་ཅི་ཡང་མེད།།

སྡིག་ཅན་བཟོད་པར་དཀའ་བའི་ངན་འགྲོ་དང་།།

དགེ་བ་གང་བྱས་བདེ་ནས་བདེ་བར་འགྲོ།།

ངན་སོང་འཇིགས་ལས་སྐྱོབ་ནུས་དཀོན་མཆོག་གསུམ།།

སྐྱོབ་ཐབས་རང་གིས་མ་བྱས་སྐྱོབ་མ་ནུས།།

བྱ་རྒྱུ་ཆོས་ལས་མེད་པར་བློ་ཐག་ཆོད།།

ཆོས་ཞེས་བྱ་བ་སྡིག་སྤོང་དགེ་སྒྲུབ་ཡིན།།

སྐྱེས་པའི་ཐ་མ་ངེས་པར་འཆི་བ་ལ།།

ཁ་དྲག་ཅན་ཡང་ཅུང་ཟད་འདུག་དབང་མེད།།

གཅིག་ཏུ་འགྲོ་ལ་ཕན་པ་དམ་པའི་ཆོས།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

བསགས་པའི་ཐ་མ་ངེས་པར་འཛད་པ་ལ།།

སེར་སྣ་ཅན་ཡང་ཅུང་ཟད་འཁྱེར་དབང་མེད།།

གཅིག་ཏུ་འགྲོ་ལ་ཕན་པ་དམ་པའི་ཆོས།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

མཐོན་པའི་ཐ་མ་ངེས་པར་རྒུད་པ་ལ།།

ང་རྒྱལ་ཅན་ཡང་ཅུང་ཟད་འགྱིང་དབང་མེད།།

གཅིག་ཏུ་འགྲོ་ལ་ཕན་པ་དམ་པའི་ཆོས།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

འགྲོགས་པའི་ཐ་མ་ངེས་པར་འབྲལ་བ་ལ།།

བརྩེ་དུང་ཅན་ཡང་ཅུང་ཟད་འགྲོགས་དབང་མེད།།

གཅིག་ཏུ་འགྲོ་ལ་ཕན་པ་དམ་པའི་ཆོས།།

བླ་མ་སྤྱན་རས་གཟིགས་ཀྱིས་ཐུགས་རྗེས་ཟུངས།།

 

མ་ཁྱོད་འདི་ནས་གཅིག་པུར་འགྲོ་བའི་ཚེ།།

ང་དང་ཁྱོད་དང་སྤྱན་གཟིགས་མགོན་གསུམ།།

མཇལ་བའི་སྨོན་ལམ་འཚལ་ལོ་དྲིན་ཅན་མ།།

ཚེ་འདིར་ཡུན་རིང་འགྲོགས་པའི་དུས་ཀྱི་མཐར།།

མནར་སྤྱོད་སྡུག་བསྔལ་མེད་པར་དགའ་བཞིན་དུ།།

ཞིང་མཆོག་བདེ་བ་ཅན་དེར་སྐྱེ་བར་ཤོག།

སྐྱེས་ནས་བླ་མ་སངས་རྒྱས་མཇལ་བར་ཤོག།

མཇལ་ནས་བྱང་ཆུབ་ལུང་བསྟན་ཐོབ་པར་ཤོག།

ཐོབ་ནས་སེམས་ཅན་དོན་རྣམས་བྱེད་པར་ཤོག།

བླ་མ་སྤྱན་རས་གཟིགས་དབང་ཐུགས་རྗེ་ཅན།།

སྨོན་ལམ་ཐམས་ཅད་འགྲུབ་པར་བྱིན་གྱིས་རློབས།།

 

དེར་སྨྲས་པ།

དམ་པའི་གསུང་ལ་བཅོས་སླད་མི་འོས་ཀྱང་།།

ཕལ་བའི་ངག་སྒྲོས་བྱི་དོར་བགྱིས་པ་འདི།།

མི་ཕམ་དབྱངས་ཅན་དགའ་བའི་བློ་གྲོས་ཀྱིས།།

མི་ཕམ་དཀོན་མཆོག་ཅེས་བྱའི་འདོད་ངོར་སྨྲས།།

དད་མེད་རྣམས་ལ་དོན་དུ་མི་འགྱུར་ཡང་།། 

དད་པ་ཅན་ལ་ཅི་ཡང་ཕན་པར་སྲིད།།

རྡོ་ཐོག་མྱུ་གུའི་རེ་བ་མ་མཆིས་ཀྱང་།།

ཞིང་ལ་ས་བོན་གང་བཏབ་སྐྱེ་ལ་ལྟོས།།

བསོད་ནམས་གསེར་གྱི་ཐུར་མ་རིང་བོ་དེས།། 

རང་གཞན་ཀུན་གྱི་བློ་གྲོས་མིག་ཕྱེ་ནས།།

སྟོང་ཉིད་སྙིང་རྗེའི་སྙིང་བོ་ཅན་གྱི་ཡུམ།།

རང་ཞལ་རྗེན་པར་མཐོང་བའི་སྐལ་བཟང་ཤོག། །

                          རྩོམ་སྒྲིག་པ། དངོས་སྦྱོང་སློབ་མ་བཀྲ་ཤིས་ཚེ་རིང་།

Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།