ཁྱིམ་ཚང་སློབ་གསོ་ནི་སློབ་གྲྭའི་སློབ་གསོ་དང་སྤྱི་ཚོགས་སློབ་གསོའི་རྨང་གཞིའམ་གྲུབ་ཆ་གཙོ་བོ་དང་། མིའི་རིགས་ཀྱི་ཡུན་རིང་སློབ་གསོའི་གནས་གཞི་ཡིན་ཏེ། ཁྱིམ་ཚང་གི་ཕ་མའི་རྒྱུན་རིང་འཚོ་བའི་ཉམས་མྱོང་སྟེང་ནས་བུ་དང་བུ་མོར་སློབ་གསོའི་ཐབས་ལམ་སྣ་ཚོགས་སྤྱད་དེ་ལུས་སེམས་སྐྱོན་གྱིས་མ་གོས་པར་སློབ་གྲྭའི་སློབ་གསོ་ནས་སྤྱི་ཚོགས་སློབ་གསོའི་བར་གྱི་བགྲོད་ལམ་ཐམས་ཅད་ལེགས་འགྲུབ་ཡོང་བར་བྱེད་ཐུབ།
ཁྱིམ་ཚང་སློབ་གསོའི་ཁྲོད་བྱུང་བའི་ནོར་འཁྲུལ་སྣ་ཚོགས།
ད་ལྟ་བོད་ཀྱི་ཁྱིམ་ཚང་སློབ་གསོའི་ཁྲོད་ནོར་འཁྲུལ་སྣ་ཚོགས་པ་ཞིག་བྱུང་དང་འབྱུང་མུས་སུ་ཡོད་དེ། གྲོང་ཁྱེར་ན་གནས་པའི་བོད་རིགས་ཁྱིམ་ཚང་གི་ཕ་མ་མང་པོས་ཕུགས་ལམ་རིང་མོའི་དགེ་སྐྱོན་ལ་མནོ་བསམ་མི་གཏོང་བར། དང་པོ་ནས་བྱིས་པ་རྣམསལ་ལ་རྒྱའི་སྐད་ཡིག་ཁོ་ན་བསླབས་ཏེ་མི་རིགས་ཀྱི་འདུ་ཤེས་དང་ཡུལ་སྲོལ་གོམས་གཤིས་མེད་དུ་འཇུག་པ་ནི་ཁྱིམ་ཚང་སློབ་གསོའི་རྩ་བའི་ཞན་ཆ་ཡིན་ཞིང་བོད་རིགས་ཕམ་བརླག་ཏུ་འགྲོ་བའི་སྦྱོར་བའང་འདི་ལས་མེད་དེ། སི་ཏ་ལེན་གྱིས“མི་རིགས་ཤིག་ལོ་རྒྱུས་ཐོག་ཡུན་རིང་གནས་དགོས་ན། དེའི་སྐད་ཡིག་བཀོལ་སྤྱོད་དང་གོང་འཕེལ་གཏོང་དགོས། གལ་ཏེ་དེ་ལས་ལྡོག་ནས་མི་རིགས་ཤིག་རྩ་མེད་དུ་གཏོང་དགོས་ན། སྔོན་ལ་མི་རིགས་དེའི་སྐད་ཡིག་མེད་པར་བཟོས་ན་མི་རིགས་དེ་རང་ཤུགས་ཀྱིས་མེད་པར་འགྱུར་འགྲོ”ཞེས་གསུངས་པས་སོ།། དེས་ན་གྲོང་ཁྱེར་དུ་གནས་པའི་བོད་རིགས་ཕ་མ་རྣམས་ཀྱིས་རང་གི་བུ་ཕྲུག་ལ་བོད་རང་ཉིད་ཀྱི་སྐད་ཡིག་བསླབས་ཏེ་མི་རིགས་ཀྱི་གོམས་གཤིས་དང་འདུ་ཤེས་ཆགས་སུ་འཇུག་དགོས་པ་དང་། གཙོ་བོ་མི་རིགས་རང་ཉིད་ཀྱི་གཞུང་ལུགས་སྦྱང་བརྩོན་དང་རྒྱུན་འཛིན་གྱི་སྒོ་ནས་རྒྱལ་ཁབ་ལ་བྱས་རྗེས། མི་རིགས་སྔོན་ཐོན་ཅན་དུ་བསྒྱུར་བ་སོགས་ལ་བརྩོན་ལེན་བྱེད་དགོས་པའི་བསླབ་སྟོན་དང་སྐུལ་མ་གནང་རྒྱུ་ནི་གྲོང་ཁྱེར་ཁྱིམ་ཚང་སློབ་གསོའི་ཐབས་ལམ་གཙོ་ཤོས་རེད།
ཡང་དག་པའི་སློབ་གསོའི་མདུན་ལམ་འཚོལ་བ།
ཞིང་འབྲོག་མང་ཚོགས་ཀྱི་རྒན་བགྲེས་མང་ཆེ་བ་ཡིག་རྨོངས་པ་ཡིན་ཞིང་། བསམ་བློར་བསྒྱུར་བཅོས་དེ་ཙམ་མ་ཐོབ་པས་བུ་ཕྲུག་སློབ་གྲྭར་མི་སྐྱེལ་བར་ཆུང་དུས་ནས་ཕྱུགས་རྫི་དང་ཞིང་ལས་སོགས་བསླབ་ཏེ་གུ་དོག་པའི་རྐང་ལམ་ཕྲ་མོ་ཞིག་འདེད་དུ་བཅུག་པ་དང་། བྱིས་པ་མང་པོ་ཞིག་བསམ་མ་ཤེས་གོང་ནས་གྲྭ་བ་བྱས་ཏེ་སྤྱི་ཚོགས་སློབ་གསོ་དང་། ཚན་རིག་སློབ་གསོ་སོགས་མྱོང་མ་ཐུབ་པ་ཡང་མི་རིགས་རྗེས་ལུས་ཀྱི་གཞི་རྩ་ལ་འབྲེལ་བ་དམ་ཟབ་ཡོད་པས་བྱིས་པ་རྣམས་ལ་ཐོག་མ་ནས་ཁ་ཕྱོགས་མ་ནོར་བའི་མདུན་ལམ་འཚོལ་བ་དང་སློབ་གསོའི་བརྒྱུད་རིམ་ཆ་ཚང་འཐོབ་ཐབས་ལ་འབད་ན་བོད་མི་རིགས་ཀྱི་སློབ་གསོ་མགྱོགས་མྱུར་ངང་འཕེལ་རྒྱས་དང་། རྗེས་ལུས་ཀྱི་ལྷམ་ཧྲིལ་དོར་ཏེ་སྔོན་ཐོན་མི་རིགས་དག་གི་གྲལ་དུ་བགྲོད་པར་དཀའ་ལས་ཆེར་མེད་སྙམ།།
རྩོམ་སྒྲིག་པ། ཀླུ་འབུམ་ཚེ་རིང་།
|
