中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > ཆོས་ལུགས། > གསུང་རབ། >
༄༅།། རོལ་མོའི་བསྟན་བཅོས་ལས་སྦྱོར་བ་གཏན་ལ་དབབ་པ་སྟེ་ལེའུ་གསུམ་པའོ།
དུས་ཚོད།2016-12-07 15:47:45     རྩོམ་གྱི་ཡོང་ཁུངས། ཙོང་ཁ་པའི་རིག་གཞུང་འཕྲིན་སྟེགས། མཛད་པ་པོ། ས་པཎ།    ཆུང་། | འབྲིང་། | ཆེ།
      དབྱངས་དང་ཚིག་གི་དོན་ཤེས་པས།། ཕྱི་ནས་སྦྱོར་བ་རབ་ཏུ་བརྩམ།། རང་དང་རྗེས་སུ་འཚམ་པ་ཡི།། གྲོགས་པོ་ཉེ་བར་བཞག་པར་བྱ།། གླུ་ནི་ཀུན་ཏུ་བསྒྱིངས་ཚུལ་གྱིས།། ལངས་ལ་ལག་པ་འགྲམ་པར་བཞག། མཆོད་ལ་ཁྲུས་བྱས་མིག་ཕབ་སྟེ།། དང་བས་སྐྱིལ་ཀྲུང་བཟང་པོ་བཅའ།། རྟོག་བརྗོད་ལག་པའི་བརྡ་སྤྲོད་པའི།། ཙོག་པུའམ་བཟང་པོའི་འདུག་སྟངས་ཡིན།། བཤགས་པ་ཀུན་ཏུ་གནོང་ཚུལ་གྱིས།། པུས་བཙུགས་ཐལ་མོ་སྦྱར་ཏེ་འདུད།། དེ་བཞིན་བསྟོད་ལ་སྤྲོ་བའི་ཚུལ།། སྨད་དང་འགྲན་ལ་ཐིགས་པའི་ཚུལ།། རྟོགས་པ་བརྗོད་ལ་གོ་བའི་ཚུལརྗེས་སུ་གདམས་ལ་མན་ངག་ཚུལ།། བཤགས་ལ་ཉམ་ཐག་ཚུལ་ཡིན་ཏེ།། དགའ་ལ་དགའ་བའི་ཚུལ་ཡིན་ནོ།། རྐང་པ་ལ་སོགས་རྗེས་བསྟུན་ལ།། དེ་དང་རྗེས་མཐུན་དབྱངས་ཉིད་དོ།། དེ་ལྟར་བརྗོད་ན་འཇིག་རྟེན་དང༌།། རྗེས་སུ་མཐུན་ཞིང་མཛེས་པར་འགྱུར།། སྤྱིར་ནི་འཇིག་རྟེན་འདི་ན་ཡང༌།། ཡུལ་དང་དུས་ཀྱི་བྱེ་བྲག་དང༌།། རྒན་དང་གཞོན་ནུའི་དབྱེ་བ་དང༌།། སྐྱེས་དང་བུད་མེད་ལ་སོགས་པའི།། ཁྱད་པར་ཉིད་ཀྱིས་མི་འདྲ་བའི།། དབྱངས་ཀྱི་སྦྱོར་བ་དུ་མ་མཐོང༌།། དབུས་པ་རྣམས་ཀྱིས་ལྡིར་ཞིང་འགྱུར།། གཙང་པ་འཚེར་ཞིང་གསལ་བ་ཡིན།། བཙིར་ཞིང་མདུད་པ་མངའ་རིས་པ།། ཁམས་པ་རྣམས་ནི་བརྗིད་ཅིང་གྱོང༌།། དེ་ལྟར་དེ་དག་རྣམས་ལ་ཡང༌།། སོ་སོར་ཕྱེ་ན་རྣམ་པ་མང༌།། མདོར་ན་སྐད་གདངས་བྱེ་བྲག་གིས།། རང་ལ་ལྷན་ཅིག་སྐྱེས་པ་ཡི།། འགྱུར་གྱི་བྱེ་བྲག་ཤེས་པར་བྱ།། སློབ་དཔོན་གཞན་གྱིས་བསྒྱུར་ན་ནི།། ཚོན་རྩི་བཞིན་དུ་བསྒྱུར་དུ་རུང༌།། སྔོན་གྱི་དབྱངས་མཁན་ཚིག་ལ་མཁས།། ད་ལྟ་རྣམས་ནི་དབྱངས་ལ་སྦྱོང༌།། ཕྱི་མའི་དུས་ཀྱི་དབྱངས་མཁན་རྣམས།། མི་མཁས་བློ་ཆུང་གླུ་ལ་དགའ།། ཅི་ཡང་མེད་ཀྱང་འཚེར་འགྱུར་སྙམ།། གཞོན་ནུའི་ཚེ་ན་འགྱུར་ཁུགས་བདེ།། དར་ལ་བབ་ན་མགྲིན་པ་བཟང༌།། རྒན་པར་འགྱུར་ནས་ཚིག་ལ་མཁས།། ཕལ་ཆེར་བུད་མེད་རྣམས་ཀྱི་ཕྲ།། སྐྱེས་པ་རྣམས་ཀྱི་སྦོམ་པ་ཡིན།། གཞོན་ནུའི་ཚེ་ན་ཕྲ་བ་སྟེ།། དར་ལ་བབ་ན་སྦོམ་པར་འགྱུར།། རྒན་པ་རྣམས་ཀྱི་མགྲིན་པ་ཞུམ།། བ་ཚྭ་ཅན་གྱི་ཆུ་འཐུང་ཞིང༌།། སྣུམ་བག་ཅན་གྱི་ཁ་ཟས་ཟ།། ལྷགས་པ་ཅན་གྱི་གནས་འདུག་པའི།། མི་རྣམས་ཕལ་ཆེར་མགྲིན་པ་སྦོམ།། དེ་ལས་བཟློག་པ་ཕྲ་བ་ཡིན།། རྣ་བར་སྙན་པར་འགྱུར་ཁུགས་དང༌།། གཅོད་མཚམས་དང་ནི་ངག་སྙན་པ།། སྡེབས་མཁས་པ་ལས་བྱུང་བ་ཡིན།། དེ་ཡང་སྦྱངས་པའི་སྟོབས་ལས་འབྱུང༌།། མདོར་ན་ཐོག་མའི་སློབ་དཔོན་གྱི།། རྗེས་སུ་ཕྱི་མ་འཇུག་པར་འགྱུར།། དེ་ནས་དབྱངས་ཀྱི་སྦྱོར་བ་རྣམས།། དཔེ་ཡི་མིང་གིས་བཤད་པར་བྱ།། འདྲེན་པ་དཔག་བསམ་ལྗོན་ཤིང་སྟེ།། བཀུག་པ་མེ་ཏོག་འཁྲི་ཤིང་ཡིན།། དབུས་ཞན་ཆུ་ཀླུང་དལ་འགྲོ་བ།། འགྱུར་ཁུགས་རྒྱ་མཚོའི་ཟླ་བར་བཤད།། ཚོགས་སུ་སེང་གེའི་ང་རོ་སྟེ།། དབེན་པར་བུང་བ་རོལ་བའི་ཚུལ།། མཁས་པའི་མདུན་སར་ནེ་ཙོའི་དབྱངས།། རྨ་བྱའི་འཇོ་སྒེག་རྨཽངས་ནང་དུ།། སྐྱོ་ཚེ་དང་བ་ཀུན་འདྲེན་པ།། རྗེས་སུ་དགའ་བ་འདོད་ལྷའི་མདའ།། མཆོད་ལ་དགེ་བའི་མེ་ཏོག་སྟེ།། བ་ཚྭའི་ཆུ་ཀླུང་སྡིག་སྦྱོང་ལ།། རང་ཕྱོགས་བསྟོད་ན་ལྷ་ཡི་རྔ།། ཕ་རོལ་སྨོད་ན་འཁོར་ཟིལ་གནོན།། ཀུན་ཏུ་སྙན་པ་དྲི་ཟའི་དབྱངས།། སྤེལ་བ་མེ་ཏོག་ཕྲེང་ལྡན་ཡིན།། དེ་ལ་སོགས་པའི་རྣམ་པ་ཡིས།། འདྲེན་པའི་ཁྱད་པར་ལེགས་བརྟགས་ཏེ།། དབྱངས་ཀྱི་སྦྱོར་བ་གཞན་ལ་ཡང༌།། ཇི་ལྟར་འཚམ་པ་སྦྱར་བར་བྱ།། དེ་ལྟར་ཤེས་པའི་མཁས་པ་ལ།། ཀུན་ཏུ་འཇུག་པའི་གདམས་ངག་བཤད།། དལ་བ་ལ་ནི་མི་འཚམས་ཤིང༌།། མྱུར་བ་ལ་ནི་མ་བརྡབས་ལ།། འབྲེལ་བའི་ཚེ་ན་མ་འདྲེས་པ།། དབུགས་འཇམ་མ་ཞུམ་སྤོབས་པའི་གནད།། དབྱངས་སྦྱོར་མང་ན་དོན་གོ་ཆུང༌།། བདེ་འབྱམ་མང་ན་ཐ་མལ་སྐྱོ། ། ཧ་ཅང་ཐལ་ན་མཁས་པས་ཁྲེལ།། རན་པར་སྤེལ་བ་དུས་ཀྱི་གནད།། ཀུན་ལ་མཁས་པས་རང་ཉིད་སྤྲོ།། འགྱུར་ཁུགས་འབྱོངས་པས་ངག་ལ་བྱམས།། ཚིག་སྦྱོར་ལེགས་པས་གཞན་ལ་སྙན།། འཇམ་ཞིང་འཕྲོད་པ་སྦྱངས་པའི་གནད།། ཧ་ཅང་རྒོད་དང་ཐིམས་པ་དང༌།། དོན་མ་རྟོགས་དང་མི་སྤྲོ་བ།། གཞན་དུ་ཡེངས་པ་བློ་ཡི་སྐྱོན།། ཟུར་མ་ཕྱིན་དང་ཟློས་པ་དང༌།། ཚིག་ལྷད་ཅན་དང་མི་གསལ་བ།། གཅོད་མཚམས་ནོར་བ་ཚིག་གི་སྐྱོན།། དབྱངས་ལ་འཕེལ་འགྲིབ་རྟབ་པ་དང༌།། ཧ་ཅང་མགྱོགས་བུལ་བཙིར་ནས་འདོན།། བཅོས་ཤིང་སྨྲ་བ་གདངས་ཀྱི་སྐྱོན།། རྣམ་འགྱུར་ཡ་ཡོ་བཞིན་སྡུད་དང༌།། མི་ལྟ་བ་དང་ཕྱུགས་ལྟར་བལྟ།། གཟིར་དང་འཚབ་པ་ལུས་ཀྱི་སྐྱོན།། སྔོན་ལ་འགྲོ་དང་ཕྱིས་ནས་འཐེན།། ཆེ་དང་ཆུང་དང་མི་བསྲེ་དང༌།། མཁས་འདོད་བྱེད་པ་གྲོགས་ཀྱི་སྐྱོན།། ཀུན་ཏུ་གཡེངས་དང་ཕན་ཚུན་སྨྲ།། ཆེད་ཆེར་མི་འཛིན་མ་རངས་དང༌།། དོན་གོ་མེད་པ་ཉན་པའི་སྐྱོན།། ཚིག་ལ་རྨོངས་ལ་བརྙས་པའི་རྒྱུ།། དབྱངས་སྦྱོར་མེད་ན་བཞད་གད་རྒྱུ།། དུས་ཚོད་མེད་ན་སྐྱོ་བའི་རྒྱུ།།དགོས་པ་མེད་ན་སྡིག་པའི་རྒྱུ།། མཁས་པ་འདུས་ཤིང་མང་པོས་བསྐོར།། གྲོགས་པོ་ངན་ཞིང་འགྲན་ཟླ་མང༌།། སྦྱངས་པ་ཆུང་ཞིང་སྤོབས་པ་ཞན།། བློ་གྲོས་ངན་པ་སྡུག་པའི་རྒྱུ།། དེ་ལྟར་མི་མཐུན་ཕྱོགས་མང་ན།། ཇི་ལྟར་གྱུར་ཀྱང་དོར་བར་བྱ།། གལ་ཏེ་ཐམས་ཅད་ཕུན་ཚོགས་གྱུར།། མཁས་པས་དགེ་བ་སྤེལ་ཕྱིར་བླང༌།། དེ་ལྟར་ཤེས་ནས་རྐྱེན་གཞན་ལས།། བྱུང་བའི་རོལ་མོ་རྣམས་ལ་འབད།། གླིང་བུ་པི་ཝང་རྫ་རྔ་དང༌།། ཁར་རྔ་རྔ་ཟླུམ་རྔ་བོ་ཆེ།། རྔ་ཕྲན་ཆ་ལང་ཀ་ཎ་ཊི།། དུང་དང་རྒྱུད་མངས་ལ་སོགས་པ།། ཇི་སྙེད་སིལ་སྙན་སྦྱོར་བཤད་པ།། དེ་སྙེད་ལ་ནི་མཁས་པར་བྱ།། ཕྱི་ནས་རོལ་མོ་ཀུན་འདུས་པའམ།། སོ་སོ་ཉིད་ཀྱིས་རྣམ་པར་རྩེན།། དབུས་འགྱུར་ཚལ་ན་གཏམ་རྒྱུད་ཀྱི།། ཟློས་གར་བྱེད་པས་ཐམས་ཅད་སྦྱོར།། མཐའ་འཁོབ་འདི་ན་དེ་ལྟ་བུ།། བྱེད་པའང་ལྟ་ཞོག་ཐོས་པའང་དཀོན།། འདིར་ཡང་གཞུང་མངས་དྭོགས་པས་ན།། སིལ་སྙན་སྦྱོར་བ་ངས་མ་བཤད།། གལ་ཏེ་དོན་དུ་གཉེར་རྣམས་ལ།། ཕྱི་ནས་གཞན་དུ་བཤད་པར་བྱ།། འདི་ནི་ཀུན་ཏུ་གཡེང་བ་དང༌།། ཀྱལ་བའི་རྒྱུ་ཕྱིར་རྒྱལ་བས་བཀག། འོན་ཀྱང་དཀོན་མཆོག་མཆོད་པ་དང༌།། གཞན་གྱི་དོན་ལ་ཉེས་པ་མེད།། དེས་ན་མགོན་མེད་ཟས་སྦྱིན་གྱིས།། ཞུས་ཚེ་དགེ་སློང་རྣམས་ལ་གནང༌།། རྒྱལ་སྲས་རྣམས་ཀྱིས་མི་བསླབ་པ།། དེ་ནི་གང་ཡང་ཡོད་མིན་གསུངས།། དྲུག་ལས་སྐྱེ་སོགས་གླུའི་སྦྱོར་བ།། རྒྱལ་བས་གསུངས་པ་དུ་མ་མཐོང༌།། གལ་ཏེ་ཁྱོད་ཀྱང་གླུའི་སྦྱོར་བ།། དེ་ཉིད་ཁྱད་པར་རིགས་ཤེ་ན།། སྐད་དང་གདངས་ཀྱི་ཁྱད་པར་གྱིས།། བོད་ཀྱི་སྒྲ་ལ་འཇུག་པར་དཀའ།། དེས་ན་དྲུག་ལས་སྐྱེས་སོགས་ཀྱི།། གླུ་ཡི་སྦྱོར་བ་འདིར་མ་བཤད།། ལྐོག་མ་ཉེད་པ་ལ་སོགས་པ།། ཐུབ་པས་ཇི་སྙེད་གསུངས་པ་གང༌།། བོད་ཀྱི་སྒྲ་དང་མཐུན་པ་རྣམས།། འདི་ཡི་ནང་ན་འདུ་ཤེས་བྱོས།། རོལ་མོའི་བསྟན་བཅོས་ལས་སྦྱོར་བ་གཏན་ལ་དབབ་པ་སྟེ་ལེའུ་གསུམ་པའོ།།
རྩོམ་སྒྲིག་པ། ཀླུ་འབུམ་ཚེ་རིང་།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།