中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > ཆོས་ལུགས། > གསུང་རབ། >
༄༅།། དགེ་ལུགས་པའི་སྐྱེས་ཆེན་དམ་པའི་ལེགས་བཤད་གསེར་གྱི་ཐང་མ།
དུས་ཚོད།2017-01-06 15:48:00     རྩོམ་གྱི་ཡོང་ཁུངས། དགེ་ལུགས་དྲ་བ།    ཆུང་། | འབྲིང་། | ཆེ།
རྗེ་ཙོང་ཁ་་ཆེན་པོའི་ཞལ་ནས།
དགེ་བ་ཅུང་ཟད་ཙམ་ཡང་རྒྱལ་སྲས་ཀྱི།།
ཐབས་མཁས་སྨོན་ལམ་མཆོག་གིས་ཟིན་གྱུར་ན།།
འབྲས་བུ་དམན་པའང་ཕུལ་དུ་འབྱུང་འགྱུར་ཞིང༌།།
མྱུར་དུ་འཛད་པའང་ནམ་ཡང་མི་ཟད་པར།།
གསུངས་ཕྱིར་དུས་གསུམ་དགེ་བ་ཅི་མཆིས་པ།།
རླབས་ཆེན་སྨོན་ལམ་རྣམས་ཀྱིས་བསྒྱུར་བ་ལ།།
མཁས་པ་སུ་ཞིག་རབ་ཏུ་བརྩོན་མི་བྱེད།།
 
རྗེ་ཙོང་ཁ་་ཆེན་པོའི་ཞལ་ནས།
    ཉི་མ་རེ་རེ་བཞིན་འཆི་བའི་གྲབས་བྱས་ན་ནི་འཇིག་རྟེན་ཕ་རོལ་གྱི་དོན་མང་པོ་འགྲུབ་པས་མ་ཤི་ན་ཡང་དེ་བྱས་པ་ལེགས་ལ། ཤི་ན་ནི་ཁྱད་དུ་དེ་དགོས་པ་ཡིན་ནོ།།

གུང་ཐང་འཇམ་པའི་དབྱངས་ཀྱི་ཞལ་ནས།
འདི་ཕྱིའི་སྐྱབས་སུ་བླ་མ་བསྟེན་ན་ཡང་།།
བདེན་ཁ་རང་གི་བཟུང་བ་ཡིད་རེ་མུག།



ཞང་སྟོན་བསྟན་པ་རྒྱ་མཚོའི་ཞལ་ནས།
         རང་རེ་ཚོས་ཆོས་ལ་འབད་འབད་ཅི་ཙམ་བྱས་རུང་ཕན་ཡོན་ཕྱོགས་འགྲོ་ཙམ་ཡང་ཡོང་རྒྱུ་མེད་པ་འདི་ལམ་རིམ་ལ་བློ་མ་སྦྱངས་པ་འདིས་ལན་འདུག དཔེར་ན་རྡོ་དང་རུས་པ་གཉིས་ཀ་ཐུག་ན་རྐང་གཅོག་ཐུབ་པ་ཐག་ཆོད་ཡིན་ཀྱང་། རྡོ་རུས་གཉིས་ཀ་མ་ཐུག་པར་ཅི་ཙམ་གཟས་ན་ཡང་ཆོག་རྒྱུ་མེད་པ་ལྟར་ཡིན་པས། དམ་པ་གོང་མས་ཆོས་ལ་རྡོ་རུས་ཐུག་དགོས་གསུངས་པ་རེད།




ཞང་སྟོན་བསྟན་པ་རྒྱ་མཚོའི་ཞལ་ནས།
     རང་གི་སེམས་རྒྱུད་ལ་ཆོས་ཤིག་མ་སྐྱེས་པར་ཡར་འགྲོ་ཚུལ་མེད། ལམ་རིམ་ལ་བློ་མ་སྦྱངས་ན་གསང་སྔགས་ཀྱི་ཆོས་ཟབ་མོ་ཅི་ཙམ་ཉམས་སུ་བླང་ཀྱང་ཆོས་སུ་འགྲོ་བ་ཡང་དཀའ། འཆད་རྩོད་རྩོམ་གསུམ་ལ་ཐོགས་པ་མེད་ཀྱང་ཆོས་ལ་བག་ཆགས་ཞོག་ཙམ་མ་གཏོགས་ངན་སོང་གི་རྒྱུར་འགྲོ་བ་ཡང་ཡོད། དེས་ན་ལམ་གྱི་རིམ་པ་ཞེས་པ་ནི་སྐྱེས་བུ་ཆུང་འབྲིང་ཆེ་གསུམ་གྱི་ལམ་ལ་བློ་མ་སྦྱངས་པར་སངས་རྒྱས་ལྟ་ཅི།ཐར་བ་ཙམ་ཡང་ཐོབ་ཚུལ་མེད།


དབལ་མང་དཀོན་མཆོག་རྒྱ་མཚོའི་ཞལ་ནས།
 
            སློབ་མས་སྐྱོན་ཡོན་འདྲེས་མ་མ་གཏོགས་ཉམས་སུ་ལེན་མི་ནུས་པས་བླ་མས་སྐྱོན་ཡོན་འདྲེས་མའི་མཛད་པ་སྟོན་དགོས་པའི་རྒྱ་མཚན་དེ་ལ་ཐུག
 
ཞང་སྟོན་བསྟན་པ་རྒྱ་མཚོའི་ཞལ་ནས།
       བླ་མའི་རྣལ་འབྱོར་ཞེས་པའང་དད་གུས་ལ་རག་ལས་པ་ཡིན་གྱི། བླ་མ་དངོས་སུ་མཐོང་ནས་དད་པ་མི་སྐྱེ་ན་ལྐོག་ནས་བསྒོམ་ནས་ཅི་ཞིག་བྱ།
 
 
ཞང་སྟན་བསྟན་པ་རྒྱ་མཚོའི་ཞལ་ནས།
     དད་པ་འདུག་གམ་མི་འདུག་རང་གིས་རང་ལ་ཞུ་དག་གཏོང་བ་མ་གཏོགས་གཞན་གྱིས་ང་ལ་བཤད་ན་ཁོང་ཁྲོ་སྐྱེ་འོང་།
  
པཎ་ཆེན་བློ་བཟང་ཆོས་རྒྱན་གྱི་ཞལ་ནས།
མདོར་ན་བྱིས་པ་རང་དོན་ཁོ་ན་དང༌།།
ཐུབ་དབང་གཞན་དོན་འབའ་ཞིག་མཛད་པ་ཡི།།
སྐྱོན་དང་ཡོན་ཏན་དབྱེ་བ་རྟོགས་པའི་བློ།།
བདག་གཞན་མཉམ་བརྗེ་ནུས་བར་བྱིན་གྱིས་རློབས།།
 
ཐུའུ་བཀྭན་ཆོས་ཀྱི་ཉི་མའི་ཞལ་ནས།

ནོར་ལ་འཛིན་ཆགས་ཆུང་ན་བཟང་མོད་ཀྱང་།།
ནོར་མེད་སྤྲང་བོ་ཀུན་གྱིས་མཐོང་ས་མེད།།

ཕྱུག་པོའི་ཁྱི་ཡང་གྲལ་མགོར་འཇོག་དུས་འདིར། །
ནོར་རྫས་ཅུང་ཟད་གསོག་པ་སྙིང་གཏམ་ཡིན། །


པཎ་ཆེན་བློ་བཟང་ཆོས་རྒྱན་གྱི་ཞལ་ནས།
རང་ཉིད་གཅེས་འཛིན་རྒུད་པ་ཀུན་གྱི་སྒོ།།
མ་རྣམས་གཅེས་འཛིན་ཡོན་ཏན་ཀུན་གྱི་གཞི།།
དེ་ཕྱིར་བདག་གཞན་བརྗེ་བའི་རྣལ་འབྱོར་ལ།།
ཉམས་ལེན་སྙིང་བོར་བྱེད་པར་བྱིན་གྱིས་རློབས།།
 
བསྟན་དར་ལྷ་རམས་པའི་ཞལ་ནས། 
མང་དུ་ཐོས་ཀྱང་འཆད་ལ་མི་མཁས་ན།།
ལྕེ་བརྒྱ་སྤྲུལ་ནས་སྨྲས་ཀྱང་ལྐུགས་པ་ཡིན།།
རྩོད་ལ་མཁས་ཀྱང་རྩོམ་ཚུལ་མི་ཤེས་ན།།
མཁས་པའི་སྙན་པ་རང་དང་མཉམ་དུ་འཆི།།
ཁ་ནས་རྩོམ་ཡང་སུག་བྲིས་མི་འབྱོར་ན།།
དཔའ་རྩལ་ཆེ་བའི་དཔའ་བོ་ལག་རྡུམ་འདྲ།།
རྩོམ་ཚིག་ཡི་གེ་གཞུང་བཞིན་མ་བྱུང་ན།།
མཁས་པ་ཁྲེལ་ཞིང་དོན་ལོག་སྟོན་ཉེན་ཆེ།།
ཡི་གེ་དག་ཀྱང་སྙན་ངག་མི་ལྡན་ན།།
ཡིད་འོང་མཛེས་མར་གོས་ཧྲུལ་གྱོན་པ་བཞིན།།
མངོན་བརྗོད་གསར་རྙིང་བརྡ་ཡིས་མ་སྤུད་ན།།
གྲོང་ཚིག་འདྲེས་པས་མཁས་རྣམས་བཞད་གད་རྒྱུ།།

པཎ་ཆེན་བློ་བཟང་ཆོས་རྒྱན་གྱི་ཞལ་ནས།
མར་གྱུར་འགྲོ་བའི་སྡིག་སྒྲིབ་སྡུག་བསྔལ་ཀུན།།
མ་ལུས་ད་ལྟ་བདག་ལ་སྨིན་པ་དང༌།།
བདག་གི་བདེ་དགེ་གཞན་ལ་བཏང་བ་ཡིས།།
འགྲོ་ཀུན་བདེ་དང་ལྡན་པར་བྱིན་གྱིས་རློབས།།
 
ཐུའུ་བཀྭན་ཆོས་ཀྱི་ཉི་མའི་ཞལ་ནས། 
ཟླ་གྲོགས་མཛའ་མཐུན་མང་ན་བཟང་མོད་ཀྱང་།།
གྲོགས་པོ་ངན་པས་རང་ཉིད་ཐུར་དུ་འཁྲིད།།

ཐ་མ་རང་གཞན་གཉིས་ཀ་ཆུ་ལ་བསྐུར།།
འགྲོགས་ས་མཐུན་ས་མ་ནོར་སྙིང་གཏམ་ཡིན།།


 
རྗེ་ཙོང་ཁ་་ཆེན་པོའི་ཞལ་ནས།
 མཛད་པ་ཀུན་ལས་གསུང་གི་ནི།།
མཛད་པ་མཆོག་ཡིན་དེ་ཡང་ནི།།
དེ་ཉིད་ཡིན་ཕྱིར་མཁས་པ་ཡིས།།
འདི་ལས་སངས་རྒྱས་རྗེས་དྲན་བྱོས།།
 
 ལྕང་སྐྱ་རོལ་བའི་རྡོ་རྗེའི་ཞལ་ནས།
ཐོས་བསམ་ཕྱོགས་སུ་མ་སོང་ཞིང་།།
གཞུང་ལུགས་གདམས་པར་ཤར་བ་ཡིས།།
མཉན་འོས་རིགས་པའི་ལམ་སྨྲ་བ།།
དེ་ཉིད་ལ་ནི་མཁས་པ་ཟེར།།
ཉོན་མོངས་དབལ་ནི་ཚོགས་པ་དང་།།
རང་དང་གཞན་རྒྱུད་འདུལ་བར་ནུས། །
ལྟ་སྒོམ་འཁྲུལ་བྲལ་གདེང་ལྡན་པ།།
དེ་ཉིད་ལ་ནི་གྲུབ་པ་ཟེར།།

མཁས་པས་གྲུབ་པ་མ་བཅོམ་ཞིང་།།
གྲུབ་པས་བཙུན་པ་མ་བཅོམ་པར།།


བསྟན་ལ་ཕན་པ་སྒྲུབ་པ་ལ།།
སྐྱེས་བུ་དམ་པ་ཞེས་ཀྱང་ཟེར།།
རྗེ་ཙོང་ཁ་་ཆེན་པོའི་ཞལ་ནས།

རིགས་ལམ་ཕྲ་མོ་ཕྱེད་པའི་རྣམ་དཔྱོད་དང་།།
གཞུང་ལུགས་གདམས་པར་ཤར་བའི་ཉམས་ལེན་དང་།།
ཚིག་སྦྱོར་ཚུལ་ལ་མཁས་པའི་ངག་གི་དཔལ།།
ས་སྟེང་འདི་ན་རིན་ཆེན་རྣམ་གསུམ་སྣང་།།


 
རྒྱལ་ཚབ་ཐམས་ཅད་མཁྱེན་པའི་ཞལ་སྔ་ལས།   
      སྐྱེས་བུ་དམ་པ་གང་ན་ཡོད་མི་ཤེས་ཤིང་སྐྱེས་བུ་དམ་པ་ལ་སྨོད་པ་ནི་ངན་འགྲོ་མ་བཟད་པའི་རྒྱུ་ཕུལ་དུ་ཕྱིན་པར་མདོ་རྒྱུད་ཀུན་ནས་གསུངས་པས་ཐལ་བས་གཡོགས་པའི་མེ་དོང་བཞིན་དུ་གནས་འདི་ལ་བློ་གྲོས་དང་ལྡན་པ་རྣམས་ཀྱིས་ཤིན་ཏུ་བག་དང་ལྡན་པ་བྱའོ།།
 
མཁས་གྲུབ་དགེ་ལེགས་དཔལ་བཟང་བོའི་ཞལ་ནས།
 སྐྱེས་བུའི་ལུས་ངག་བྱ་བའི་འཇུག་པ་ཡིས།།
ནང་གི་བསམ་པའི་ཁྱད་པར་གོ་བར་བྱེད།།
བླུན་པོའི་གྲོང་ཚིག་སྨྲ་བ་ལྷུར་བླངས་པས།།
གསུང་རབ་བརྡ་ལ་རྨོངས་པ་གསལ་བར་སྟོན།།
 
རང་ཡུལ་སྲེད་པས་དམ་དུ་བཅིང་བའི་མཐུས།།
བླུན་པོའི་གྲོང་ཚིག་འབའ་ཞིག་གོམས་ཆེ་བས།།
བློ་གསལ་མཁས་མང་ཚོགས་པའི་དབུས་སུ་ཡང༌།།
འཆད་པོ་དག་གི་རྣམ་པར་མ་དག་བྱེད།།
 
རྒྱ་ཆེན་གཞུང་ལུགས་དགོངས་དོན་འགྲེལ་བ་ཡི།།
ཡི་གེའི་རྩོམ་པ་མང་དུ་སྦྱར་ན་ཡང༌།།
གྲོང་ཚིག་བླུན་པོའི་ཐ་སྙད་ཁྱུ་འཁྲིགས་པས།།
འཇིག་རྟེན་ལོང་གཏམ་བྲིས་པའི་རྣམ་པ་མཚོན།།

སྡེབ་ལེགས་ཚིག་སྦྱོར་སྙན་དངགས་ལུས་མཛེས་ལ།།
རྒྱན་མངས་མདངས་ཀྱིས་རྣམ་པར་བཀྲ་ན་ཡང༌།།
གྲོང་ཚིག་གཅིག་གིས་སྙན་དངགས་སྐལ་ངན་བྱེད།།
རྒྱན་མང་ན་ཆུང་སྣ་བཅད་ཇི་བཞིན་ནོ།།
རྩོམ་་སྒྲིག་པ། ཀླུ་འབུམ་ཚེ་རིང་།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།