མི་དམངས་ཉིན་རེའི་ཚགས་པར་ཐོག་སྤྱི་ཟླ་4པའི་ཚེས་14ཉིན་གནས་ཚུལ་སྤེལ་བར་གཞིགས་ན། ཆེས་མཐོའི་མི་དམངས་ཁྲིམས་ཁང་དང་། རྒྱལ་ཁབ་མི་རིགས་ལས་དོན་ཨུ་ཡོན་ལྷན་ཁང་གིས་ཉེ་ཆར་མཉམ་འབྲེལ་ཐོག《མི་རིགས་ས་ཁུལ་གྱི་སྐད་གཉིས་ཁྲིམས་དཔོན་གསོ་སྐྱོང་དང་སྦྱོང་བརྡར་བྱ་རྒྱུའི་ལས་དོན་ལ་སྔར་བས་ཤུགས་སྣོན་དང་ལེགས་བཅོས་གཏོང་རྒྱུའི་སྐོར་གྱི་བསམ་འཆར》ཞེས་པ་འགྲེམ་སྤེལ་བྱས་ནས། མི་རིགས་ས་ཁུལ་གྱི་མི་རིགས་སྐད་ཡིག་དང་རྒྱ་སྐད་ཤེས་པའི་སྐད་གཉིས་ཁྲིམས་དཔོན་གསོ་སྐྱོང་དང་སྦྱོང་བརྡར་བྱ་རྒྱུའི་ལས་དོན་ལ་སྔར་བས་ཤུགས་སྣོན་དང་ལེགས་བཅོས་བྱས་ཏེ། སྤྱི་ལོ་2020ལོའི་སྔོན་ལ་གཞི་རྩའི་ཆ་ནས་མི་རིགས་ས་ཁུལ་གྱི་མི་དམངས་ཁྲིམས་ཁང་ནང་སྐད་གཉིས་ཁྲིམས་དཔོན་མི་འདང་བའི་གནད་དོན་ཐག་གཅོད་བྱ་རྒྱུའི་བླང་བྱ་བཏོན།
ཉེ་པའི་ཤས་རིང་། ཆེས་མཐོའི་མི་དམངས་ཁྲིམས་ཁང་གིས་མི་རིགས་ས་ཁུལ་གྱི་འབྲེལ་ཡོད་ཁྲིམས་ཁང་ལ་སྒྲིག་འཛུགས་དང་མཛུབ་ཁྲིད་བྱས་ཏེ། ཆེད་དོན་གྲོན་དངུལ་བཏང་བ་དང་མངག་བཅོལ་སྦྱོང་བརྡར་བྱེད་པ། སྐད་གཉིས་ཁྲིམས་དཔོན་སྦྱོང་བརྡར་སློབ་གཞི་སྒྲིག་པ། སྐད་གཉིས་ཁྲིམས་དཔོན་སྦྱོང་བརྡར་རྟེན་གཞི་འཛུགས་པ་སོགས་ཀྱི་བྱེད་ཐབས་རབ་དང་རིམ་པ་སྤྱད་པ་བརྒྱུད་ཆུ་ཚད་མཐོ་བ་དང་རྒྱ་སྐད་དང་མི་རིགས་ཀྱི་སྐད་ཡིག་ལ་བྱང་ཆ་ཡོད་པའི་ངང་བེད་སྤྱོད་བྱས་ནས་གྱོད་གཞི་འདྲི་གཅོད་བྱེད་ཐུབ་པའི་སྐད་གཉིས་ཁྲིམས་དཔོན་ཁག་ཅིག་གསོ་སྐྱོང་བྱས་ཡོད་མོད། ཡིན་ནའང་མིག་སྔར་སྐད་གཉིས་ཁྲིམས་དཔོན་གྱི་དཔུང་ཁག་གིས་སྔར་བཞིན་མི་རིགས་ས་ཁུལ་གྱི་མང་ཚོགས་ཀྱི་གཏུག་བཤེར་དགོས་མཁོ་དང་སྐད་གཉིས་འདྲི་གཅོད་ལས་དོན་གྱི་དགོས་མཁོ་སྐོང་ཐུབ་ཀྱི་མེད།
བསམ་འཆར་ནང་། ཆབ་སྲིད་ཀྱི་ལངས་ཕྱོགས་བརྟན་པ་དང་ལས་སྒོའི་བྱང་ཚད་མཐོ་བ། གྲངས་འབོར་ཅུང་འདང་ངེས་ཡིན་པ། མི་རིགས་ས་ཁུལ་གྱི་འདྲི་གཅོད་ལས་དོན་གྱི་དགོས་མཁོ་སྐོང་ཐུབ་པ་བཅས་ཀྱི་སྐད་གཉིས་ཁྲིམས་དཔོན་གྱི་དཔུང་ཁག་ཅིག་རིམ་བཞིན་འཛུགས་དགོས་པ་དང་། སྤྱི་ལོ་2020ལོའི་གོང་དུ། སྐད་གཉིས་ཁྲིམས་དཔོན1500གསོ་སྐྱོང་ཐུབ་པ་དང་། མི་རིགས་ས་ཁུལ་གྱི་ཁྲིམས་ཁང་ཁག་གིས་རིགས་གཅིག་མཁས་པའི་ཆུ་ཚད་ལྡན་པའི་སྐད་གཉིས་ཁྲིམས་དཔོན་བཞི་ཡས་མས་གསོ་སྐྱོང་ཐུབ་པ་བརྩོན་ལེན་བྱས་ཏེ། མི་རིགས་ས་ཁུལ་གྱི་མི་དམངས་ཁྲིམས་ཁང་ལ་སྐད་གཉིས་ཁྲིམས་དཔོན་མི་འདང་བའི་གནད་དོན་སྤྱིའི་ཆ་ནས་ཐག་གཅོད་ཐུབ་པ་བྱ་དགོས་ཞེས་བཏོན་ཡོད།།
རྩོམ་སྒྲིག་པ། མཁའ་བྱམས་ཚེ་རིང་།
|
