中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > རྩོམ་རིག > སྙན་ངག >
༄༅།། སེམས་པ་ངལ་དུས་ཤིག་ལ།
དུས་ཚོད།2016-12-02 19:24:56     རྩོམ་གྱི་ཡོང་ཁུངས། མདོ་ལྷོ་དྲ་བ། རྩོམ་པ་པོ། གཡུ་རྔོག་ལུང་རྟོགས། [སི་ཁྲོན]    ཆུང་། | འབྲིང་། | ཆེ།
སེམས་པའི་ཉིན་སྲིབ་ནས་རྡུལ་འཚུབ་འཁྲིགས་ཏེ།།
སྐྱོ་བ་ནར་ནར་གྱིས་ལུས་སེམས་ངལ་བས།།
ཚོར་བའི་སྒེའུ་ཡོལ་དེ་ཤུགས་ཀྱིས་འབྱེད་ནས།།
སྐྱོ་རོགས་ན་ཆུང་ཞིག་འཛུམ་གྱིས་བསུས་པ།།
དབྱངས་ཀྱི་བདག་མོ་ཞིག་ཡིན་ཚོད་འདུག་སྟེ།།
སྡུག་བསྔལ་རལ་བོ་དག་ཧྲིལ་གྱིས་བཀྲུས་ཤིང་།།
སྨྲེང་བའི་སྤྲིན་པ་དག་དུམ་བུར་བཅད་དེ།།
བརྩེ་བའི་ཉི་ཟེར་གྱི་ལག་ཟུང་འཇམ་པོས།།
ང་ཡི་ཕུང་བོ་ལྔ་བདེ་བའི་མལ་དུ།།
མིག་གི་སྐར་ཁུང་དུ་གཟུགས་ཀྱི་མཁར་བཞེངས།།
རྣ་བའི་བུ་ག་རུ་དབྱངས་ཀྱི་མཛོད་བསྐྱིལ།།
ལུས་ཀྱི་བ་སྤུ་ལ་ཚོར་བས་བྲོ་བརྡུང་།།
འཕྲུལ་སྣང་མེ་ལོང་གི་འཇིག་རྟེན་གཉོམ་པོར།།
དཔའ་མཛངས་དཀྱིལ་ཀྲུང་གི་མདུད་པ་དཀྲིས་ཡོད།།
དུས་ཀྱི་རླུང་བུ་དག་རྡོག་པ་བརྐྱངས་ཀྱང་།།
དུར་གྱི་གཅེར་བུ་དག་ལྐོག་ཉན་སླེབས་ཀྱང་།།
གཤིན་རྗེ་ཕོ་ཉའི་ཚོགས་ར་མདར་སྤྲད་ཀྱང་།།
སེམས་ཀྱི་མེ་ལོང་ངོས་མག་མོག་སྣང་བའི།།
ང་ཡི་འཇིག་རྟེན་དུ་ལས་ཀྱི་རླུང་བུས།།
མཛེས་འཛུམ་མེ་ཏོག་གི་ཞལ་རས་བྱུག་པའི།།
ཨ་ཅག་སྣང་ས་རང་ཡོད་པས་ཆོག་གོ།
 
ཨ་ཅག་སྣང་ས་ཡི་ཆུ་ཟོམ་ནང་དུ།།
ང་ཡི་འཇིག་རྟེན་གྱི་སྐྱིད་སྡུག་བཅུས་ཡོད།།
མི་ཚེའི་བགྲོད་ལམ་གྱི་སྐས་གདེང་ངོགས་སུ།།
གྲིབ་མ་རབ་རིབ་ཀྱིས་འབྱར་བའི་གྲོག་མ།།
སེམས་ཀྱི་མེ་ལོང་ངོས་གོམ་འགྲོས་འཁྱར་འཁྱོར།།
གྲོགས་ཀྱི་དྭངས་མ་ལ་ལམ་ནས་འཕྲད་ཅིང་།།
རིགས་པའི་ལྡེམ་མྱུར་ལ་རྩལ་ཤུགས་རྒྱས་པའི།།
རིགས་ཀྱི་བདེ་སྡུག་ལ་སེམས་ཚེགས་ཆེ་བའི།།
གྲོག་མ་ཆུང་ཆུང་འདིའི་རྒྱབ་གཟུགས་ངོས་སུ།།
ང་རང་འདང་རྒྱག་གི་མཚོ་མོར་བྱིངས་སོ།།
 རྩོམ་སྒྲིག་པ། ཡུམ་ཚེ་རིང་།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།