| -- རྗེ་བློ་བཟང་དགེ་འདུན་མཆོག་སྐུ་འདས་ནས་མི་ལོ་བདུན་འཁོར་བར་རྗེས་དྲན་ཞུ།
དཀར་སྲས། [ལྷ་ས]
རྩོམ་སྒྲིག་པ། དངོས་སྦྱོང་སློབ་མ་ཚེ་རིང་འཚོ།
གནམ་སའི་བར་མཚམས་ཀྱི་ཧྲག་བར་ཞིག་ནས།
བདེན་མེད་ཀྱི་ཐིག་ལེ་གསལ་བའི་འོད་སྣང་ཞིག་སྟོབས་ཀྱིས་མངོན་བྱུང་།
གསེར་ནག་གི་ཡིག་འབྲུ་སྦྲུམ་པའི་སེམས་དཔའ་ཞིག་ཐོལ་གྱིས་མངོན་བྱུང་།
ཡིག་འབྲུ་ལས་འཕྲོས་པའི་འོད་ཟེར་གྱི་ཟེགས་མ་རེ་རེ།
མིའི་རིགས་ཀྱི་སྤྱི་གཙུག་དང་སྙིང་ཁ་སོགས་སུ་འཐིམས་སོང་།
ཆོས་ཉིད་ཀྱིས་ཁྱེད་རང་བཞུད་སོང་ན་ཡང་།
མུན་ནག་གི་བྲང་གཞུང་ནས་བསམ་གཞིག་གི་བདེན་པ་བདར་དུས།
རྟེན་འབྱུང་གིས་དེད་པའི་གསེར་གྱི་ཡིག་འབྲུ་དག
སེམས་ཀྱི་མངའ་ཐང་གཞན་ཞིག་ན།
སྐར་ཚོགས་བཞིན་ཁྲ་ལམ་མེར་གསལ་ལྷིང་ངེར།
འདས་ཟིན་པའི་ཁོ་བ་ཚོའི་ཁ་སང་ནི་ཁྱེད་ཡིན་ལ།
ཡབ་མེས་ཀྱི་རྩྭ་ཐང་ནས་གཏོར་བའི་ཤེས་རབ་ཀྱི་ས་བོན་དེ།
ཁྱེད་ཀྱིས་ཕྱི་རབས་པ་རྣམས་ལ་གནང་བའི་སྒྲོན་མེ་དེ་ཡིན་པས།
ཟོལ་བཅོས་ཀྱི་འཇིག་རྟེན་འདིར།
ཁྱེད་ཉིད་འོད་ཀྱི་ཕུང་བོ་ཞིག གངས་ཀྱི་རི་བོ་ཞིག།
|
