中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > རྩོམ་རིག > སྙན་ངག >
༄༅།། དྲིན་ཅན་མ་ལོར་བྱམས་དང་སྙིང་རྗེ་ལྡན།
དུས་ཚོད།2019-01-14 11:32:29     རྩོམ་གྱི་ཡོང་ཁུངས། ཀན་ལྷོའི་གསར་འགྱུར། རྩོམ་པ་པོ། ཅོ་བྱང་སྐར། [སི་ཁྲོན]    ཆུང་། | འབྲིང་། | ཆེ།
སྒང་བ་བོད་ཀྱི་རྒྱུད་པ་བྱམས་དང་སྙིང་རྗེའི་རང་གཟུགས།།
མཐུན་སྒྲིལ་ཨ་ལོང་སྒོར་སྒོར་རང་གཤིས་ཀུན་སྤྱོད་གཙང་མ།།
དད་པའི་ལྷག་བསམ་དཀར་བོ་ལྷ་བསང་དཀར་བོའི་རང་མདངས།།
ཨ་སྐྱེས་ཨ་མའི་རང་གཤིས་དུང་མདོག་ཟླ་བ་དཀར་བོ།།

ཀུན་སྤྱོད་ཞི་དུལ་ཅན་པོ་ཨ་མ་ལགས་ཀྱི་རང་གཤིས།།
ཕྱོགས་བཞི་ཀུན་ལ་མཐུན་པ་མཐུན་པ་སྤུན་བཞིའི་ལུགས་སྲོལ།།
མགྲོན་པོ་འཛུམ་གྱིས་བསུ་བ་གཡུ་སྦྲང་སྤང་ལ་འཁོར་འཁོར།།
ཁྱིམ་མི་བྱམས་ཀྱིས་བསྐྱངས་པ་མ་ལོའི་རང་གཤིས་གཙང་མ།།

སྙིང་རྗེའི་རང་གཟུགས་ཅན་པོ་མ་ལོའི་རྒྱུད་ན་མངའ་ཡོད།།
མཛེས་སྡུག་ཡིད་འོངས་ཅན་པོ་མ་ལོའི་ལུས་སུ་སྦྲུམ་ཡོད།།
ལྷད་མེད་ལྷག་བསམ་ཅན་པོ་མ་ལོའི་སེམས་སུ་གནས་ཡོད།།
དྲིན་ཆེན་ཨ་མ་མ་ལོར་བྱམས་དང་སྙིང་རྗེ་ལྡན་ཡོད།།

རྩྭ་ལྗང་སྨྱུག་ཕྲན་ཡིན་རུང་ཚེ་སྲོག་གཅོད་པ་དཔེ་མེད།།
སྤྱང་ཀིས་སྒོ་ཕྱུགས་གསོད་རུང་ཚིག་ངན་སྨྲ་བ་དཔེ་མེད།།
མ་ཎི་ཡིག་དྲུག་རྒྱུན་གྱི་འགྲོ་རོགས་འདུག་གྲོགས་གྱུར་པ།།
མ་ལོ་བྱམས་སེམས་ཅན་མ་བྱམས་དང་སྙིང་རྗེ་ལྡན་ཡོད།།

རུ་ཁ་ཁྱིམ་མཚེས་བར་ན་རང་གཤིས་བལ་ལས་འཇམ་པ།།
སྡེ་དང་སྡེ་བའི་བར་ནས་ཀུན་སྤྱོད་ལྷ་ལས་ཡག་པ།།
ཁྱིམ་དང་ནང་མའི་བར་ན་ལྷད་མེད་ལྷག་བསམ་དཀར་བོ།།
མ་ལོ་དྲིན་ཅན་ཚེ་རིང་བྱམས་དང་སྙིང་རྗེ་ལྡན་ཡོད།།
འཇིག་རྟེན་མི་རྟག་གནམ་ངོ་ནམ་ཡོང་ངེས་པ་མེད་པར།།
བྱམས་དང་སྙིང་རྗེའི་བདག་མོ་ང་ཡི་མ་ལོ་ཚེ་རིང་།།
གས་སྲིབ་སྲིབ་ག་ཞིག་ནས་ཕྱིར་ཡོང་མེད་པར་ཆས་སོང་།།
ཅོལ་ཆུང་བྱིས་པ་ང་རང་བདག་མེད་གཅེར་བུར་ལུས་སོང་།།

མ་ལོའི་ཚེ་སྔོན་བསྒྲུབ་པའི་ལས་བཟང་དཔེ་བཟང་རྣམས་ཀྱིས།།
བུ་ཆུང་ང་ཡི་སྐྱེ་བར་ལས་ཀྱི་བསོད་ནམས་བསགས་སོང་།།
གཅེར་བུར་ལུས་པའི་བུ་ལ་ལས་ཀྱི་བསོད་ནམས་བསགས་པས།།
བུ་ཆུང་རྒྱབ་གོས་ཟས་ལ་འདང་བརྒྱག་མེད་པར་གྱུར་སོང་།།

རང་གཅེས་མ་ལོ་ཡོད་པའི་འཇིག་རྟེན་གང་ཟག་ཀུན་ལ།།
སྐད་ཆ་ཚིག་གསུམ་ཞུས་པ་མ་བརྗེད་ཨ་ཁུ་ལོ་ལོ།།
དྲིན་ཅན་མ་ལོའི་བརྩེ་བ་སྒོར་མོའི་དབང་ལ་མ་བརྗེ།།
དྲིན་ཅན་མ་ལོར་མཁོ་བ་དཔལ་དང་འབྱོར་བ་མ་ཡིན།།

འཇིག་རྟེན་ཨ་མར་མཁོ་བ་མིག་མཐོང་ལག་ཟིན་ས་ནས།།
རང་གི་བུ་ཆུང་ཟེར་ན་བོས་ན་རྣ་བས་གོ་ས།།
གཅེས་ཕྲུག་ཨ་མར་བོས་ན་མིག་གིས་ཟིན་ས་ཞིག་དང་།།
སྦྲང་དཀར་རྩམ་པ་ཟ་དུས་མཉམ་དུ་ཟ་རོགས་ཤིག་རེད།།

རང་གཤིས་མར་ལོའི་རང་མདངས་སུ་ཡིས་སྐྱོན་བརྗོད་མ་མཛད།།
མ་ལོའི་རང་གཤིས་གན་ལ་སྐྱོན་གྱི་དྲི་མས་གོས་མེད།།
ཀུན་སྤྱོད་ཞི་དུལ་གན་ལ་སུ་ཡིས་ཀེར་ཀེར་མ་བྱེད།།
མ་ལོའི་ཀུན་སྤྱོད་གཙང་མ་ལྷབ་ལྷུབ་ཁ་བའི་རང་མདངས།།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།