༡
གྲང་བསིལ་བསིལ་གྱི་དགུན་རླུང་འཁྱག་པོའི་གསེང་རིམ་ནས།
འདས་སོང་གི་གདུང་བ་མ་ལུས།
བདག་གི་གངས་དཀར་སེམས་པའི་དབུ་ཐོག་ཏུ་འཕུར་འོང་བའི་ཁ་བ་བཞིན།
དལ་ཅག་གེར་བབས་ཚེ།
ཕྱི་གསལ་ནང་གསལ་གྱི་མཛའ་བརྩེ་ཞིག་གི་དྲན་པ་བསླངས།
༢
སྐྱ་ཟད་སྔོ་སྡུག་གི་དགུན་ཟླ་རིང་མོའི་སྡུག་བསྔལ་འདི་མཐོང་ན།
མེ་ཏོག་གི་ཞིང་ཁམས་དང་འདྲ་བའི་ཁྱོད་ཀྱི་འགྱུར་ཁུགས་སྟོང་ལྡན་གྱི་བརྩེ་བ་དེ་དྲན་ལ།
མཁའ་དབྱིངས་ན་ལྷེམ་ལྷེམ་འགུལ་བའི་འོད་ཟེར་མཐོང་ན།
ཚུལ་མིན་གྱི་ཀུན་སྤྱོད་ལ་རྒྱང་གཟིགས་མཛད་པའི་ལུང་བསྟན་དང་དགའ་འབོད་ནམ་ཡང་བརྗེད་ཐབས་མེད།
༣
བརྩེ་བ་འོ་མ་ལས་དཀར་ཞིང་། ཕྱི་ཐག་དར་སྐུད་ལས་རིང་བའི།
ངའི་དྲན་སྣང་གི་ཟབ་སར་ལྷུང་བའི་སྙན་ངག་གི་སྲས་མོ།
ཁྱོད་དང་འབྲེལ་བའི་ལོ་དང་ཟླ་བ ཉིན་དང་མཚན་མོ་རེ་རེར།
ཞེན་ཆགས་ཀྱི་དུངས་པ་མ་ལྷོད་པར་ཡིད་ཚིམས་པའི་སྙན་ངག་གི་དབྱངས་རྟ་ངག་ནས་བོར་མ་མྱོང་ལ།
འབྲི་འདོད་པའི་སྨྱུ་གུ་ལག་དང་བྲལ་མ་མྱོང་།
༤
གཞན་གྱི་ཁྲེལ་དགོད་དང་འཕྱ་དམོད་ཀྱི་སྟ་གྲིའི་སོ་བར་ན་ལུས་ཀྱང་།
ཁྱོད་ཡོད་པས ང་ལ་ཞེད་སྣང་གི་ཚོར་བ་སྤུ་ཙམ་ཡང་མེད་ལ།
མགོ་བོ་མཐོ་རུ་བཀྱགས་ཏེ་མདུན་སྐྱོད་ཀྱི་བརྩོན་པ་ཆུ་བོ་བཞིན་ལྡོག་ཏུ་མེད།
ཁྱོད་ཡོད་པས དཀའ་བ་ཆེ་ཆུང་ཅི་རིགས་ལ་གདོང་ལེན་གྱི་སྙིང་དང་སྤོབས་པ།
ནམ་ཡང་འགྱུར་དུ་མེད་ལ་རྗེས་མར་དེ་བས་ཀྱང་མེད།
བདག་གི་དྲན་སྣང་གི་མཐིལ་ན་དྲག་ཏུ་འཕྱུར་བའི་སྲས་མོ་ལགས།
༥
སྙིང་ཉེ་བའི་སྙན་ངག་གི་སྲས་མོ་ཡ།
དད་འདུན་གྱི་མིག་ཟུང་སྒོར་མོ ཁྱོད་རང་སྨོན་པའི་འབྱེད་འཛུམ་གྱི་བར་ན།
རེ་སྨོན་གྱི་རླུང་རྟར་གཤོག་ཟུང་བྲལ་ཡང་ཁྱོད་ལ་དགའ་འབོད་ཀྱི་དབྱངས་རྟ་སྙན་མོས།
ལྷབ་ལྷུབ་དགུང་ལ་འདྲེན་པའི་སེམས་ཤུགས་འདི།
ཁྱོད་ལ་ཕུལ་བའི་དད་འདུན་གྱི་ལས་རླུང་དཀར་བོ་ཡིན།
༦
འཕྲུལ་སྣང་གི་སེམས་ཁམས་ལ་ལམ་སྟོན་གྱི་འོད་སྣང་བསྩོལ་བའི་དུས་གསུམ་གྱི་བདག་མོ།
ཁྱོད་རང་འཚོལ་ཕྱིར།
ཆུ་ཆེན་གྱི་རབ་ཁ་དང་འཇིགས་རྔམ་གྱི་གཡང་གཟར་བརྒྱུད་མྱོང་ལ།
མི་ཚོགས་ཀྱི་རྔམ་ཁ་དང་སྡིག་མཛུབ་ཀྱི་ཚེར་གསེང་ལའང་བརྒྱུད་མྱོང་།
བདག་ལ་སྟོབས་འབྱོར་མངའ་ཐང་སོགས་ཅི་ཡང་དགོས་པ་མི་འདུག
༧
བདག་ལ་བརྩེ་བ་དང་དུང་བ་གླན་མཁན་ཁྱོད་རང་གཅིག་པུ་ཡིན་པས།
བདག་ལ་ཞེད་སྣང་དང་ཁེར་རྐྱང་གི་སྡུག་བསྔལ་ཅི་ཡང་མོད་ཀྱང་།
ཁྱོད་ཀྱི་སླད་དུ་འཚོལ་དགོས་ལ་འཚོ་ཡང་དགོས།
བདག་གི་གློ་སྙིང་མཆིན་གསུམ་གྱི་གཞུང་ན་ལྟེམས་མེར་འཁྱིལ་བའི་སྙན་ངག་གི་སྲས་མོ་ཡ།།
|
