མཚན་མོ་ནི་སྐར་ཚོགས་ཀྱིས་ཞབས་བྲོ་འཁྲབ་ས་ཡིན་ཏེ།
སྟག་ཤར་ཚོའི་རྡོག་ལམ་ལ། འོད་ཀྱིས་མུ་ཏིག་བསྟར་ས་ཡིན།
མཚན་མོ་ནི་རི་གླུའི་དབྱངས་རྟ་ལ་རམ་དཀྲོལ་བྱེད་ས་ཡིན་ལ།
ཡང་ན། མོ་གཞོན་དག་གི་རྨི་ལམ་ལ་བརྩེ་བའི་བུ་རམ་བྱོ་ས་ཡང་ཡིན།
མཚན་མོ་ནི་ཁྱོད་དང་ངའི་ནང་སེམས་ཀྱི་སྤང་ཐང་ནས་བཞད་པའི།
རྒྱ་སེ་མེ་ཏོག་རྐང་གཅིག་ཡིན་ཆོག་ལ། མེ་ཏོག་དེའི་ཟིལ་ཤུགས་ལས།
ངས་སྙན་ངག་སྒྱེ་གང་བྲིས་ཆོག་ལ། ཁྱོས་སྙིང་གཏམ་རུམ་གང་བྱོ་ཆོག
མཚན་མོ་ནི་ཁ་སང་དེ་རིང་གི་གཉེན་ཆང་ཡིན་ཆོག་ལ།
འཐུང་གིན་འཐུང་གིན། ཟླ་བའང་ལག་ཏུ་ལེན་ཐུབ་པའི།
ཆུ་དར་གང་ཞིག་གམ་བག་རས་གང་རུང་ཞིག་ཡིན་ཆོག
ས་རུབ་རྗེས།
ས་རུབ་རྗེས།
ཕྱུགས་ར་ཚ་གསུམ་པོ་ལྷས་ལ་བསྐོར་མི་དགོས་པའི་གྲོང་ཁྱེར་ནས།
ནུབ་ཇ་ཞིག་འཐུང་ན་ཡང་། དེ་འདྲའི་ཞིམ་པོ་ཞིག་མ་རེད།
ཉིན་གཅིག་གི་ཕྱུགས་རྫིའི་ཚབ་ཏུ་ཡིག་ཆ་འགའ་བསྣོག
རྟ་མཆོག་གི་ཚབ་ཏུ་རླངས་འཁོར་རེ་གཉིས་སྒོ་ཁར་བཞག་པ་ནས།
ས་རུབ་རྗེས་ཀྱི་རང་ཉིད་ལ། གནང་བ་ཞིག་གཏོང་ཁུལ་བྱས།
རིལ་མ་དང་ཨོང་བ་འབུད་མི་དགོས་པའི་གློག་གི་ཐབ་ཀ
ཉི་མ་སུམ་བརྒྱ་དྲུག་ཅུའི་ལྟོ་འཕུད་ས་ཡིན།
ཆུ་ཁོལ་འཐུང་ན། འོ་ཇ་དྲན་ངེས་ལ།
སྔོ་ཚོད་ཟོས་ན། ལུག་ཤ་དྲན་ངེས།
ས་རུབ་རྗེས། མུན་ནག་གི་གསེབ་ནས།
གྲོང་ཁྱེར་གྱི་གློག་འོད་དང་འགྱུར་ལ་ཉེ་བའི་རང་ཉིད་ཀྱིས།
བདུད་བྷེའི་རྡུང་ལེན་ལ་ཉན་ནས།
རང་སེམས་གསོ་ཐབས་བྱས།། |
