དཔྱིད་ཀྱི་བདག་མོ་དལ་གྱི་ལྡང་བའི་དུས།
ཁྱོད་རང་ངོ་མཚར་ཆེ་བའི་བསང་ཆུར་སྤྲུལ།
བརྗིད་ཆགས་རྫ་རིའི་ཁྲོད་ནས་རྔམ་གྱིས་ཐོན།
རྣ་ལ་འཇེབས་པའི་གླུ་སྐད་རེ་རེ་ཡིས།
དགུན་ལ་ཉལ་བའི་ལྗང་མྱུག་གཉིད་ལས་བསླངས།
བསང་ཁོག་གཞུང་དུ་ཁྱོད་ཀྱི་སྙན་དབྱངས་འཁོར།
ཀྱེ་ཀྱེ། ང་ཡི་ཨ་ཅེ་ལྷ་མོ།
རྒྱང་དུ་གནས་པའི་གནམ་མཚོ་ཕྱུག་མོ་རུ།
ཁྱོད་རང་དངོས་སུ་སོང་བ་ཨེ་བདེན་ནམ།
རབ་དཀར་སྤྲིན་གསར་དལ་གྱིས་རྒྱུ་བའི་དུས།
ཁྱོད་རང་བརྗིད་ཆགས་གཉན་ཆེན་རི་བོར་སྤྲུལ།
ནམ་མཁའི་དབྱིངས་ནས་ས་གཞིའི་ཁྱོན་དུ་ཐོན།
མི་སེམས་འགུལ་བའི་ལྷ་སྒྲུང་རེ་རེ་ཡིས།
དཔྱིད་ཁའི་ཁྲོད་ཀྱི་ལུག་ཁྱུ་སད་དུ་བཅུག
རྩྭ་ཐང་ཡངས་པོར་ཁྱོད་ཀྱི་གཏམ་གྱིས་ཁེངས།
ཀྱེ་ཀྱེ། ང་ཡི་ཨ་ཅེ་ལྷ་མོ།
ངོ་མཚར་ཆེ་བའི་ཞིང་ཁམས་ཤམ་བྷ་ལར།
ཁྱོད་རང་དངོས་སུ་སོང་བ་ཨེ་བདེན་ནམ། |
