中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > རྩོམ་རིག > ལྷུག་རྩོམ། >
༄༅།། ཆར་བ།
དུས་ཚོད།2018-07-20 16:04:37     རྩོམ་གྱི་ཡོང་ཁུངས། མཆོད་མེ་བོད་ཀྱི་རྩོམ་རིག་དྲ་བ། ཁུ་བྱུག་སྔོན་མོ།     ཆུང་། | འབྲིང་། | ཆེ།
 དབྱར་ཁ་སླེབས་ཟིན་ནའང་། ཡུན་རིང་ཞིག་ལ་ཆར་བ་ཞིག་བབས་མ་བྱུང་བས། ངས་ད་ལྟ་རྒྱུན་དུ་ཆར་བ་ཞིག་འབབ་པར་རེ་ཞིང་སྒུག་ཡོད། ངས་རེ་ཞིང་སྒུག་པའི་ཆར་བ་དེ་ནི་ཁངས་ཆར་དང་རྫི་ཆར་སོགས་མ་ཡིན་པར་སྦྲང་ཆར་བསིལ་མར་འབོད་པ་དེ་ཡིན་ཞིང་། སྦྲང་ཆར་བསིལ་མ་འབབ་དུས་འཇའ་ཚོན་ཤར་ཡོང་ངེས་ལ། འཇའ་ཚོན་ཤར་ཚེ་ད་གཟོད་ངས་རང་གི་སེམས་པ་ནམ་མཁའ་ལྟར་བསྐྱེད་ནས་མཛའ་མོ་ལ་སྙན་ངག་བྲིས་ཆོག
    སྐབས་དེ་དུས། སྙན་ངག་དེའི་ཡིད་བརྙན་གཙོ་བོ་གཉིས་ནི་འཇའ་ཚོན་དང་ནམ་མཁའ་ཡིན་ལ། སྐབས་བབས་ཀྱི་བརྗོད་བྱ་ནི་བརྩེ་འདང་གི་གསང་བ་ཞིག་སྟེ། སུ་ཞིག་གིས་གསང་བ་དེ་ཤེས་འདོད་ན་རང་གི་སེམས་ཁོང་གི་མཛའ་མོར་ཕྲིས་དང་། རང་ལ་ནམ་མཁའ་ལྟ་བུའི་སེམས་རྒྱ་ཞིག་ཡོད་ན་ཁོ་མོས་ཕལ་ཆེར་རྟོགས་སྲིད། དེ་ནི་ཁེད་དཀའ་བའི་གབ་ཚིག་ཅིག་དང་ཡེ་ནས་མི་འདྲ།
    ད་ནི་དངོས་འབྲེལ་བསམ་ཐོག་ཏུ་བབས་བྱུང་། དེ་རིང་ནི་བཀྲ་ཤིས་པའི་ཉི་མ་ཞིག་སྟེ། ཏག་ཏག་སྐབས་འདིར་ཆར་བ་ཤག་ཤག་ཏུ་འབབ་འགོ་བརྩམས་བྱུང་། ས་བབ་མཐོ་ཞིང་དབྱར་ཐུང་བའི་ཡུལ་རེབ་གོང་གི་སྟོད་ཕྱོགས་ཀྱི་ས་ཆ་འདིར་མཚོན་ན་། ཆར་བ་འདི་ད་ལོའི་སྦྲང་ཆར་བསིལ་མ་ཡིན་པའི་ཆར་བ་འབབ་ཐེངས་དང་པོ་དེ་ཡིན། དེ་བས། ཡུལ་འདིའི་མི་སུ་ལའང་ཚོར་བ་སྐྱིད་པོ་ཞིག་འབྱུང་བ་སྨོས་མ་དགོས།
    ཆར་བ་འབབ་དུས། ངས་སྒེའུ་ཁུང་གི་འགྲམ་ན་ཕྱི་རུ་བལྟས་ཏེ་བསྡད་ཡོད། ཆར་བ་ཤག་ཤག་འབབ་པའི་སྒྲ་ནི་ཆེས་སྙན་ཞིང་འཇེབས་པའི་རོལ་དབྱངས་ཤིག་སྟེ། ང་རང་ཆེས་རྒྱུན་དུ་ཉན་པར་སྤྲོ་བའི་ས་ཁུ་སིའི་རོལ་དབྱངས་ཀྱང་འདི་ལས་ལྷག་པ་ཞིག་གཏན་ནས་མ་རེད། ཡང་གཅིག་བཤད་ན་ཆར་བ་འདི་ནི་ནོར་ནག་གི་ཤ་ཤེད་དང་འབྲུ་དྲུག་གི་སྙེ་མ་སྟེ། ཡུལ་མི་ཚོའི་འཚོ་བའི་བདེ་སྐྱིད་ཀྱི་གཡང་ཡིན་པས། སྤྱིར་བཏང་གི་ཆར་བ་ཞིག་ག་ལ་ཡིན།
    ཆར་བས་ཚ་གདུག་དང་མི་གཙང་བ་ཐམས་ཅད་སངས་པར་བྱས་ཏེ། ནོར་འཛིན་བུ་མོའི་ལུས་ལ་ཁྲུས་གསོལ་དལ་བུར་བྱས་བྱུང་།ཆར་བས་སྐྱེ་དངོས་དང་སྲོག་ཆགས་མང་པོའི་རེ་ཆད་དང་ཉོབ་སྣང་རྒྱང་དུ་སྤྱུགས་ཏེ། འཛད་དུ་མེད་པའི་སྟོབས་ཤུགས་དང་ཡིད་ཆེས་ཀྱི་དངོས་གྲུབ་ག་ལེར་གནང་བྱུང་།
    ཆར་བ་ཤག་ཤག་ཤག ཤག་ཤག་ཤག ཤག་ཤག་ཤག
    ཆར་བ་ངའི་སེམས་ལ་བབས་བྱུང་།
    ཆར་བ་ངའི་སེམས་ནས་བཞུར་བྱུང་།
    ཆར་བ་ངའི་སེམས་ལ་འཁྱིལ་བྱུང་།
    མ་གཞིར། ཆར་བ་ནི་ལོ་ལ་བསྙལ་བའི་ལོ་ཆང་བསིལ་མ་སྟེ། སེམས་ཀྱི་མཛའ་མོས་དྲངས་པ་བཞིན་ཞལ་ཕོར་གང་གིས་ང་རང་སྐད་ཅིག་ཉིད་ལ་བཟི་བར་བྱས་སོང་།
    སྐབས་དེར། ཆར་བའི་རོལ་དབྱངས་དེས་ངའི་ཚོར་བའི་ཀློང་ཆེན་གློ་བུར་དུ་བརྡོལ་དུ་བཅུག་པ་འདི་ལྟར། ཆར་ཟིམ་མུ་ཏིག་རོལ་མོའི་སྒྲ་ལས་འཐོར།། ཚོར་བའི་ཟིལ་བ་སེམས་ཀྱི་འདབ་མར་ཆགས།། ནམ་མཁའ་སེམས་ཡིན་སེམས་ནི་ནམ་མཁའ་སྟེ།། དགོད་དམ་ངུ་བའི་མིག་ཆུ་ཅི་ལ་བཞུར།། བསིལ་རླུང་འཇམ་པོ་ཆར་བའི་ཁྲུས་ལ་རོལ།། ཚོར་བའི་སྨུག་སྤྲིན་སེམས་ཀྱི་ལྗོངས་ལ་འཐིབས།། ནམ་མཁའ་སེམས་ཡིན་སེམས་ནི་ནམ་མཁའ་སྟེ།། དགེ་དང་སྡིག་པའི་འགྱུ་བ་ཅི་ལ་འབྱུང་།། ཨ་ཨ། འདི་ནི་ཆུ་མིག་ཅིག་དང་འདྲ་བར་བཀག་ཀྱང་མི་ཁོག་པར་བཞུར་སོང་། ཆར་ཐིགས་གཅིག ཆར་ཐིགས་བརྒྱ། ཆར་ཐིགས་སྟོང་། ཆར་ཐིགས་ཁྲི
   ཆར་བ་སྔར་བཞིན་ཤག་ཤག་འབབ་ཀྱིན་འདུག ངས་སྒེའུ་ཁུང་སྔར་ལས་ཀྱང་ཡངས་པོར་ཕྱེས་ཏེ་སེམས་ཀྱི་སྐྱོ་བ་དང་ངལ་དུབ་ཡོད་ཚད་ལོཊ་སུ་བསྐྱུར་ནས་ཡུན་རིང་ཞིག་ལ་ཉམས་སུ་མྱང་མ་མྱོང་བའི་ཆར་བའི་རོལ་དབྱངས་ལ་རྣམ་ཤེས་སྒྲིམ་སྟེ་ཉན་པ་ཡིན། ཆར་བའི་རོལ་དབྱངས་ནི་ཤིན་ཏུ་དམའ་བ་ནས་དམའ་བ་ཙམ་དང་། དེ་ནས་དེ་ལས་མཐོ་བ་ཙམ་དང་དེ་ལས་མཐོ་བ། དེ་ནས་གློ་བུར་དུ་དམའ་རུ་འགྱུར་བ། དེ་ནས་གློ་བུར་དུ་མཐོ་རུ་འགྱུར་བ་ཞིག་སྟེ། མཚམས་རེར་ལྡོག་ནས་ཀྱང་གྲག དེ་བཞིན་དུ་ཕྲ་སྤོམ་ལ་ཡང་འགྱུར་བ་དེ་དང་འདྲ་བར་འགྲོས་ཚད་མང་དུ་མཆིས། རོལ་དབྱངས་དེའི་ཁྲོད་ནས། ང་རང་དྭངས་གཙང་གི་ཆུ་འགྲམ་ཞིག་ནས་འཇམ་མཉེན་གྱི་ནེའུ་གསིང་ཞིག་ཏུ་སླེབས་ཤིང་། དེ་ནས་སྔོ་ལྗང་གི་རི་སུལ་ཞིག་དང་དེ་ནས་སྤྲིན་དཀར་གྱི་ཀླད་དང་། དེ་ནས་གློ་བུར་དུ་སྤང་ལྗོངས་ཤིག་ཏུ་སླེབས་ཤིང་། དེ་ནས་གློ་བུར་དུ་ལྗོན་ཚལ་ཞིག་ཏུ་སླེབས། དེ་ནས དུས་ཚོད་ཅི་ཙམ་ཞིག་འགོར་བ་མི་ཤེས་མོད། སྐབས་ཤིག་ལ་ང་རང་གློ་བུར་དུ་ཕྱིར་སྒེའུ་ཁུང་གི་འགྲམ་དུ་སླེབས་འདུག མཚར་སྣང་དང་བཅས་ཏེ་སྒེའུ་ཁུང་ལས་ཕྱི་རུ་བལྟས་པ་ན། ཆར་བ་འགྲམས་བཞིན་འདུག་ལ། ནམ་མཁའི་སྤྲིན་དཀར་ལ་ངེ་ལིང་ངེའི་གསེབ་དག་ནས་ཉི་ཟེར་འཇམ་པོ་མངོན་ཆུང་གིས་འཕྲོ་ཞིང་འཕྲོ།
    སྙན་འཇེབས་ལྡན་ལ་ཡིད་དབང་འཕྲོག་པའི་དེ་རིང་གི་ཆར་བའི་རོལ་དབྱངས་ཁྲོད་ཀྱི་འགྲུལ་བཞུད་དེ་ནི་ང་ལ་མཚོན་ན་སྣང་བ་ཙམ་ཞིག་མ་ཡིན་ཏེ། དབང་ལྔའི་སྤྱོད་ཡུལ་གྱི་འདོད་ཡོན་དག་ཀྱང་རང་ཆོས་སུ་ཀུན་ནས་རྫོགས་འདུག འགྲུལ་བཞུད་འདི་འདྲ་སྐྱེས་པ་ནས་ད་ལྟའི་བར་དུ་བྱས་མ་མྱོང་ལ་། ཕྱིས་ཀྱི་དུས་སུ་ཡང་ཧ་ཅང་བྱེད་དཀའ་འོ།། ཆར་བའི་རོལ་དབྱངས་ཁྲོད་ཀྱི་འགྲུལ་བཞུད་དེས་ང་ལ་མི་ཚེའི་སྤྲོ་སྣང་དང་མཛེས་སྡུག་ཅེས་པའི་ཐ་སྙད་ལ་གོ་བ་གཞན་ཞིག་ཡོད་པ་ཤེས་སུ་བཅུག་བྱུང་།
    སྔོན་ཆད། བོད་པ་རྣམས་གཡུང་དྲུང་རྨུ་ཐག་གི་སྣེ་མོར་འཇུས་ནས་འགྲུལ་བཞུད་བྱས་སྐད། དེའི་རྗེས་སུ། བོད་པ་རྣམས་ལྷ་བབས་མཆོད་རྟེན་གྱི་སྐས་རིམ་ལ་འཛེགས་ནས་འགྲུལ་བཞུད་བྱས་སྐད། ད་ལྟ། བོད་པ་རྣམས་དངུལ་ལོར་གྱི་ཁུད་དུ་བཙངས་ནས་འགྲུལ་བཞུད་བྱེད་ཀྱིན་འདུག ཡིན་ནའང་། ང་གཅིག་པུ་ཆར་བའི་རོལ་དབྱངས་ཁྲོད་ཀྱི་འགྲུལ་བཞུད་ལ་དགའ་ཞིང་། ད་དུང་དཔྱིད་རླུང་གི་རོལ་དབྱངས་ཁྲོད་ཀྱི་འགྲུལ་བཞུད་དང་ཟླ་འོད་ཀྱི་རོལ་དབྱངས་ཁྲོད་ཀྱི་འགྲུལ་བཞུད་སོགས་ལའང་མོས་སོ།
    ཆར་རྗེས་ཀྱི་ནམ་མཁའ་ནི་སུ་ཞིག་གི་སེམས་པ་ཡིན་ནམ། ཆར་རྗེས་ཀྱི་བསིལ་རླུང་ནི་སུ་ཞིག་གི་བརྩེ་བ་ཡིན་ནམ། ཆར་བ་འགྲམས་དུས། ཆར་རྗེས་ཀྱི་གནམ་གཤིས་བཟང་བོ་ཉམས་སུ་མྱོང་སླད། ང་རང་སྡོད་ཤག་ལས་བུད་དེ་ཕྱི་རོལ་དུ་སོང་། ཕྱི་རོལ་གྱི་གནམ་གཤིས་ནི་བསིལ་ཞིང་དྭངས་པས། བདེ་སྣང་གི་ཚོར་བ་ཡན་གར་བ་ཞིག་ཡང་ཡང་སྟེར་བར་བྱེད། སྤྲིན་དཀར་ལ་ངེ་ལིང་ངེའི་གསེབ་ཀྱི་ཉི་ཟེར་འཇམ་པོ་ནི་དྭངས་གཙང་གི་ཆུ་རྡུལ་ལ་འཕྲད་དེ། ཅུང་ཟད་རྒྱང་རིང་བའི་བར་སྣང་ཁམས་ནས་འཇའ་ཚོན་ཞིག་ག་ལེར་འཆར་ནས་འོངས། སྐབས་དེར། བུ་མོ་ཞིག་ཀྱང་ཅུང་ཟད་ཐག་རིང་བའི་ས་ན་ང་ལ་ཕྱོགས་ནས་ཚུར་ཡོང་བཞིན་མཆིས། འཇའ་ཚོན་དེ་ཇེ་གསལ་ནས་ཇེ་གསལ་རེད། བུ་མོ་དེ་ཇེ་ཉེ་ནས་ཇེ་ཉེ་རེད།
    འཇའ་ཚོན་དེ་ཁ་དོག་སྣ་བདུན་གྱི་མདངས་ཀྱིས་མཛེས། བུ་མོ་དེ་མཚར་སྡུག་གི་འཕྱོར་ལྭས་ཀུན་ནས་སྒེག གལ་ཏེ། འཇའ་ཚོན་དེ་ནི་ནམ་མཁའ་དང་ངེད་གཉིས་བར་གྱི་གསེར་ཟམ་ཞིག་ཡིན་ན། བུ་མོ་དེ་ནི་གསེར་ཟམ་དེའི་སྟེང་ན་ཚུར་ཡོང་བཞིན་པ་དེའོ། བུ་མོ་དེ་ནི་སུ་ཡིན་ནམ། ང་དང་ཁ་གཏད་ནས་ཡོང་དགོས་དོན་ཅི་ཡིན་ནམ།
    དེ་ལྟར་བསམས་དུས། བུ་མོ་དེས་འཇའ་ཚོན་གྱི་གསེར་ཟམ་རྒྱབ་ཏུ་བསྐྱུར་ནས་ངའི་མིག་མདུན་དུ་སླེབས་འདུག ཁོ་མོའི་གདོང་ལ་འཛུམ་ཞིག་རྒྱས་ནའང་མིག་ཀོང་ནས་མིག་ཆུ་རྡོག་པོ་རེ་རེ་ཆད་པ་མེད་པར་འགྲིལ་ནས་བཞུར་བྱུང་། ང་རང་གློ་བུར་དུ་ལྐུགས་པ་ཞིག་ཏུ་གྱུར། སྨྲ་བ་མེད་པར་ཁ་རོག་གེར་ཁོ་མོའི་གདོང་ལ་ཅེར་ནས་བསྡད།
    མིག་ཆུ་དེ་ནི་ཆར་བའི་རིགས་གཞན་ཞིག་སྟེ། དེ་ནི་ད་ལོའི་ཆར་བ་འབབ་ཐེངས་གཉིས་པ་རེད། ཆར་བ་དེའི་རོལ་དབྱངས་ནི་ཆར་བ་འབབ་ཐེངས་དང་པོའི་རོལ་དབྱངས་ལས་ཀྱང་ལྡབ་འགས་ལྷག་ཅིང་། ཆར་བའི་རོལ་དབྱངས་དེས་རང་དབང་མེད་པར་ང་རང་འཇིག་རྟེན་གཞན་ཞིག་ལ་ག་ལེར་ག་ལེར་ཁྲིད་བྱུང་།
    ད་ནི་ཡུན་རིང་ཞིག་ལ། ངས་རྡུལ་ཕྲ་རབ་ཀྱི་ཉམ་ང་ཞིག་ལ་སེམས་ཁྲལ་བྱེད་པའང་ལོགས་སུ་གཡུག་ཆོག ངས་རྩྭ་རྐང་གཅིག་གི་ཁོག་པ་ནས་འཇིག་རྟེན་ཞིག་རྙེད་པའང་བོར་དུ་བཅུག་ཆོག
    ངས་བྱེ་ཐང་ན་རྔེའུ་ཞིག་ཁེར་རྐྱང་དུ་ལུས་ཡོད་པའང་མ་མཐོང་ཁུལ་བྱས་ཆོག ངས་མཁར་གྱང་གི་སྲུབས་ཀ་ནི་ལོ་རྒྱུས་ཤིག་ཡིན་ཚུལ་རྟོགས་པའང་སྣང་མེད་དུ་བསྐྱུར་ཆོག ངས་གཞུང་ལམ་དང་ཆུ་བོའི་བར་དུ་རྐང་ལམ་ཞིག་བཏོད་པར་ཡང་རྒྱང་དུ་བཀྱེད་ཆོག།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།