中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > རྩོམ་རིག > ལྷུག་རྩོམ། >
༄༅།། སློབ་ཁང་ནི་ཁྱོད་རང་འཚར་ལོངས་འབྱུང་སའི་གར་སྟེགས་ཡིན།
དུས་ཚོད།2019-03-04 09:30:33     རྩོམ་གྱི་ཡོང་ཁུངས། ཀན་ལྷོའི་གསར་འགྱུར། རྩོམ་པ་པོ། མི་གསལ།     ཆུང་། | འབྲིང་། | ཆེ།
    སློབ་ཁང་ནི་གར་སྟེགས་ཆུང་ཆུང་ཞིག་སྟེ། འདི་ལས་དགེ་རྒན་གྱི་ངག་གི་ཉམས་འགྱུར་ཐམས་ཅད་རྩལ་དུ་སྤྲུགས་ནས་སློབ་མར་འཆད་ཅིང་། ལུས་ཀྱི་སྟངས་སྟབས་དག་ཀྱང་གར་དུ་བསྒྱུར་ནས་སློབ་མར་ཕུལ་ཡོད། རང་སེམས་ཀྱི་སྣོད་ལ་གསོགས་པའི་ཤེས་རིག་གི་ཅ་ལག་རེ་རེ། སློབ་མ་ཚོར་བགོ་བཤའ་བརྒྱབ་ནས་ཁྱོད་ཚོ་མ་འོངས་པར་མི་རིགས་ཀྱི་ཁྱིམ་གཞི་འཛིན་པའི་བདག་པོ་བྱ་དགོས་པའི་རེ་སྐུལ་བྱས།
    སློབ་ཁང་ནས་ང་ཚོས་སྐད་ཆར་ཚིག་རྒྱན་དང་སྒྲོབ་ཉམས་བཏོད་མི་དགོས་ཤིང་། ལུས་ཀྱི་བཟོ་ལྟ་ལའང་ཚུལ་འཆོས་དང་རྫིག་ཉམས་ག་ལ་དགོས། དེ་བས། སློབ་ཁང་ནི་ང་ཚོ་ཀོག་ནུར་བྱ་ཆོག་པའི་འཛོང་ཁུག་བྱས་ཆོག
    མེ་ཏོག་འདྲ་བའི་བྱིས་པ་ཆུང་ཆུང་ཚོར་ཤེས་རིག་གི་བསིལ་ཆུ་སྟོར་ཏེ་འཚར་ལོངས་འབྱུང་དུ་འཇུག་དགོས་པས་སློབ་ཁང་ནི་ང་ཡི་རྨི་ལམ་ལ་གཤོག་པ་ཐོགས་སའི་ནམ་མཁའ་ཡིན། ནམ་མཁའ་ན་ཉི་ཟླ་དང་སྐར་ཚོགས་དག་ཀྱང་མེད་མི་རུང་བས། དགེ་རྒན་ནི་ཁྱོད་ཚོའི་ཉི་ཟླ་ཡིན་ལ་ཁྱོད་ཚོའང་དགེ་རྒན་ལ་འཁྱུད་པའི་སྐར་ཚོགས་ཀྱི་ཕྲེང་བ་ཡིན། སློབ་ཁང་ནས་ང་ཚོ་ཚངས་པ་དང་དབང་ཕྱུག ཁྱབ་འཇུག་སོགས་ལའང་མཇལ་དུ་ཡོད། སློབ་ཁང་ནས་ང་ཡི་སྒོ་སམ་ལ་ཡང་ཡང་བརྡར་བའི་ཡིག་འབྲུ་དག་ལ་འོད་ཟེར་འཚེར་ཏེ། རེ་འགའ་བའི་རྟགས་པར་གྲུབ་པའི་ཁང་བའི་ནམ་མཁར་འཇའ་འོད་འཁྲིགས།
    ཡང་སྐབས་ལ་ལར། དགེ་རྒན་གྱིས་ཁ་ལ་ཟ་མ་བཟའ་སྟངས་དང་ལུས་ལ་གྱོན་གོས་གྱོན་ཚུལ། ངག་གི་སྐད་ཆ་བརྗོད་སྟངས་ཚུན་ཆད་རེ་རེ་བཞིན་ཁྱོད་ཚོར་བསླབ་དུས། སློབ་ཁང་ནི་ང་ཚོའི་གཡང་ཁྱིམ་སྟེ་མཁས་པའི་ཚིག་ལ་རྒྱན་ཆ་དང་བླ་མའི་གསུང་གི་རྒྱབ་བརྟེན་མི་དགོས་པའི་སྐད་ཆ་རྗེན་པ་དག་གང་འདོད་བྱོ་སྟེ་རང་སེམས་ཀྱི་གནོང་བ་དང་དབུགས་དབྱུང་ཕྱི་ལ་ཕྱུང་ཆོག
    སློབ་ཁང་ནས་དགེ་རྒན་གྱིས་ཁྱོད་ལ་ཚིག་གི་བེར་ཀས་གཞུས་ཀྱང་གདམས་ངག་དང་ཕྱག་འཇུག་ལན་གསུམ་གནང་ཡང་སྐུལ་ལྕག་ཏུ་འགྱུར་ངེས་པས། སློབ་ཁང་ནི་ཁྱོད་ལ་ལག་ཡོང་གི་སྐྱེས་མང་རག་སའི་གཏེར་ཁ་ཡིན། འཛུམ་ལྷུག་ལྷུག་གི་ཐ་སྙད་དག་ཀྱང་ལྗིད་ཏིག་ཏིག་གིས་ཁྱོད་ཀྱི་བྲང་ཁར་འཚང་ཡོང་སྟེ། ཁྱོད་ཀྱི་བསམ་བློ་རྒྱགས་པོར་ཆགས་ངེས་ཤིང་འཇིག་རྟེན་ངོས་འཛིན་དང་ལེགས་ཉེས་དབྱེ་འབྱེད་ཀྱི་དབུ་ཡང་སློབ་ཁང་ནས་བརྩམ་ངེས་པས་སློབ་ཁང་ནི་ཁྱོད་ཀྱི་མི་ཚེ་ལ་བྲིས་པའི་ཐོག་མའི་དབུ་ཁྱུད་ཡིན།
    སློབ་ཁང་ནས་དགེ་རྒན་གྱིས་ཁྱོད་ལ་གོ་དོན་དང་མཚན་ཉིད་མང་བོ་ཞིག་གི་ཁུར་བོ་འགེལ་སྲིད་མོད་དེ་ནི་ཁྱོད་རང་རྒྱང་ལ་ཆས་པའི་འཁར་བ་དང་འཇིག་རྟེན་མཐོང་བའི་རྒྱང་ཤེལ་ཡིན། འགྲོ་ཞོར་བཏུས་པའི་གཅེས་ནོར་འདི་དག་མ་འོངས་པར་ཁྱོད་རང་ཕྱུག་པོར་ཆགས་པའི་ཚེ་ནོམ་དང་བདེན་པ་གླུ་རུ་གྱེར་ཐུབ་པའི་སྒལ་ཚིགས་ཡིན་པས་སློབ་ཁང་ནི་ཁྱོད་ཀྱི་རྔུལ་ཆུ་སྟོར་སའི་ཞིང་ཐང་ཡིན།
    སློབ་ཁང་ནས་དགེ་རྒན་གྱིས་ཁྱོད་ལ་ཁ་རོག་གེར་ལབ་པའི་སྐད་ཆ་དག་མ་འོངས་པར་ཁྱོད་ཀྱིས་སྐད་གསེང་མཐོན་པོས་གཞན་ལ་བསྒྲཊ་ཆོག དེ་ནི་གདམས་ངག་ཡིན། གདམས་ངག་གི་ཆུ་འགོ་སློབ་ཁང་ནས་བརྡོལ་ཏེ་འཛམ་གླིང་དུ་བཞུར་སྲིད་པས་སློབ་ཁང་ནི་ཁྱོད་རང་བརྩེ་བས་རུམ་པའི་མ་ཡུམ་ཡིན་ཆོག
    གོང་དཔོན་པོས་མཐོང་ན་མགོ་བོ་སྒུར་མི་དགོས་ཤིང་དམའ་སྤྲང་བོར་འཕྲད་ཀྱང་ཚིག་རྩུབ་ཀྱི་མདའ་མོས་སྣུན་མི་དགོས་པའི་གནས་དེ་སློབ་ཁང་ཡིན་པས། སློབ་ཁང་ནས་ངས་ཀ་ཁའི་དབྱངས་རྟ་སྐྱོར་ཏེ་ལམ་ལ་ཆས་པ་ཡིན་ལ་སློབ་ཁང་ནི་ཆེས་དྭངས་གཙང་གི་བགྲོད་ལམ་དང་། ཆེས་དྲང་སྙོམ་གྱི་རྒྱ་མ་བྱས་ཆོག
    སློབ་ཁང་ཁྲུས་གཞོང་བྱས་ཏེ་ཁ་སང་ཁྱོད་ཀྱི་ལུས་ཀྱི་མི་གཙང་བ་དང་ལྗན་ལྗིན་དག་གཙང་བཀྲུ་བྱས་སོང་ལ་དེ་རུ་ཀ་ཁའི་ལྗང་མྱུག་བཏབ་སྟེ་མགོ་ལྕོག་ལྡེམ་པའི་ཀུན་སློང་གི་འབྲས་བུ་སྨིན་སོང་། དེ་རིང་ད་དུང་ཡང་ཁྱོད་རང་སློབ་ཁང་ལ་བསྟེན་དགོས་ཤིང་སློབ་ཁང་གིས་སྔར་བཞིན་འབྱུང་བཞིར་བྱིལ་བྱིལ་བྱས་ཏེ། དར་དཀར་བཞིན་རྒྱང་ལ་འཐེན་པའི་ལམ་བུ་ཞིག་ངོ་སྤྲོད་བྱ་ངེས། ལམ་བུ་དེ་ནི་ཁྱོད་ཀྱི་མདུན་ལམ་ཡིན། བཀའ་བསྟན་གྱི་གླེགས་བམ་དང་བདེན་པའི་བླ་དང་སྲོག་ལ་འཁྱུད་པའི་འོད་ཀྱི་ལྡིང་ཁང་། གནས་ལུགས་ཀྱི་ཆུ་མོ་ཤག་ཤག་བཞུར་བའི་ཡིད་ཀྱི་དག་ཞིང་། རྨི་ལམ་མ་ཡིན་པའི་གནས་མཆོག་མང་བོ་ཞིག་ལ་གནས་དེ་ནས་འཕྲད་སྲིད་པས། ང་ཚོ་ཅིས་ཀྱང་མདུན་དུ་འགྲོ་དགོས།
    མདོར་དེད་ན་སློབ་ཁང་ནི་ང་ཚོའི་འཇིག་རྟེན་ཏེ། འདི་ནས་སྲིད་གསུམ་ལ་གཡས་སྐོར་བརྒྱབ་ཆོག་ལ། འཛམ་གླིང་གི་ཡང་རྩེར་འགོས་ཏེ་སྲིད་པའི་ལྟད་མོར་བལྟས་པས་ང་ཚོར་སློབ་ཁང་ལས་ཆེ་བའི་མངའ་ཐང་ཞིག་གང་དུ་ཡོད།།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།