中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > རྩོམ་རིག > ལྷུག་རྩོམ། >
༄༅།། བོད་ཀྱི་སྦྲ་ནག་གི་མཚོན་དོན།
དུས་ཚོད།2020-04-22 11:23:51     རྩོམ་གྱི་ཡོང་ཁུངས།ཀན་ལྷོའི་གསར་འགྱུར།     ཆུང་། | འབྲིང་། | ཆེ།
 སྦྲ་ནག་ནི་རྩིད་པ་ལས་བཟོས་པའི་འཚོ་བའི་སྡོད་གནས་ཅིག་ཡིན། བཟོ་སྟངས་ནི་ཁུལ་རྩིད་འཁེལ་འཐག་བྱས་པའི་སྦྲེ་འདོམ་བརྒྱ་དང་བརྒྱད་ཅུ་ཡས་མས་ཀྱིས་ཚེམ་དྲུབ་བྱས་པའི་དབྱིབས་རུས་སྦལ་གཟུགས་སུ་བྱས་པ་སོགས་གཟུགས་དབྱིབས་སྣ་ཚོགས་དང་ཆེ་ཆུང་སྣ་ཚོགས་ཡོད། ད་དུང་སྦྲ་ཆེན་དེ་དག་གི་གཡས་གཡོན་དུ་ཕོ་སྦྲ་དང་མོ་སྦྲ། ནག་ཚང་། གུར་ར། གཡབ་སོགས་མང་པོ་ཡོད། སྦྲ་ཆེ་བའི་རིགས་ལ་སྦྲ་ཁ་ནས་ཆོན་ཆེན་བར་རེ་བ་ལྔ་སྡེབ་དང་བརྒྱད་སྡེབ། ཆོན་ཆེན་ནས་ཆོན་ཆུང་བར་རེ་བ་ལྔ་སྡེབ་བརྒྱད་སྡེབ་སྦྲ་མཐར་གཉིས་དང་བཞི་སོགས་བྱས་ཏེ་ཕྱོགས་རེ་ལ་བཅུ་གཉིས་བཅོ་བརྒྱད་སོགས་ཡོད།
    གཅིག སྦྲ་ནག་གི་ལོ་རྒྱུས།
    སྦྲ་ནག་གི་ལོ་རྒྱུས་ནི་རང་རེ་བོད་ཀྱི་ལོ་རྒྱུས་ཇི་ལྟར་རིང་བ་དེ་བཞིན་དུ་རིང་བ་ཡིན་ཏེ་འདི་ཡི་རྒྱུ་ཆ་དང་བཟོ་སྟངས་གང་ལ་གཞིག་ན་གདོད་མའི་རྣམ་པ་ཆེས་ལེགས་པར་འཆང་བའི་དུས་སྔ་མོའི་མི་དག་གི་ལག་རྩལ་ལས་གྲུབ་པར་མངོན་པས་སོ། ལྷག་ཏུ་བོད་ཀྱི་བཙན་པོ་གྲི་གུམ་བཙན་པོའི་རིང་ལ་འཁེལ་འཐག་ལས་རིགས་དར་ཁྱབ་ཏུ་ཕྱིན་པའི་བཤད་སྲོལ་ལྟར་ན། སྦྲ་ནག་གི་ལོ་རྒྱུས་ཀྱང་ཉུང་མཐར་མི་ལོ་ཉིས་སྟོང་ལྔ་བརྒྱའི་ཡར་སྔོན་དུ་དེད་ཆོག་པ་རེད། འབྲོག་དམངས་ཀྱི་འཚོ་རྟེན་གཙོ་བོ་ནི་སྒོ་ཕྱུགས་དག་ཡིན་ཞིང་། སྒོ་ཕྱུགས་ནི་རྟག་པར་རྩྭ་ཆུ་གང་བཟང་གི་གནས་ལ་བརྟེན་དགོས་པ་དང་། གནས་གཅིག་ཏུ་སྡོད་པ་མེད་པར་ནམ་ཡང་རྩྭ་ཆུའི་རྗེས་བསྙེགས་ནས་འགྲོ་དགོས་པ་མ་ཟད། དབྱར་དགུན་སྟོན་དཔྱིད་ཀྱི་དུས་སོ་སོར་སྡོད་ཡུལ་སྤོ་དགོས་པས་ཁང་ཁྱིམ་གྱིས་ཕན་ཐོགས་མེད་པ་རེད། དུས་ཡུན་དེའི་རིང་སྦྲ་ནག་གིས་བོད་མཐོ་སྒང་གི་སྐྱས་སྤོར་ལས་རིགས་དང་འབྲོག་ལས་འཚོ་བའི་དམིགས་བསལ་གྱི་དགོས་མཁོ་བསྐངས་ཡོད།
    གཉིས། སྦྲ་ནག་གི་རྒྱུ་ཆ།
    སྦྲ་ནག་གི་རྒྱུ་ཆ་ནི་ཕྱུགས་ཀྱི་རྩིད་པ་དང་ཁུ་ལུ་གཉིས་ཡིན་ཅིང་། དེ་ཡང་དང་པོར་ཁུལ་རྩིད་གཉིས་སོ་སོར་བསལ་ཞིང་རྩིད་པ་རྐྱང་བའི་རིགས་གཅིག་དང་ཁུལ་རྩིད་འདྲེས་མའི་རིགས་གཉིས་སུ་ཡོད། རྩིད་པ་རྐྱང་བའི་རིགས་ནི་སྐུད་པ་ཅུང་ཕྲ་མོ་བྱས་ནས་ཐགས་ཀྱི་རྒྱུ་བྱེད་ལ། ཁུལ་རྩིད་འདྲེས་མ་དེ་ཡང་སྐུད་པ་ཅུང་སྦོམ་པོར་བྱས་ཏེ་ཐགས་ཀྱི་ཞེང་ལ་དྲངས་པའི་སྐུད་པ་དེ་ལ་སྤུན་ཞེས་ཐ་སྙད་བྱེད་དོ། སྐུད་པ་འཁེལ་སྟངས་ལ་འཕང་སྤྱད་ནས་འཁེལ་སྟངས་གཅིག་དང་འཁྲིལ་སྤྱད་ནས་འཁེལ་སྟངས་གཉིས་སུ་ཡོད། དགལ་བྱའི་སྐུད་པ་ལའང་རྐྱ་འཐབ་དང་གཅིག་འཁེལ་ཏེ། དེ་ཡང་སྐུད་པ་རྐྱ་འཐབ་བྱས་ཏེ་འཁེལ་བ་ནི་རེ་བའི་སྤུས་ཀ་ལེགས་པའི་ཆེད་དུ་ཡིན་ཞིང་གཅིག་འཁེལ་བྱེད་པ་ནི་དེ་ཙམ་མི་ལེགས་ཀྱང་འདི་ལ་རྩིད་པ་མང་པོ་མི་དགོས་པས་སོ།
    གསུམ། སྦྲ་ནག་བཟོ་སྟངས།
    བཟོ་སྟངས་ནི་ཁུལ་རྩིད་འཁེལ་འཐག་བྱས་པའི་སྦྲེ་འདོམ་བརྒྱ་དང་བརྒྱད་ཅུ་ཡས་མས་ཀྱིས་ཚེམ་དྲུབ་བྱས་པའི་དབྱིབས་རུས་སྦལ་གཟུགས་སུ་བྱས་པ་སོགས་གཟུགས་དབྱིབས་སྣ་ཚོགས་དང་ཆེ་ཆུང་སྣ་ཚོགས་ཡོད། ད་དུང་སྦྲ་ཆེན་དེ་དག་གི་གཡས་གཡོན་དུ་ཕོ་སྦྲ་དང་མོ་སྦྲ། ནག་ཚང་། གུར་ར། གཡབ་སོགས་མང་པོ་ཡོད། སྦྲ་ཆེ་བའི་རིགས་ལ་སྦྲ་ཁ་ནས་ཆོན་ཆེན་བར་རེ་བ་ལྔ་སྡེབ་དང་བརྒྱད་སྡེབ། ཆོན་ཆེན་ནས་ཆོན་ཆུང་བར་རེ་བ་ལྔ་སྡེབ་བརྒྱད་སྡེབ་སྦྲ་མཐར་གཉིས་དང་བཞི་སོགས་བྱས་ཏེ་ཕྱོགས་རེ་ལ་བཅུ་གཉིས་བཅོ་བརྒྱད་སོགས་ཡོད། སྒོ་འཚང་དང་ཕུགས་འཚང་གཉིས་ནི་རེ་བ་སྲབ་མོ་གྱེན་དུ་གཏོང་བ་ཡིན་ནོ། སྦྲ་ཕུབ་ཚུལ་ནི་ཕྱི་ཀ་དང་ནང་ཀ་ཟེར་བའི་སྦྲ་གྱེན་དུ་འགེར་བྱེད་ཀྱི་ཀ་ར་སྟེ་ནང་གི་ཀ་ར་ནི་ཅུང་ཙམ་སྦོམ་དགོས་ལ་ཕྱི་ཡི་ཀ་ར་ནི་ཅུང་ཕྲ་དགོས་པ་ཡིན། ཐོག་མར་སྦྲ་ཕུབ་དུས་ཕུགས་ནས་མར་ཕུབ་པ་ཡིན་ལ་དེ་ཡང་དང་པོ་ཕུགས་ཆོན་ཡོ་འཁྱོག་མེད་པར་དྲང་མོར་འཐེན་ཏེ་ཕུར་བའི་སྐེ་ལ་བཏགས་ནས་ས་ལ་བརྡབས་ཤིང་ནང་གི་ཀ་ར་ཐོག་མ་དེ་གྱེན་དུ་སློང་ཞོར་ཆོན་ཆེན་གཡས་གཡོན་གཉིས་རིམ་གྱིས་འཐེན་ཏེ་ཕུབ་པ་ཡིན་ལ། ཐོག་མར་ཕུགས་ཆོན་འཐེན་སྐབས་ཕྱུགས་ལ་གོད་ཁ་དང་མི་ལ་ན་ཚ་མི་ཡོང་བའི་སྨོན་ལམ་འདེབས་པ་དང་རྟེན་འབྲེལ་གྱི་ཆེད་དུ་ཀ་འགོ་དང་སྦྲ་ཁ་ལ་མར་བསྐུ་བ་སོགས་ཀྱི་སྲོལ་ཡོད། ཕྱི་ཡི་ཀ་ར་ཡང་ཆོན་ཆེན་ལ་འགེར་བ་མ་གཏོགས་ཆོན་ཆུང་ལ་འགེར་སྲོལ་མེད།
    བཞི། མཚོན་བྱེད།
    སྦྲ་དེ་རུས་སྦལ་གཟུགས་སུ་བྱས་པས་གང་དུ་ཕུབ་ནའང་ས་དགྲ་དང་ཕྱུགས་ཀྱི་ལྷས་སྐྱོན་མེད་པར་མཚོན། དེས་ན་སྦྲའི་ཆོན་ཆེན་བཞི་སའི་སྲུང་བཞི་དང་། ཕུག་ཆོན་དཀར་པོ་སའི་དམུ་ཐག སྒོ་ཆོན་ཉི་ཟླ་ཤར་ལམ་གནམ་གྱི་དམུ་ཐག མཁལ་ཆོན་དྲུག་སའི་ལེགས་ཆ་དྲུག བསོད་ནམས་ནང་གི་ཀ་བཞི། རིགས་རྒྱུད་ལྷའི་ཀ་བ། དབང་ཐང་གཉན་གྱི་ཀ་བ། ཕྱྭ་གཡང་ཀླུའི་ཀ་བ། མི་འགྱུར་གནམ་གྱི་ཀ་བ་དང་བཞི་ཟེར། སྦྲའི་ཟུང་མཆར་ཉེར་བདུན་གྱིས་རྒྱུ་སྐར་ཉེར་བདུན་མཚོན། ནང་བྲན་གྱི་ཐག་བར་བཅུ་གཉིས་ཀྱིས་ལོ་སྐོར་བཅུ་གཉིས་མཚོན། སྦྲའི་བྱ་བྲང་བྱ་རྒྱལ་ཁྱུང་གི་བྲང་གཟུགས་ཡིན་པས་ཀླུ་གནོད་འགོག སྦྲའི་སེང་ཐོད་སེང་གེའི་ཐོད་གཟུགས་ཡིན་པས་ཐོག་འགོག་པ་སོགས་བཤད་པ་མང་། ཡང་འཚེར་སར་ཐོན་ཅིང་སྦྲ་ཕུབ་ཚར་རྗེས། ཁྱིམ་བདག་གིས་སྨོན་ལམ་འདེབས་སྲོལ་ཡོད་དེ། ནང་དུ་གསེར་གྱི་ཀ་བ་མ་ཆག ཕྱི་རུ་དངུལ་གྱི་ཆོན་ཐག་མ་ཆད། གུང་ཤིང་གཡུ་ཡི་གདུང་མ་མ་ལྷུང་། མཐའ་བཞིའི་དུང་གི་ཕུར་བ་མ་འབུད། ལྷས་ཁ་འཕྲག་དགོས། མཚེར་ཁ་དྲོ་དགོས་ཟེར། དེ་ཡང་སྦྲ་ཡི་སྒོ་སྟེང་དང་ཕུགས་སྟེང་ལ་དར་ལྕོག་འདོགས་པའི་ལུགས་སྲོལ་ཡོད་ཅིང་དེ་ནི་གཙོ་བོ་མི་ཕྱུགས་ཀྱི་རྐྱེན་གེགས་དང་གོད་ཁ་སོགས་བཟློག་ཆེད་ཡིན་ཞེས་བཤད་སྲོལ་ཡོད་དོ།།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།