༄༅།།《གྲིབ་གཟུགས་ཁྲོད་ཀྱི་མི་ཚེ 》བཀླགས་པའི་འཆར་སྣང་། - ལྷུག་རྩོམ། - མདོ་ལྷོ་དྲ་བ།-甘南香巴拉在线
  中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > རྩོམ་རིག > ལྷུག་རྩོམ། >
༄༅།།《གྲིབ་གཟུགས་ཁྲོད་ཀྱི་མི་ཚེ 》བཀླགས་པའི་འཆར་སྣང་།
དུས་ཚོད།2020-11-18 15:54:52     རྩོམ་གྱི་ཡོང་ཁུངས། ཀན་ལྷོའི་གསར་འགྱུར། དཀོན་མཆོག་བཀྲ་ཤིས། [ལྷ་ས]    ཆུང་། | འབྲིང་། | ཆེ།
《གྲིབ་གཟུགས་ཁྲོད་ཀྱི་མི་ཚེ 》བཀླགས་པའི་འཆར་སྣང་།

དཀོན་མཆོག་བཀྲ་ཤིས། [ལྷ་ས]
    ༡. རྩོམ་པ་པོ་དང་ཞལ་མཇལ་བ།
    རྩོམ་པ་པོ་ལྷ་བྱམས་རྒྱལ་ནི་དུས་རབས་གོང་མའི་མཇུག་ཏུ་ཕ་ཡུལ་ཁྲི་ཀ་རུ་སྐྱེས་ལ། ཁོང་གི་སྒྲུང་གཏམ་དང་འབོལ་རྩོམ་གང་ཡིན་ཡང་། ཀློག་པ་པོ་དག་གི་ཁྲོད་དུ་དགའ་བསུ་དང་གདེང་འཇོག་མི་དམན་པ་བྱེད་ཀྱི་ཡོད་ཅིང་། མི་ལོ་གང་མང་ཞིག་གི་གསར་རྩོམ་ཉམས་མྱོང་དང་རྩོམ་རིག་ལ་བཅངས་པའི་འདུན་མ་དང་སྤྲོ་སེམས་སོགས་ཕྱི་ནང་གི་རྐྱེན་དུ་མས་ད་སྔ་ཁོང་གི་བརྩམས་ཆོས་དག་ལ་གྲུབ་འབྲས་ཆེན་པོ་བླངས་པ་དང་།  སྔ་གཞུག་ཏུསྦྲང་ཆརརྩོམ་རིག་བྱ་དགའ་ཐེངས་དུ་མར་ཐོབ་མྱོང་ལ། དེ་བས་ད་དུང་ལྷ་ལུང་རྒྱ་མཚོས“ལྷ་བྱམས་རྒྱལ་ནི་དེང་གི་དུས་སུ་ཀློག་པ་པོའི་ཁྲོད་དུ་ཆེས་དགའ་བསུ་ཐོབ་པའི་རྩོམ་པ་པོ་ཞིག་རེད། ཀློག་པ་པོ་དག་ཤེས་བཞིན་དང་ཤེས་བཞིན་མ་ཡིན་པའི་ངང་ལྷ་བྱམས་རྒྱལ་གྱི་བརྩམས་སྒྲུང་ཀློག་སྤྲོ་བ་ནི་ངས་བལྟས་ན་གཙོ་བོ་ཁོའི་བརྩམས་སྒྲུང་ལས་མངོན་པའི་དངོས་ཡོད་རིང་ལུགས་ཀྱི་སྙིང་སྟོབས་དང་ལྷུག་བརྗོད་ཀྱི་སྐད་ཆ་གཉིས་ཀྱི་རྐྱེན་གྱིས་མཉམ་འུར་བྱུང་བ་རེད་འདོད།”
    ༢. སྤྱི་ཚོགས་དངོས་ཀྱི་སྣང་ཚུལ་ལ་ཞུགས་ནས་བསམ་གཞིག་གི་རྙི་རུ་ཚུད་པ།
    གཏན་ཚིགས་དང་ལྷུན་ཆགས། བྱམས་སེམས་དང་ཀུན་ཕན་གྱི་ལྷག་བསམ་མངའ་བའི་རང་གཤིས་ནས། ཅོལ་ཆུང་དང་ཆོ་མེད། བརྩེ་མེད་དང་རང་གཅེས་ཀྱི་ལས་སུ་འགྱུར་བཞིན་པའི་མི་གཞི། བདག་བས་གཞན་གཅེས་ཀྱི་ལྷག་བསམ་དང་བདག་གཞན་མཉམ་བརྗེ་ཡི་ཀུན་སློང་མངའ་བ་ནས་ང་སྐྱིད་ཁྱོད་སྡུག་གི་ཕྱོགས་སུ་སྟ་གོན་བྱས་པ། འདི་དག་ནི་དུས་རབས་ཀྱི་རྟ་ཕོས་ཚན་རིག་གི་བུ་ཆུང་རྙེད་ནས་མཚམས་འདིར་སླེབས་དུས། མི་ནི་མི་དང་མི་འདྲ་བར། སེམས་མེད་ཀྱི་འཕྲུལ་ཆས་དང་ལྷན་དུ་འཚོ་བ་རོལ་བ་ལས། མིའང་སེམས་མེད་ཀྱི་འཕྲུལ་ཆས་གང་ཞིག་དང་འདྲ་བར། འཁྲུག་རྩོད་དང་སྡུག་བསྔལ་སྐྱེལ་བྱེད་ཅིག་ཏུ་སྤྲུལ་གྱིན་འདུག དེ་ནི་གཙོ་བོ་མི་གཤིས་ཀྱི་རུས་རྐང་མ་བཟང་བས་ལན་ལ། ཡང་གཅིག་བཤད་ན་སེམས་གཏིང་དུ་སྙིང་རྗེའི་ཁ་རླངས་མ་འགོས་པས་ཀྱང་ཡིན་སྲིད།
    ད་སྐབས་མིའི་རིགས་ཀྱི་ཚོགས་སྤྱི་འདིར་ཉིན་རེ་བཞིན་འཚོ་བའི་འགྲན་རྩོད་དང་དཔལ་འབྱོར་གྱི་གནོན་ཤུགས་ཀྱིས། མི་ཐམས་ཅད་ཀྱི་སེམས་ཁམས་ལ་ཤུགས་རྐྱེན་ཐེབས་ནས། ཕན་ཚུན་སུ་ལའང་བློ་གཏད་དང་ཡིད་ཆེས་བྱེད་དཀའ་བ་ཞིག་ཏུ་འགྱུར་གྱིན་འདུག་ཅིང་། དེའང་མཐར་གཏུགས་ན་མི་སྒེར་སོ་སོའི་ཧམ་སེམས་ཆེ་དྲག་སོང་བས་ཡིན་པས། དངོས་པོའི་དཔལ་ཡོན་དང་འཚོ་བའི་སྟོབས་འབྱོར་ལ་ཆོག་ཤེས་རྟེན་ཤེས་ན། མི་གཤིས་འདིའང་དེ་འདྲའི་སྐྱུག་བྲོ་ཞིང་སྙིང་པོ་མེད་པ་ཞིག་ག་ནས་ཡིན་དེ་ཡིན་མི་སྲིད། དེའི་ཕྱིར་འཚོ་བ་དོན་ལྡན་དང་མི་གཤིས་ལེགས་པོ་ཞིག་བྱ་རྒྱུ་གལ་ཆེ་བར་མཐོང་ངོ་།
    ༣. སྒྱུ་རྩལ་གྱི་ཁྱད་ཆོས།
    ཁོའི་རང་ཉིད་ཀྱི་མི་ཚེའི་བྱུང་བའམ་གནས་སའི་ཁོར་ཡུག་གི་གྲུ་ཟུར་ནས་རྩོམ་གཤིས་དང་སྒྱུ་རྩལ་གྱི་བློས་བསླངས་ལ་འགྱུར་བ་ཐེབས་ཤིང་མི་ཚོགས་དང་འུར་ཟིང་། བྲེལ་འཚུབ། དུས་ཚོད་ཀྱི་འཁོར་འགྲོས་ཀྱིས་ཡོད་ཚད་ར་སྤྲད་ལ། ཐོག་མའི་གཉུག་གཤིས་དེ་སྤྱི་ཚོགས་ཀྱིས་སླད་ཅིང་འཚོ་བའི་ཁ་དོག་ཀྱང་མངོན་ལྐོག་གི་ཁྲོད་ནས་འདས། གཞན་ཡང་དྲང་བོར་སྨྲ་བར་འདོད་པའི་གཏམ་ཡང་ཐད་ཀར་དུ་འཆད་མི་ཐུབ་ལ། འཛུམ་མདངས་ཀྱི་གདོང་རིས་འོག་ན་གདུག་རྩུབ་དང་བསླུ་བྲིད་ཀྱི་རལ་གྲི་ཕྱར་ཡོད་ལ། འཚོ་བའི་སྐྱོ་གདུང་གི་ངོགས་ནས་མི་ཚེ་བསྐྱལ་དགོས་པ་དེ་གྲིབ་གཟུགས་ཀྱི་འདབ་མས་གཡོགས་ཤིང་རབ་རིབ། ལྡབ་ལྡིབ། ཟ་ཟི། གསལ་ལ་མི་གསལ་བའི་ངོགས་ནས་སྤྱིར་བཏང་བའི་ལུས་ཀྱི་འགུལ་སྟངས་དང་ལག་པའི་སྡེབ་རྩལ། ལས་ཁུངས་ཀྱི་འགོ་བ་དང་སྤྱིར་བཏང་གི་ལས་མི། དེ་མིན་བྱ་བའི་ཡང་ལྕི། བྱ་བར་བཟུང་བའི་འདུ་ཤེས་སོགས་ལས་སྒྲུང་གཏམ་ཧྲིལ་བོའི་ནང་གི་བཅུད་དང་སྙེག་བྱའི་འདུན་མ། སེམས་ཀྱི་ཚོར་འདུ་བཅས་མངོན་པར་མཚོན་ལ། གཞན་སུ་དང་གང་ལའང་མི་མངའ་བའི་རྩོམ་པ་པོ་མི་བུ་སྒེར་ཚུགས་ཅན་གྱི་བསམ་བློ་མཚོན་ལ། སྒྲུང་གཏམ་གྱི་མི་སྣ་བཞེངས་སྐྲུན་དང་སེམས་འགྱུ་སོགས་ལས་ཁོ་དང་སྒྲུང་གཏམ་ཁྲོད་ཀྱི་མི་སྣ་གཉིས་ནི་མཐའ་མར་དྲང་ཐིག་གཅིག་ཏུ་བབས།
    ༤ . སྤྱི་ཚོགས་ལ་བཞག་པའི་དྲན་སྣང་།
    དུས་རབས་གོང་མའི་མེས་པོ་ཚོས་དཔྱད་ན་དེ་ནི་སྤྱི་ཚོགས་ཀྱི་སྐྱུག་གཡེར་བ་དང་མིས་མི་ཟ་བ། རང་ཚུགས་ཀྱི་བསམ་བློ་གང་ཡང་མི་མངའ་བའི་གྲལ་མཐའ་བ། ཆོག་ཤེས་མེད་པ་དང་ལས་རྒྱུ་འབྲས་གང་ཡང་མི་བརྩི་བའི་དངོས་ཡོད་འཚོ་བའི་ཟུར་དང་ངོས་ལ་ལེ་བདའ་དང་འཁང་ར་བྱས་ལ། ཡབ་མེས་ཀྱི་བླ་སྒུལ་མི་རུང་བའི་རང་བརྩིའི་བསམ་པར་ཕྱིར་རྟོག་བྱས།
    དུས་རབས་འདིའི་མི་བུ་ཚོས་གླེང་ན་ད་ནི་སྤྱི་ཚོགས་གསར་བའི་སྣེ་མོར་འཇུས་པ་ཡིན་ལ་རང་ཉིད་ཀྱི་འདོད་འདུན་དང་ཁེ་ཕན། འཚོ་བ་དང་ཁྱིམ་གྱི་དོན་དུ་ཐོག་མའི་གཉུག་གཤིས་དང་བབ་ཆགས་ཀྱི་སེམས་ཁམས་སོགས་གང་ཡང་མེད་ཀྱང་རུང་ལ། གཙོ་བོ་རང་ཉིད་ཀྱི་དམིགས་ཡུལ་དང་འཚོལ་སྙེག་གི་ལམ་ཁ་ཡངས་པོར་འབྱེད་དགོས་ཟེར།
    དེ་བས་ཀྱང་དྲན་སྣང་གི་བཟི་ཁ་རེ་རེ་ལས་སྤྱི་ཚོགས་ཀྱི་རྒྱབ་ལྗོངས་དང་འཚོ་བའི་ཉིང་ཁུ་དྲན་ལ། བདེ་བ་དང་འདོད་པ། ཆོག་ཤེས་དང་ཧམ་སེམས། གཉུག་གཤིས་དང་བཅོས་འཛུམ། ཁྱོད་དགའ་ང་སྐྱིད། ཁྱོད་ཕམ་ང་རྒྱལ། འདི་དག་ཐ་སྙད་ཀྱི་བར་གསེང་རེ་རེ་ནས་མི་ཚེའི་སྡིངས་ཆར་གར་གྱི་ཡང་སྙིང་རྩེན། བདེ་སྡུག་གི་རི་མོ་གསལ།།
                                                                                              རྩོམ་སྒྲིག་པ། སངས་རྒྱས་སྐྱིད།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།