中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > མི་སྣ། > སྔོན་བྱོན་མཁས་དབང་། >
༄༅།། ལོ་ཙཱ་པ་རིན་ཆེན་བཟང་པོ།
དུས་ཚོད།2017-08-04 10:55:08     རྩོམ་གྱི་ཡོང་ཁུངས། མཚོ་སྔོན་པོ་དྲ་བ། རྩོམ་པ་པོ། ཞང་ཞུང་ཆོས་དབང་གྲཊ་པ།    ཆུང་། | འབྲིང་། | ཆེ།
ལ་དྭགས་ཀྱི་ལོ་ཙཱ་པའི་ལྷ་ཁང་དུ་བཞེངས་པའི་ལོ་ཆེན་རིན་ཆེན་བཟང་པོའི་སྐུ་བརྙན།
 ན་མཿཤྲི་གུ་རུ་རཏྣ་བྷ་དྲ་ཡེ། །དཔལ་ལྡན་ཡོན་ཏན་སྦྲང་རྩིའི་དོག་པ་ཡིས།། འཁྱུད་པའི་ཞབས་སེན་རེག་པའི་དགེ་མཚན་ཅན།། ལྷ་དབང་གཙུག་གི་མཚོ་སྐྱེས་ཕྲེང་བ་ཡིས།། འགྲོ་འདིའི་སྤྱི་བོ་རྟག་ཏུ་མཛེས་གྱུར་ཅིག། ཚོགས་གཉིས་རིན་ཆེན་མ་ལུས་གཅིག་བསྡུས་པ། །སྐལ་བཟང་བསོད་ནམས་ཕུང་བོ་ཡ་མཚན་ཞེས།། མཁས་མང་དེད་དཔོན་ཚོགས་འདིས་བསྟོད་པའི་གྲུ།། སྦྱར་བས་ཐུབ་བསྟན་མཚོ་ཆེན་གང་བར་གྱུར།། ཀཻ་ལ་ཤས་མཚོན་བྱང་དུ་དགེ་སློང་མཆོག། བྱ་ཡི་གདོང་ཅན་ཐུབ་བསྟན་དམིགས་བུ་ཞིག །འབྱུང་པོ་ཀུན་དགའ་རངས་པ་སྐྱེད་ཅིག་ཅེས།། སྟོན་པས་བསྟོད་ཚིག་ཕྲེང་བ་རྣམ་པར་སྤེལ།། མཆོད་པ་གསལ་བྱེད་ཐལ་མོ་སྦྱར་མཛེས་སུ།། ཚངས་པའི་ཅོད་པན་ས་ལ་ལྷུང་བ་ན།། ས་སྐྱོང་ཚོགས་འདིའི་གཙུག་རྒྱན་གསེར་ལྡན་མའི། །ལྟོ་བའི་རྒྱན་དུ་ཅི་སྟེ་མི་བགྱི་ལགས།། ཉིད་ཀྱི་ཡབ་རྗེ་འབྱོར་བ་དུལ་བས་བརྒྱན།། ཡོན་ཏན་སྐྱིལ་གྲུང་འགྲོ་འདིའི་སྤྱི་བོར་འཛེགས།། གྲོང་ཁྱེར་པ་རྣམས་གསེར་གྱི་ཁང་བའི་ཕྲེང་།། མུ་ཏིག་ཚོགས་འབར་བརྒྱ་བྱིན་སར་གཤེགས་འདྲ།། མཐོ་རིས་དཔལ་མོ་ཡུམ་གྱི་ཡོན་ཏན་ཆེས།། སྐྲག་ལྡན་སྒྱུ་འཕྲུལ་ཞག་བདུན་ཉིད་དུ་ལྷུང་།། ཁྱོད་སྐུའི་འབབ་ལྡན་ཡུམ་གྱི་དགའ་ཚལ་དུ།། གཤེགས་པ་ལ་འགྲན་ཆུ་གཏེར་སྒྲོལ་བྱེད་བཤེས།། ལེགས་བྲིས་འདི་དག་བསོད་ནམས་ནོར་འཛིན་གྱི།། གདོང་ལ་སྐྲག་པས་ཀུན་བཟང་ཤར་གྱི་རིའི། ཕྲ ག་པ་ལ་འཛེགས་དེ་ཚེ་ཡན་ལག་མཆོག། གསེར་གྱི་འདབ་བཟང་རྐང་སྟེགས་རྣམ་པར་བསྟེན།། ཡོན་ཏན་མཐའ་དག་ཀུན་འགྲོ་ནགས་ན་བདེ།། འབྲུག་སྒྲའི་གར་གྱི་ངང་ཚུལ་ལ་ཆགས་པ།། སྤྱོད་བཟང་ཡུམ་གྱི་འོ་མའི་ཆུ་གཏེར་ཆེ།། གྱེན་དུ་འཕྱུར་ལྡན་འདིར་ནི་རྣམ་པར་རོལ།། མཁའ་འགྲོའི་དྲིལ་ཆེན་གླུ་དབྱངས་གྲེ་འགྱུར་བརྒྱའི།། སེར་བུས་འདར་ལྡན་རབ་སད་བུ་མོའི་མཚོ།། ཁྱབ་འཇུག་རྐང་པར་བཅོས་པའི་ལུས་ཀྱིས་ནི།། མགྲིན་སྔོན་རལ་བའི་མཐོ་རིས་སྐས་ལ་འཛེག། ཕྱག་མཐིལ་རྩིབས་སྟོང་འཁོར་ལོའི་མཚན་མ་དང་།། ས་ལ་དབྱངས་ཡིག་ཕྲེང་བ་ལྷན་ཅིག་ཏུ།། བཀོད་ལེགས་ཁྱོད་ནི་སྲིད་པའི་འཁྲུལ་བ་ལ།། བཞད་པའི་ཚེམས་ཕྲེང་འོད་ཀྱིས་ས་འདི་འགེངས།། ལེགས་གསུང་གཙུག་ལག་སྣང་བྱེད་བཟང་པོ་ཡི།། དཀྱིལ་འཁོར་ལ་འཕོས་ངུར་སྨིག་ཚོན་བཟང་ནི།། ངེས་པར་འབྱུང་བློ་འདབ་བརྒྱ་དང་འགྲོགས་པ།། དགེ་བ་ཀུན་བྱད་སྤྲུལ་པའི་འཁོར་ལོ་ཉིད།། ཆོས་རྒྱལ་ཨིནྡྲ་བྷུ་ཏིའི་གྲོང་ཁྱེར་པའི།། གླེགས་བམ་བརྒྱ་བྱིན་གྲོང་གི་ཡི་གེ་ཅན།། ཕོ་ཉའི་གདམས་པ་འཛིན་དེ་ལས་དཀར་བརྒྱའི།། ལྕགས་ཀྱུས་དྲངས་ཏེ་ཕྱག་གི་ལྡུམ་རར་འོངས།། འཕགས་ཡུལ་ཡི་གེ་ལས་འོངས་དོན་བཟང་པོ། །མུན་པར་བྱེད་གང་མངལ་གྱི་དྲི་མ་ཡི། །བློ་མིག་རབ་རིབ་བསལ་བའི་ཐབས་ཐང་ཞེས། །ས་ཧ་ཀ་རའི་འཁྲི་ཤིང་གྲིབ་མ་ལ། །མཉམ་པར་འཇོག་པའི་བསམ་གཏན་ལ་ཞུགས་ཚེ།། རྨི་ལམ་སྐྲུན་པར་བྱེད་དེ་ཉེ་བར་འོངས། །དེ་ཚེ་དེ་ཡི་ཡིད་ཀྱི་མཁའ།། བྱི་རུའི་ཆུ་འཛིན་ཉི་བཞོན་བརྒྱའི། །མདངས་ཀྱིས་རྣམ་པར་བཀྲ་བ་བཞིན། །མཁའ་འགྲོའི་གཟུགས་ཀྱིས་རྣམ་པར་ཁྱབ། །དགའ་མ་གསེར་གྱི་གདོང་མཛེས་མ། །མུ་ཏིག་དོ་ཤལ་འོག་པག་གི །མཁའ་ལ་སྤྲིན་དཀར་འགོད་བཞིན་དུ། །བུང་བའི་གླུ་དབྱངས་འདི་བྱས་སོ། །སྲིན་བུའི་ཁ་ཆུས་རང་ལུས་བཅིངས་པ་ལྟར། །ཡུལ་ལ་ཞེན་པས་བདུད་ཀྱི་རྒྱ་རུ་ཆུད། །བདེ་འགྲོ་ཐར་པ་འདོན་པའི་མི་སུ་དག །བྱང་ཕྱོགས་ཁ་ཆེའི་ཡུལ་དུ་ཕྱིན་ནས་ཀྱང་། །རྒྱ་གར་ཤར་ནུབ་ཆུ་བཞིན་མྱུལ་ནས་ནི། །དམ་ཆོས་རྒྱ་མཚོ་བོད་དུ་བསྒྱུར་ན་བདེ། །འདབ་གཤོག་མ་རྫོགས་མཁའ་ལྡིང་སྲས་དེ་ལ། །མཁའ་ཡི་ཕ་རོལ་རྟོགས་ཞེས་ཡུམ་གྱི་བཀའ། །འདའ་བར་དཀའ་བ་དེ་ཐོས་རྣམ་པར་འདར། །ངོ་འཛུམ་ནག་པོ་བདུད་ལ་བསྡིག་པ་བཞིན། །ཉིན་བྱེད་གདོང་བ་ཆུ་འཛིན་ཡོལ་བའི་གོས། །འཛིན་པ་ཅི་ཞེས་བསྐྱེད་མཛད་ཏི་ཏིའི་དྲིས། །མཁའ་འགྲོ་འབྲུག་གི་བུ་མོས་ཟབ་མོའི་སྒྲ། །སྙིང་ལ་སྐྲག་པ་སྟེར་བ་བསྒྲགས་ཏེ་སྨྲས། །སྣག་གི་གཉེན་བཅས་རི་ཡིག་ཚོགས་རྣམས་ཀྱིས། །རྣམ་དཔྱོད་དབུ་བ་དཀར་པོའི་དོ་ཤལ་ཅན། །རིན་ཆེན་ཚོགས་འཛིན་ཛ་ཧུའི་བུ་མོ་དེ། །འཕགས་ཡུལ་ནུབ་ཕྱོགས་ཁ་ཆེའི་རྒྱ་མཚོར་བཏང་། །སྙིང་རྗེསི་ལང་ཚོ་རྒྱས་པའི་ཟླ་བ་དེ། །བཀྲ་ཤིས་རྒྱུ་སྐར་འོད་ཟེར་རྩེ་མོའི་ཚོགས། །འཁྲིད་དེ་དམ་ཆོས་མཁའ་ཡི་ལམ་ཞུགས་ཀྱིས། །ཉ་ཡི་ཏོག་སྡེ་མུན་ཆེན་བག་ཡོད་བྱོས། །རྔ་ཡབ་གཡོ་ལྡན་ཤིང་རྟའི་འཁྲུལ་འཁོར་གྱིས། །ཆུ་མཐོངས་འགོག་པ་ལྷུར་ལེན་རི་དྭགས་འཛིན། །འདི་ཡི་མགོན་བཅས་དཔལ་ལྡན་སྙན་ངག་མཁན། །ཀུ་མུད་ཚལ་འདི་ཀུན་དགའི་གེ་སར་རྒོད། །ཟླ་བ་རང་གི་རྗེས་འབྲང་སྐར་ཚོགས་དང་། །འགྲོགས་པ་རྫོགས་པའི་དུས་ཀྱི་འཕགས་པའི་ཡུལ། །ཉེ་བ་མ་ཧཱ་པི་གྷའི་གྲོང་ཁྱེར་དུ། །སྙིང་སྟོབས་བཞོན་པ་ཁོ་ནས་དྲངས་པར་གྱུར། །དེར་ནི་ཉལ་འགྲོའི་རྒྱུན་ཆེན་པོ། །ཨིནྡྲ་ནཱི་ལའི་གོས་བཟང་ཅན། །གསེར་ལྡན་མ་ཡི་ལྟོ་བ་ནི། །རིལ་གྱིས་འཁྱུད་པར་བྱེད་པ་སྟེ། །དེ་ལ་རྐང་པས་འཐུང་བ་ཡི། །སྐ་རགས་སྙིང་ལ་འཇིགས་སྟེར་བ། །ཡོད་དེ་དེ་སྲུང་གནོད་སྦྱིན་མོ། །སྡིག་ཅན་སོག་ལེའི་སེམས་འཆང་བ། །དེ་ཡིས་དམོད་པའི་དུག་མདའ་ཡིས། །མདུན་ན་འདོན་དེ་རྣམ་པར་ལྷུང་། །སྙིང་སྟོབས་ཆུ་ཡི་རྡུལ་ཚོགས་ཀྱིས། །གང་བའི་གསེར་གྱི་ཆུ་འཛིན་ཡང་། །མི་འདོད་བྱེ་བའི་འཐོར་རླུང་གིས། །སྐད་ཅིག་ལྟས་འདི་མཐོང་། །དཔལ་མོ་གསེར་གྱི་གོ་ཆ་ཅན། །ཕྱོགས་ཀུན་བསྲུང་བའི་ཡི་གེའི་ཕྲེང་། །གསེར་གྱི་ཁ་བས་འབྲི་བྱེད་པ། །དེ་ཡིས་མགོན་དེ་དབུགས་ཕྱུང་ངོ་།། ཀ་ཡེ་སྤྱོད་བཟང་འོ་མའི་མཚོ། །སྲིད་རྩེའི་བར་དུ་ལུད་ཁྱོད་ཀྱི། །མངག་གཞུག་གདུང་བྱེད་ཚང་ཚིང་ནི། །ཁོ་མོས་ད་ལྟ་ཐལ་བར་བྱ། །ས་འདིར་དགྲ་བོ་ནོར་ཕྱིར་སྲོག་འདོར་བ། །མཐར་བྱེད་རྟ་བབ་ཀ་བའི་དཔུང་པ་ཅན། །ས་འདིར་དགྲ་བོ་ནོར་ཕྱིར་སྲོག་འདོར་བ། །མཐར་བྱེད་རྟ་བབ་ཀ་བའི་དཔུང་པ་ཅན། །བརྒྱ་ཕྲག་གནོད་པ་འབྱུང་ངོ་ཕྱག་གི་ནི། །ལྕགས་ཀྱུས་གྲོགས་འདི་ཁྲིད་དེ་མྱུར་དུ་སོང་། །ཅེས་སྨྲས་པ་དང་ལྷན་ཅིག་གཉིད་ཀྱིས་ནི། །ཟུམ་པའི་འདྲེན་བྱེད་འདབ་བརྒྱས་ཉི་འོད་ཐོབ། །རྨི་ལམ་ལྟས་ཏེ་རྗེས་ཞུགས་འཛིན་མ་ཡི། །ལྟོ་ལ་གོམ་པ་བཞི་བཅུ་བཀོད་པ་ནི།། ལུང་བསྟན་ས་དེར་སླེབས་པའི་དཔུང་གི་ཚོགས། །མིག་གི་འོད་ཟེར་ཅིག་ཅར་མུན་པས་ཁྱབ། །གང་ཡང་གྲང་དང་ཚ་བ་དང་། །བཀྲེས་དང་སྐོམ་པ་མི་སེམས་ཤིང་། །རྒྱལ་བའི་ཆོས་ཚུལ་མ་ལུས་ཀུན། །ཚོལ་ལ་ཞུགས་པའི་སེམས་དཔའ་འདིས།། ཤེར་ཕྱིན་ཁོ་ན་འཚོལ་བྱེད་པའི། །རྟག་ཏུ་ངུ་ཡི་གྲགས་པ་ཕྲོགས། །རིད་ཀྱང་དཀའ་སྤྲོའི་གཟི་བྱིན་ཅན། །ཟླ་ཚེས་འདྲ་དེ་རྗེས་འབྲང་བཅས། །གཤེགས་ཚེ་རྐང་འཐུང་དྲ་བའི་གསེབ། །བྱེད་པོས་མངོན་པར་སྤྲུལ་པ་ཡི། །ནུ་མ་མངོན་དགའ་སྨིན་ལེགས་ཟུང་།། ཡིད་སྲུབ་གསལ་བ་བཞིན་དུ་སྣང་། །དེ་དག་སྙིང་ནི་དད་པ་དང་། །ཕྲག་པ་ཟས་ཀྱི་ཁུར་གྱིས་ནོན།། དང་བའི་མིག་ཆུས་སྡིག་པ་ཡི། །དྲི་མ་འཁྲུད་ཅིང་ཟས་ཀྱི་ཚོགས། །རོ་བརྒྱ་ལྡན་པས་ཉེར་མཆོད་དེ། །སྡེ་ཆེན་གྲོང་གཤེགས་དོན་གྲུབ་བཞིན། །སྲོག་འདོར་ན་ཡང་དམ་པ་ལ། །ཕན་བཏགས་དྲིན་ལན་མི་འདོར་ཏེ། །དེ་དག་མགོ་སྐྱེས་ལྕང་ལོའི་ཤས།། དགེ་ལེགས་སླད་དུ་མངོན་པར་བཞེས། །སྦྲང་རྩིས་མྱོས་པའི་བུང་བ་དེས། །མཁའ་ལྡིང་ཕམ་བྱེད་འདབ་མིའ་གར། །ཉིན་ཕྱེད་བསྐྱོད་པས་ཁ་ཆེའི་ཡུལ། །གཉིས་སྐྱེས་གྲོང་ཁྱེར་བདུན་པར་ཕྱིན། །དེར་ནི་དེ་དག་གྲོང་པའི་སྐད། །ཟུར་ཆག་ལ་སོགས་ཐོས་ཙམ་གྱིས།། ཁོང་དུ་ཆུད་དེ་ཀུ་མུ་ད།། ཟླ་བ་མཐོང་བ་ཉིད་ཀྱིས་རྒོད།། དེ་ལས་རྒྱང་གྲགས་སོང་བའི་ནགས། །འཇིགས་རུང་ཅེ་སྤྱང་ཕཻ་སྒྲ་སྒྲོགས། །བུང་བ་གཡོ་བའི་མུན་གཏིབས་པས། །སོ་ལྡན་འགྲམ་པ་གནག་གྱུར་པ། །དེར་ནི་སྟག་གི་ཆུང་མས་མ་ཡི་དངོས། །གསར་དུ་ཐོབ་སྟེ་བཀྲེས་པས་རྣམ་པར་འཁྲུགས།། དེ་མཐོང་ཆུ་བུར་ལྟ་བུའི་ལུས་འདི་ནི། །འཇིག་པ་རིང་བ་མིན་སྙམ་སྐད་ཅིག་བསམས། །སྐབས་དེར་མིག་སྨན་མདོག་ཅན་གཅེར་བུ་ཞིག །མཁའ་ལ་གར་བྱེད་ཉི་མ་འབུམ་དག་སྤྲོ། །ཟླ་བ་ཚེས་པ་ལྟར་དཀར་མི་རྐང་གི །གླིང་བུའི་སྒྲ་ཆེན་མཁའ་ཡི་ཕ་མཐར་སྒྲོགས། །དེར་ནི་གྲུབ་པ་མཆོག་བརྙེས་པ། །རཏྣ་སིརླྷི་ཞེས་བྱ་སྟེ། །སྒྲ་དེ་གདོང་ལྔའི་གད་རྒྱངས་སུ། །འཁྲུལ་ལྡན་སྟག་མོ་ནགས་མཐར་བྲོས། །ཀ་ལ་བ་ཏི་ཞེས་བྱའི་གྲོང་། །ཁུ་བྱུག་གིས་རྒྱས་སྐྱེད་ཚལ་དུ། །བསོད་ནམས་པིར་གྱི་རི་མོ་ཡིས། །ཞབས་མཐིལ་གཟུགས་བརྙན་འབྲི་ཞིང་གཤེགས། །དེ་ནས་ཀརྨིར་རྒྱལ་པོའི་ཁབ། །མིག་ལ་མྱོས་པ་སྟེར་བྱེད་པ། །གྲོང་ཁྱེར་ཕ་མཐའ་གནམ་སྔོན་གྱིས། །ཕ་མཐའ་རྣམ་པར་འཁྱུད་པ་མཐོང་།། སྐར་མའི་ཚོགས་རྣམས་ནམ་མཁའ་ལ། །རྟེན་མེད་གནས་པར་མ་ནུས་ཏེ། །ས་འདིར་ལྷན་ཅིག་འགོད་པ་ཞེས། །བདག་ཉིད་ཆེན་པོས་རྣམ་པར་བསམ། །གྲིབ་བརྟན་ཡོན་ཏན་མེ་ཏོག་ཚོགས། །འཐུ་ཞིང་ཆུ་ཀླུང་བུ་མོ་རྣམས། །ཕྱོགས་ཀྱི་བུ་མོའི་རྣ་ལུང་ལ། །རྣ་རྒྱན་འགོད་ཕྱིར་རིངས་པར་རྒྱུ། །ཐོག་མར་ནུ་ཞོ་འཐུང་བའི་ཚོགས། །འདུས་ཏེ་མགོན་འདི་བསུ་བྱས་ནས། །ཀ་ཡེ་ལྟོས་ཤིག་གསེར་མདོག་ཅན། །སྨ་ར་མེད་འདི་ཡ་མཚན་ཞེས། །ཕེག་རྡོབ་ཐལ་མོའི་སྒྲ་འབྱིན་ཞིང་། །ག་ཞ་བྱེད་ཅིང་གོས་དག་འཐོར། །འཆི་མེད་མདུན་སས་གང་གི་ནི། །ནོར་སྲུང་སྡེར་མོ་མཆོད་འོས་པ། །བཞི་མདོ་ཆེན་པོར་སྟོན་པ་བཞིན། །འབྱུང་པོ་དགོངས་པས་བསོད་སྙོམས་མཛད། །དེར་ནི་གཉིས་སྐྱེས་མངོན་ཤེས་ལྔ། །འཛིན་འདྲས་ཕྱག་འཚལ་འདབ་བརྒྱ་ཡིས། །གང་བའི་དངུལ་གྱི་སྤོས་ཕོར་ནི། །ཕུལ་ཏེ་ལུང་བསྟན་བྱས། །ཀ་ལི་ཀ་ཡི་གྲོང་དབུས་ན། །གཙུག་ལག་ཁང་ཆེན་བི་ཧ་ར། །འཇིག་རྟེན་ཀུན་ལ་རྣམ་གྲགས་པར། །བརྒྱ་ཕྲག་ལྔ་རིག་གིས། །མདུན་བདར་གུ་ཎ་མི་ཏྲ་གང་།། སྒྲ་ཚད་རིག་པ་གང་ཞིག་གིས། །ཕྱོགས་སུ་ལྷུང་གྱུར་དེ་བསྟེན་ནས། །གང་བློ་ཆུ་ཤེལ་ཁོང་པར་ནི། །མ་ལུས་ཚོན་འཕོས་དབྱངས་ཅན་བཞིན།། དེ་དང་མཁན་པོ་ངྷརྨཱ་ཏ།། ཤྲི་ལ་དགེ་འདུན་བཅས་པ་ལས།། གསོལ་བཞིའི་ཆོ་ག་རྣམ་དག་གིས།། བསྙེན་རྫོགས་དགྲ་བཅོམ་མངོན་སུམ་ཉིད།། བིནྔྔྷ་ར་གྲོང་ཚོགས་མཆོད་ཀྱིས།། མཉེས་བྱས་རྣལ་འབྱོར་གྲུབ་མཆོག་ལས། །དེ་ནས་ཡིད་བཞིན་བསམ་འཕེལ་ཞེས།། བྱ་བའི་རྐང་མགྱོགས་དངོས་གྲུབ་བརྙེས།། གྲོང་ཁྱེར་ཏ་མ་ལ་སནྟི།། ཤྲངྷ་ཀ་རས་མཛེས་དེར་གཤེགས།། དབང་རབ་མནོས་ཤིང་རྒྱུད་ཀུན་ཐོས།།
རྩོམ་སྒྲིག་པ། ཀླུ་འབུམ་ཚེ་རིང་།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།