中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > དམངས་སྲོལ། > གོམས་སྲོལ། >
༄༅།། དམངས་གླུའི་སྐོར་ཅུང་ཙམ་མཚམས་སྦྱོར་བྱེད་པ།
དུས་ཚོད།2017-02-08 16:34:00     རྩོམ་གྱི་ཡོང་ཁུངས། མདོ་ལྷོ་དྲ་བ།     ཆུང་། | འབྲིང་། | ཆེ།
    (འདོན་ཐེངས་གོང་མར་མཐུད་རྒྱུ། )
ལོ་སར་དང་དུས་ཆེན་ལ་སོགས་པའི་སྐབས་སུ། ཡུལ་ལྷ་གཞི་བདག་དང་ཕོ་ལྷ་དགྲ་ལྷ་སོགས་གང་ལ་གང་འབྲེལ་གྱི་ལྷ་དེ་དག་ལ་མཆོད་བསྟོད་བྱེད་པའི་གླུ་རེ་བྱུང་ནས་ནང་དོན་ཕུན་སུམ་ཚོགས་པར་གྱུར།  མ་གཞིར་རྗེའི་ཐོག་མ་གཉའ་ཁྲི་བཙན་པོའི་ཡར་སྔོན་ནས་བཟུང་། བོད་རིགས་ངལ་རྩོལ་མི་དམངས་ཀྱིས་གླུ་བགྲང་ལས་འདས་པ་ཞིག་གསར་རྩོམ་བྱས་ཡོད་པ་ནི་གདོན་མི་ཟ་མོད།  སྐབས་དེ་དུས་བོད་ལ་ད་དུང་ཡི་གེ་མེད་པས།  ངག་ཐོག་གི་གླུ་དེ་དག་ཟིན་བྲིས་སུ་འདེབས་ཐབས་མ་བྱུང་བ་དང་།  ལོ་རྒྱུས་ཀྱི་དུས་ཡུན་དང་ལོ་ཟླའི་འཁོར་འགྲོས་དང་བསྟུན་ནས་ངག་ཐོག་གི་གླུ་དེ་དག་འགའ་ཤས་ཉམས་ཤིང་།  འགའ་ཤས་ཡི་གེར་མ་བཀོད་ཀྱང་བོད་རིགས་མི་དམངས་ཀྱིས་ངག་ནས་ཉར་ཚགས་དང་བརྒྱུད་སྤེལ་བྱས་ཏེ་མི་རབས་རེ་རེ་བཞིན་ད་ལྟའི་བར་དུ་རྒྱུན་འཇགས་སུ་གནས་ཡོད།  བོད་རྒྱལ་སྲོང་བཙན་སྒམ་པོའི་དུས་སུ་ཡི་གེ་བྱུང་རྗེས་དམངས་ཁྲོད་ཀྱི་ངག་རྩོམ་དེ་དག་རིམ་གྱིས་ལུང་སྐད-ཡུལ་སྐད-སྤྱི་སྐད-ཡིག་སྐད་བཞིན་ཡིག་ཐོག་ཏུ་ཟིན་ཐོར་འགོད་སྲོལ་བྱུང་བས།  ཉེ་བའི་དུས་འདིར《དམངས་གླུ་སྙན་དབང་གསོ་བའི་བདུད་རྩི》དང《གླུ་ཤགས་སྲིད་པའི་དར་ལྕེ》《ལ་གཞས་མཐུན་པ་དྲུག་སྐོར》《ལ་ཤགས་ཁྲོམ་ཆེན་དགུ་རྫོགས》《གླུ་གཞས་ཕྱོགས་བསྒྲིགས》སོགས་དཔེ་དེབ་བགྲང་གིས་མི་ལངས་པ་ཞིག་ཀློག་མཁན་དག་གི་སྤྱན་ལམ་དུ་བཀྲམ་ཡོད་དོ།།
  གསུམ་པ། དམངས་གླུའི་རིགས་དགར་ཚུལ།
   སྤྱིར་དམངས་གླུ་འདི་ལ་དུས་དང་ཡུལ།  སྐད་དང་གོམས་གཤིས་སོགས་ཀྱི་དབང་གིས་རྣམ་པ་མང་ཞིང་ནང་དོན་ཕུན་སུམ་ཚོགས་པར་གྱུར་པ་ཞིག་ཡིན་པས།  དེའི་བརྗོད་བྱ་དོན་གྱི་ཆ་ནས་རིགས་དུ་མར་དབྱེ་ཆོག་སྟེ།
   ངལ་རྩོལ་གྱི་གླུ།
   བོད་དམངས་ཁྲོད་དུ་རོང་འབྲོག་ནགས་ཞོར་སོགས་ཀྱི་ལས་རིགས་མི་འདྲ་བ་སོ་སོར་ངལ་རྩོལ་བྱེད་སྐབས་ཚང་མར་དམིགས་བསལ་གྱི་གླུ་གཞས་གཏོང་རྒྱུ་ཡོད་ལ།  དེས་ངལ་རྩོལ་ལ་རམ་འདེགས་དང་ངལ་བ་ཁྱད་གསོད་ཀྱི་ནུས་པ་ཞིག་ཐོན་ཡོད།  ཕལ་ཆེ་བ་ཚིག་གྲུབ་གོང་འོག་གཉིས་ལས་གྲུབ་ཅིང་།  སྒྲའི་ཁྱབ་ཁོངས་རྒྱ་ཆེན་པོ་མེད་ཀྱང་རོལ་ཚིགས་གསལ་ཞིང་སྤྲོ་བ་ཆེ་བ་དང་།  ནང་དོན་གྱི་ཁྱབ་རྒྱ་ཡང་ཧ་ཅང་ཆེན་པོ་ཡོད་དེ།
  (༡) ཨར་གཞས།
ཨར་གཞས་ནི་ཨར་ལས་བྱེད་སྐབས་ཕན་ཚུན་གཞོགས་འདེགས་ཡོང་བ་དང་ངལ་རྩོལ་གྱི་འགྲོས་རིམ་དང་རྐང་ལག་གི་ཤུགས་མཉམ་པ་ལ་སོགས་པར་དམིགས་ནས་བྱུང་བ་ཡིན།  ཁང་སྟེང་ངམ་ཁང་མིག་གི་ནང་དུ་ས་ཁོད་སྙོམས་པའི་སྐབས་སུ་གཏོང་བ་དང་།  ཨར་ལས་བྱེད་སྐབས་ངལ་རྩོལ་པ་ཚོས་དུས་ཆེན་གཏོང་བ་ལྟ་བུའི་སྤྲོ་སེམས་འཁོལ་བཞིན་མཚན་མོ་གཉིད་ཀྱང་མི་ཁུག་པ་དང་།  ངལ་རྩོལ་མ་བྱས་གོང་ལག་ཕྲེང་སོགས་དགོས་ངེས་ཀྱི་གཟབ་མཆོར་གང་ལེགས་སྤྲོས་པ་མ་ཟད།  འབོག་རྡོའི་ཡུ་བར་ཡང་གཡེར་ཁ་ཆུང་ཆུང་བཏེགས་ནས་མི་རྣམས་རུ་སྟར་གཉིས་སམ་གསུམ་བཞི་སོགས་བསྒྲིགས་ནས་གླུ་གཞས་གཏོང་བ་དང་ཆབས་ཅིག་ཏུ་ཨར་ཀ་རྡུང་ནས་སྒྱུ་རྩལ་དང་ངལ་རྩོལ་གྱི་སྤྲོ་སྐྱིད་ལ་མཉམ་རོལ་བྱེད་ཀྱི་ཡོད་པ་རེད། སྔོན་དུས་ངལ་རྩོལ་འདི་རིགས་བྱེད་མཁན་བུད་མེད་ཤ་སྟག་ཡིན་ཡང་ཉེ་དུས་སྐྱེས་པའང་ཞུགས་ཀྱིན་འདུག་གོ།
  (༢) གྱང་གཞས།
  གྱང་གཞས་ནི་གྱང་རྡུང་སྐབས་ངལ་རྩོལ་ལ་རམ་འདེགས་དང་ངལ་བ་ཁྱད་གསོད་ཀྱི་ཆེད་དུ་གཏོང་བའི་གཞས་ཤིག་ཡིན།
  (༣) འོ་མ་བཞོ་བའི་གླུ།
   འོ་མ་བཞོ་བའི་གླུ་ནི་འབྲོག་ལས་གླུ་གཞས་ནང་གི་རིགས་ཆུང་གྲས་ཤིག་ཡིན།  དེ་གཙོ་བོ་མདོ་དབུས་ཁམས་གསུམ་གྱི་འབྲོག་ཁུལ་དུ་དར་ཁྱབ་ཆེ་ལ།  གཞས་གདངས་ཀྱི་རོལ་ཚིགས་དང་ངལ་རྩོལ་གྱི་བྱེད་ལུགས་གཉིས་ཧ་ཅང་མཐུན་པོ་ཡོད་པ་མ་ཟད།  དབྱངས་རྟའི་འགྱུར་ཁུག་ལ་བརྩེ་དུང་ཟབ་ཅིང་སྙན་འཇེབས་ལྡན་པའི་ཁྱད་ཆོས་ལྡན།
  (༤) གདུང་མ་འགྱོགས་པའི་གླུ།
  གདུང་མ་འགྱོགས་པའི་གླུ་ནི་ཚང་མས་མཉམ་དུ་ཤིང་སྡོང་འཁུར་བ་དང་གདུང་མ་འགྱོགས་སྐབས་ཕན་ཚུན་གཞོགས་འདེགས་ཡོང་ཆེད་མཉམ་དུ་ལེན་པའི་གླུ་ཞིག་ཡིན།  དེའི་དབྱངས་ཀྱི་འགྱུར་ཁུག་དྭངས་ཤིང་གསལ་ལ་ལེན་བདེ་བ་དང་།  ནགས་ཁུལ་གྱི་ཁྱད་ཆོས་ལྡན་ཞིང་སྒྲིག་གཞི་ཆ་ཚང་བ།  རོལ་ཚིགས་ཀྱི་མགྱོགས་ཚད་ཅུང་དལ་བ།  ཐུན་མོང་གི་ངལ་རྩོལ་གྱི་འགྲོས་མཉམ་པར་བྱེད་པ་དང་ངལ་བ་ཁྱད་གསོད་སོགས་ངལ་རྩོལ་ལ་རམ་འདེགས་བྱེད་པ་ཞིག་ཡིན།
  (༥) གཡུལ་རྡུང་བའི་གླུ། 
  གཡུལ་རྡུང་བའི་གླུ་ནི་ཞིང་ལས་གླུ་གཞས་ནང་གི་རིགས་ཤིག་ཡིན།  དེ་གཙོ་བོ་ཞིང་ལས་ས་ཁུལ་དུ་དར་ཁྱབ་ཆེ་ལ།  གཞས་གདངས་ཀྱི་རོལ་ཚིགས་ལ་ཧ་ཅང་ཞིབ་ཆ་ཆེ་ཞིང་གནད་ལ་འཕིགས་པ།  དབྱངས་འགྲོས་ཀྱང་ངལ་རྩོལ་དེའི་ཁྱད་ཆོས་དང་འཚམ་པ།  མི་མང་བོས་མཉམ་དུ་བླངས་ཚེ་དབྱངས་རྟ་ཧ་ཅང་གསལ་ཞིང་ངལ་རྩོལ་ལ་འཇུག་པར་སྤྲོ་བ་ཞིག་ཡིན།
  (༦) ཐགས་འཐག་པའི་གླུ།
  ཐགས་འཐག་པའི་གླུ་ནི་མདོ་དབུས་ཁམས་གསུམ་གྱི་འབྲོག་ཁུལ་དུ་དར་ཁྱབ་ཤིན་ཏུ་ཆེ་ཞིང་།  གཞས་གདངས་ཀྱི་རོལ་ཚིགས་དང་ངལ་རྩོལ་གྱི་བྱེད་ལུགས་གཉིས་ཧ་ཅང་མཐུན་པོ་ཡོང་བ་དང་མི་གཅིག་གིས་ལེན་པ་ཤས་ཆེ།  ངལ་རྩོལ་ལ་རམ་འདེགས་དང་ངལ་བ་ཁྱད་གསོད་ཀྱི་ནུས་པ་ཐོན།
   གླུ་ཁ་མཚར།
  དེ་ཡང་ཁ་དཔེ་ལ་བོད་མི་རེའི་ཁ་ན་གླུ་རེ་ཞེས་གཉེན་སྒྲིག་རྟེན་འབྲེལ་གྱི་མཛད་སྒོ་སོགས་དགྱེས་སྐྱེམས་སྟོན་མོ་སྣ་ཚོགས་ལ་རོལ་དུས་རྒྱུན་པར་གླུ་ལེན་པ་ཡིན།  དེ་ཡང་ས་གནས་དང་མི་རིགས་ཀྱི་ཁྱད་ཆོས་མངོན་པར་གསལ་བའི་ཚིགས་བཅད་བརྩམས་ཆོས་ཤིག་སྟེ།  མཚོ་སྔོན་དང་ཀན་ལྷོ།  རྔ་བ་སོགས་སུ་དར་ཁྱབ་ཤིན་ཏུ་ཆེ།  འདི་ལ་ཚེག་བར་བདུན་དང་བརྒྱད་ཅན་ཤས་ཆེ་ལ་སྤྱིར་བཏང་དུ་ཤོ་ལོ་ཀ་གསུམ་ལས་མེད་ཅིང་།  ཕལ་ཆེ་བ་ཤོ་ལོ་ཀ་དང་བོ་གཉིས་དཔེ་དང་།  གསུམ་པ་དཔེ་ཅན་དུ་གྲུབ།  ཚིག་རྐང་གཉིས་དང་གསུམ།  བཞི་དང་ལྔ་ཅན་གང་རུང་འབྱུང་ཡང་།  གླུ་གཅིག་གི་ནང་དུ་ཤོ་ལོ་ཀ་གསུམ་པོའི་ཚིག་རྐང་རིང་ཐུང་འདྲ་མཉམ་དང་དོ་མཉམ་པས་ངག་ལ་གྱེར་བདེ་བ་ཞིག་ཡིན་དགོས།
   གླུ་ཤགས།
  གླུ་ཤགས་ཞེས་པ་ནི་གླུ་བ་རེ་རེ་ཁ་གཏད་དུ་ལངས་ནས་ཕན་ཚུན་ལ་དྲི་བ་དྲིས་ལན་དང་མཚང་འདྲི་རེས།  ཟུར་ཟ་དང་འཕྱ་སྨོད། རང་བསྟོད་གཞན་སྨོད་སོགས་ཀྱི་ནང་དོན་དག་དཔེ་རུ་དྲངས་ནས་བླངས་ཏེ་ཉན་མཁན་ལ་གད་མོ་སློང་བ་དང་སྤྲོ་བ་ཆེན་པོ་བསྐྱེད་ཐུབ་པའི་ཚིགས་བཅད་བརྩམས་ཆོས་ཤིག་སྟེ།
       (མུ་འགོད 3 )  
རྩོམ་སྒྲིག་པ། ཡུམ་ཚེ་རིང་།
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།