༄༅།། རེབ་གོང་གཉན་ཐོག་སྡེ་བའི་གཏོ། - གོམས་སྲོལ། - མདོ་ལྷོ་དྲ་བ།-甘南香巴拉在线
  中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > དམངས་སྲོལ། > གོམས་སྲོལ། >
༄༅།། རེབ་གོང་གཉན་ཐོག་སྡེ་བའི་གཏོ།
དུས་ཚོད།2019-06-24 09:48:38     རྩོམ་གྱི་ཡོང་ཁུངས། མཚོ་སྔོན་བོད་ཡིག་གསར་འགྱུར།     ཆུང་། | འབྲིང་། | ཆེ།
ལོ་རེའི་ཧོར་ཟླ་བཅུ་གཅིག་པའི་ཚེས་ཉི་ཤུ་ཉིན།རྨ་ལྷོ་བོད་རིགས་རང་སྐྱོང་ཁུལ་ཐུན་རིན་རྫོང་གཉན་ཐོག་སྡེ་བ་རུ་ལོ་རེའི་གཏོ་འཆམ་པ་རེད།དེ་ནི་རེབ་གོང་གི་ཡུལ་གྲུ་གཞན་རྣམས་དང་མི་མཚུངས་པའི་རིག་གནས་སྣང་ཚུལ་ཁྱད་པར་བ་ཞིག་རེད།བོའུ་ཐུའུ་ཞེས་པ་ཁ་ཅིག་གིས་གཉན་ཐོག་གི་སྐད་ཡིན་ལ་དོན་ནི་ཀེག་གླུད་གཏོང་བའམ་ཁ་ཅིག་གིས་འདྲེ་བདའ་བ་དང་གླུད་རྫོངས་ཀྱང་ཟེར།ཡང་གཞན་དག་ན་རེ།བོའུ་ཐུའུ་ཞེས་པ་ནི་རྒྱའི་སྐད་ཡིན་ལ་བོད་སྐད་དུ་སྟག་གི་མིང་ཡིན།རྒྱུ་མཚན་ཅི་ཡིན་ཞེ་ན།བོའུ་ཐུའུ་མི་བདུན་པོས་ཁོག་སྟོད་གཅེར་བུ་དང་རྐང་སྣམ་བརླ་རྩར་བརྫེས་རྗེས་ལུས་ཧྲིལ་པོར་བསངས་ཐལ་བྱུགས་ཏེ་སྣག་ཚས་གདོང་ལ་སྨ་ར་འབྲི་བ། བྲང་ལ་སྟག་གི་གདོང་པ་འབྲི་བ།རྐང་པ་གཉིས་ལ་ཐིག་ལེ་དང་ཆུ་རིས་མང་པོ་འབྲི་བ། མགོ་ལ་སད་མ་ཟེར་བའི་ཤོག་དཀར་རིང་པོ་ཞིག་འདོགས་པ་དེ་དག་ནི་རི་དྭགས་སྟག་གི་གཟུགས་རིས་རེད།
 
གཉན་ཐོག་ལྷ་པ་ཚང་གི་ལྷ་པ་དང་ཀོའུ་མོ་རི་ལང་གི་རྟེན་བཅོལ་ཚང་གི་མི་སྣ་གཅིག་སྟེ་དེ་གཉིས་ཀྱིས་ལྷ་རྔ་བཟུང་ནས་མགོ་ལ་རིགས་ལྔའི་དབུ་རྒྱན་གྱོན་པ་དང་།གཞན་བདུན་གྱིས་མགོ་ལ་རལ་བ་དཀྲིས་པའི་སྣེ་ལ་གླུད་རྟ་བཏགས་ཏེ་ཉིན་ནག་དེར་ཁོག་སྟོད་གཅེར་བུ་དང་ལྷམ་མིད་པར་རྐང་རྗེན་དུ་རྐང་སྣམ་ཁོ་ན་གྱོན་ནས་ཁོག་སྟོད་ལ་བསངས་ཐལ་བྱུགས་ཏེ་སྟག་གཟིག་གི་རི་མོ་བྲིས།ཁ་ནང་དུ་ཤ་རློན་དང་སྐེ་ལ་སྐམས་ལུག་གི་རྒྱུ་མ་རློན་པ་བཟུང་ནས་རལ་གྲི་སྐེ་ལ་གཟེར་བ་དང་།ལག་གཉིས་ལ་དབྱུག་པ་ཐོགས་ནས་ཁྱིམ་ཚང་རེ་རེས་བྱིན་པའི་གོ་རེ་དེ་དབྱུག་པར་བརྒྱུས་ནས་གཞི་བདག་ཁང་ནས་ཆས་ཏེ་ཁྱིམ་རེའི་ཁང་ཐོག་ནས་ལྷས་སུ་བབས་ཏེ་སྐོར་བ་བྱེད་པ་དང་།དེ་ནས་ཁང་ཐོག་ནས་ཁང་ཐོག་བརྒྱུད་དེ་མཁར་སྒོའི་ཕྱིར་བུད་ནས་དབུ་རྒྱན་གྱོན་པ་ཞིག་དང་།གཞན་གསུམ་གྱིས་སྲང་བར་ནས་གར་འཆམ་ལྟ་བུ་ཞིག་འཁྲབ་ནས་ལྷ་རྔ་རྡུང་བཞིན་ཡོང་བ་དང་། སྐབས་དེར་གཞོན་པ་ལྔ་རྒྱུག་མ་མཆོང་གིས་ཁྱིམ་ཚང་སོ་སོར་དེ་ལྟར་ཉུལ་ནས་མཐར་ཁོ་ཚོ་བདུན་པོ་མཁར་སྒོར་འཛོམས་ནས་འཆམ་འདྲ་འཁྲབ།དུས་དེར་སྡེ་བའི་སྐྱེས་ཕོ་མོ་རྣམས་སྲང་བར་དུ་ཚོགས་ནས་མདོ་ཤེས་རབ་སྙིང་པོ་འདོན་པ་དང་།ཟློག་བསྒྱུར་བྱེད་པ།ཀི་རིང་འདེབས་པ།ཤོག་སྦག་རྒྱག་པ།ཁོ་ཚོའི་ཕྱོགས་སུ་མི་མདའ་གཏོང་བ་སོགས་བྱས་ཚེ་ཁོ་ཚོ་ཡང་འགྲོ་ཁུལ་བྱས་ནས་སྤྱི་ལེ་གཅིག་གི་སའི་གྲམ་པ་ཁར་སོང་ནས་ལུས་པོ་ཆུ་འཁྱག་གིས་བཀྲུས་ནས་དབྱུག་པ་དང་གོ་རེ་མང་ཤོས་ཆུ་ལ་བསྐྱུར་ནས་ཕྱིར་རང་ཡུལ་དུ་ལོག་པར་བྱེད་པ་ཞིག་གོ།
 
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།