中文版 藏文版 手机APP 官方微信
མདུན་ཤོག གསར་འགྱུར། སྤྱི་ཚོགས། རིག་གནས། ལོ་རྒྱུས། ཆོས་ལུགས། ཡུལ་སྐོར་སྐྱེ་ཁམས། བཅའ་ཁྲིམས་ཁྲིམས་སྲོལ། ཚན་རྩལ་ཤེས་བྱ། རྩོམ་རིག མི་སྣ། དམངས་སྲོལ། པར་མཛོད།
 མདུན་ཤོག > དམངས་སྲོལ། > དུས་སྟོན། >
༄༅།། ཀླུ་མཆོད་དུས་ཆེན།
དུས་ཚོད།2016-06-29 11:25:36     རྩོམ་གྱི་ཡོང་ཁུངས། བོད་ལྗོངས་རིག་གནས་དྲ་བ།    ཆུང་། | འབྲིང་། | ཆེ།
    ཀླུ་མཆོད་དུས་ཆེན་ནི་ལྷ་སའི་ཉེ་འཁོར་གྱི་ཡུལ་གྲོང་སོ་སོ་ནས་ལོ་རེའི་བོད་ཟླ་བཞི་བའི་ཚེས་བཅོ་ལྔ་ཉིན་ཀླུ་རིགས་དད་མཆོད་བྱེད་པའི་དུས་ཆེན་ཁྱད་པར་བ་ཞིག་ཡིན། བོད་རིགས་ཀྱི་མེས་པོ་གོང་མ་རྣམས་ཀྱིས་ཁམས་གསུམ་འཇིག་རྟེན་ཧྲིལ་བོར་སྟེང་ལྷ་ཡུལ་དང་བར་མི་ཡུལ། འོག་ཀླུ་ཡུལ་ཆགས་ཡོད་པའི་ལྟ་བ་འཛིན་པས། འོག་ཀླུ་ཡི་རིགས་རྣམས་ཕལ་ཆེར་རྒྱ་མཚོ་ལ་གནས་ཤིང་། རྒྱ་མཚོ་ཆེན་པོ་ནི་ཀླུ་ཡི་ཕོ་བྲང་དངོས་ཡིན་པར་འདོད་པ་དང་། མཚོ་དང་ཀླུ་ལ་དུས་ངེས་ཅན་དུ་མཆོད་ན་ཆར་ཆུ་དུས་སུ་འབབ་ཅིང་རྒྱུ་ནོར་ལོངས་སྤྱོད་ཀྱི་དངོས་གྲུབ་ཅི་འདོད་དུ་བསྩལ་ཡོང་བར་བསམས། བཤད་རྒྱུན་དུ་གནའ་སྔ་མོའི་དུས་སུ་མདོ་དབུས་མཐོ་སྒང་གི་ཡུལ་གྲུ་ཧྲིལ་བོ་ནི་ཆུས་ཁེངས་པའི་རྒྱ་མཚོ་ཆེན་པོ་ཞིག་ཡིན་ལ། ལོ་དང་བསྐལ་བ་མང་བོ་བགོར་བའི་རྗེས་སུ་མཚོ་ཆུ་རིམ་གྱིས་འགྲིབ་ཀྱང་མཚོ་ན་གནས་པའི་ཀླུ་རྣམས་ཀྱིས་སྔར་བཞིན་ཆུའི་འཇིག་རྟེན་ལ་དབང་སྒྱུར་དང་དོ་དམ་བྱས་ཡོད་པར་བསམས་པས། མི་རྣམས་ཀྱི་འཚོ་རྟེན་ལོ་ཏོག་ལ་ཉེ་བར་མཁོ་བའི་ཆར་ཆུ་ཞིག་དབབ་དགོས་ན། ངེས་པར་ཀླུ་ལ་མཆོད་དེ་ཀླུས་ལོངས་སྤྱོད་ཀྱི་དངོས་གྲུབ་གནང་བར་བསྒུག་དགོས་པས། ལོ་རེར་བྱིས་པ་སྟག་ལོ་བ་ཞིག་མཚོ་ནང་དུ་འཕངས་ཏེ་ཀླུའི་རྒྱལ་བོ་ལ་མཆོད་པ་བྱེད་པའི་སྲོལ་ཡོད། ལོ་གཅིག་གི་མཆོད་པའི་སྐབས་སུ་རྒྱལ་བོའི་བཀའ་ལྟར་བློན་པོ་རྣམས་ཀྱིས་བཙལ་བཙལ་མཐར་བླ་སྤྲུལ་ཆེན་པོ་ཞིག་གི་ཐུགས་འདང་ཆེ་བའི་སློབ་མའི་སྟེང་དུ་ཁེལ། དེ་ལྟ་ནའང་རྒྱལ་བོ་སྨྲ་བ་ལན་གཅིག་ཡིན་ཕྱིར་དེའི་བཀའ་གྱེན་ལྡོག་མ་ནུས་པར་བླ་སྤྲུལ་གྱི་སློབ་མ་དེ་ཡང་སྔར་སྲོལ་ཇི་བཞིན་མཚོ་མཆོད་དུ་ཕུལ།
   དེ་ནས་ཡུན་རིང་ཞིག་འགོར་རྗེས་མཚོ་མཆོད་དུ་ཕུལ་བའི་མི་དེ་གནོད་སྐྱོན་ཅི་ཡང་མེད་པར་ཕྱིར་རྒྱལ་བོའི་མདུན་དུ་བསླེབས་ཏེ། རྒྱལ་བོའི་སྲས་མོ་ཆུང་མར་བསླངས་ཤིང་རྒྱལ་བོས་ཀྱང་ཡ་མཚན་དང་བཅས་རང་གི་བུ་མོ་དེར་སྟེར་རྒྱུ་ཁས་བླངས། དུས་དེ་ནས་བཟུང་ལོ་ལྟར་བུ་ཆུང་སྟག་ལོ་བ་རེ་མཚོ་ནང་དུ་འཕེན་པའི་སྲོལ་བཅད་དེ། ལོ་རེ་བཞིན་རང་འཁོས་དང་བསྟུན་པའི་དངོས་རྫས་གང་རུང་ཀླུ་རྒྱལ་ལ་མཆོད་ཆོག་པའི་བཀས་བཅད་གནང་། སྲོལ་དེ་ལ་བརྟེན་ནས་ད་ལྟ་ཡང་ལྷ་སའི་ཉེ་འཁོར་གྱི་ཡུལ་གྲོང་སོ་སོ་ནས་ལོ་རེའི་བོད་ཟླ་བཞི་བའི་ཚེས་བཅོ་ལྔ་ཉིན་ཆར་ཆུ་དུས་སུ་འབབ་པ་དང་རྟ་ནོར་ལུག་གསུམ་གྱི་འཕེལ་ཁ་དར་བའི་སྨོན་འདུན་འཆང་བཞིན་ཀླུ་རིགས་དད་མཆོད་བྱེད་པའི་དུས་ཆེན་ལ་རོལ་བ་ཡིན།།
རྩོམ་སྒྲིག་པ། ཀླུ་འབུམ་ཚེ་རིང་།
 
Copyright2010-2020 ཀན་ལྷོ་གསར་འགྱུར་ཁང་། All rights reserved.
དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་མཆན་དཔང་ཡིག་སྒྲིག་ཨང་། ཀན་སུའུ་གསར་འགྱུར་གཞུང་སྒྲུབ 6201023
ICPཐོ་འགོད་སྙན་སེང་ཨང་རྟགས།ལུང་ICPཐོ་འགོད་སྙན་སེང་16001452 ལག་རྩལ་རམ་འདེགས། ཀན་སུའུ་པའོ་རན་ཚན་རྩལ།
དྲ་ཚིགས་འདིར་བཀོད་ཀྱི་ཀན་ལྷོ་གསར་འགྱུར་ལས་གཞན་པའི་གསར་འགྱུར་ཚང་མ་དྲ་ཚིགས་གཞན་ལས་བཏུས་པ་ཡིན་པས།ཆ་འཕྲིན་དག་དཔྱད་གཞིར་འཛིན་པ་ལས་གལ་ཏེ་ཁྱེད་ཉིད་ཀྱི་ཁེ་དབང་ལ་གནོད་འཚེ་བཏང་ཚེ་ང་ཚོར་འབྲེལ་གཏུག་ཞུ་རོགས།